ហ៊ុន សែន៖ «បើផែនទីក្លែងក្លាយ នឹងលាលែងពីនាយករដ្ឋមន្រ្តី»
- ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) -ភ្នំពេញថ្ងៃទី៩ កញ្ញា ២០១៥
- កែប្រែចុងក្រោយ: September 17, 2015
- ប្រធានបទ: ព្រំដែន
- អត្ថបទ: មានបញ្ហា?
- មតិ-យោបល់
-
នៅរសៀលថ្ងៃទី៨ ខែកញ្ញា ឆ្នាំ២០១៥ នេះ លោកនាយករដ្ឋមន្រ្តីកម្ពុជា លោក ហ៊ុន សែន បានចេញមុខជាសាធារណៈ តាមកញ្ចក់ទូរទស្សន៍ជាតិកម្ពុជា ធ្វើការបកស្រាយ និងលាតត្រដាងជាថ្មីបន្តទៀត ជុំវិញបញ្ហាព្រំដែន និងផែនទី បន្ទាប់ពីលោក បានបកស្រាយក្នុងរដ្ឋសភា អស់រយៈពេលជាងប្រាំម៉ោងរួចម្តងមកហើយ កាលពីថ្ងៃទី៩ ខែសីហា ឆ្នាំ២០១២។ ប៉ុន្តែការថ្លែងនៅលើកនេះ មានលក្ខណៈពិសេសជាងលើកមុន នៅត្រង់ថា លោក ហ៊ុន សែន បានអះអាង ថានឹង«ចុះចេញ» ពីកៅអីជានាយករដ្ឋមន្ត្រី ដែលលោកបានអង្គុយ ជាង៣ទសវត្សន៍មកហើយនោះ រួចដើរចូលពន្ធនាគារ ប្រសិនណាជាផែនទី ដែលរដ្ឋាភិបាលលោកប្រើ ក្នុងការបោះបង្គោល ជាផែនទីក្លែងក្លាយ។
លោក ហ៊ុន សែន បានថ្លែងឡើងថា៖ «ខ្ញុំព្រះករុណាបានប្តេជ្ញាចិត្តរួចហើយ... បើផែនទីខុសគ្នា ខ្ញុំនឹងប្រកាសចុះចេញ (ពីដំណែង) ខ្ញុំតាមដានការផ្ទៀងផ្ទាត់ផែនទី ទាំងមកពីអង្គការសហប្រជាជាតិ និងជាពិសេសផែនទី មកពីបារាំង ព្រោះបារាំងជាអ្នកគូស។ កាលណោះ បើខុស ខ្ញុំនឹងប្រកាសបញ្ចប់ការកាន់តំណែង ជាង៣៦ឆ្នាំរបស់ខ្ញុំ។ (...) ប្រសិនបើផែនទី មកពីបារាំងខុសគ្នា ជាមួយផែនទី ដែលចុះហត្ថលេខាជាមួយវៀតណាម ខ្ញុំព្រះករុណានឹងប្រកាស លាលែងពីតំណែងភ្លាម មិនធ្វើនាយករដ្ឋមន្រ្តីតទៅទៀត។ ហើយក៏ស្ម័គ្រចូល ទៅកាន់មន្ទីរឃុំឃាំង រង់ចាំតុលាការកាត់ទោសតែម្តង។ ព្រោះនេះជាការទទួលខុសត្រូវ ជាប្រវត្តិសាស្រ្តដ៏ធំធេង។ (...) ហ៊ានស៊ីហ៊ានសង ចិត្តជាកូនប្រុស។»
ការថ្លែងរបស់លោកនាយករដ្ឋមន្ត្រី បានធ្វើឡើង ក្នុងន័យជម្រាបជូន ដល់ប្រជាពលរដ្ឋខ្មែរទាំងអស់ នៅទូទាំងប្រទេស បានដឹង និងយល់ ពីបញ្ហានៃការប្រើប្រាស់ផែនទី របស់រដ្ឋាភិបាល ក្នុងការបោះបង្គោលនោះ។ លោកបញ្ជាក់ថា ការបកស្រាយនេះ ក៏ដើម្បីឲ្យពលរដ្ឋទាំងអស់ កាន់តែយល់ និងកាន់តែច្បាស់ កុំឲ្យមានការភ័ន្ដច្រឡំ ទៅថ្ងៃមុខ ពីបញ្ហាកិច្ចការព្រំដែន ដែលរដ្ឋាភិបាលកម្ពុជា បាននឹងកំពុងអនុវត្ដ ជាមួយប្រទេសជិតខាងនោះ ពិសេសជាមួយនឹងប្រទេសវៀតណាម។
ក្នុងរយៈពេលជិតបីម៉ោង នៃការបកស្រាយ តាមកញ្ចក់ទូរទស្សន៍ជាតិកម្ពុជានេះ លោក ហ៊ុន សែន បានចង់បង្ហាញបន្ថែមថា រដ្ឋាភិបាលរបស់លោក កំពុងប្រើប្រាស់នូវផែនទីមួយ ដ៏ពិតប្រាកដ មានការទទួលស្គាល់ ពីស្ថាប័នជាតិធំៗ ដូចជារដ្ឋសភា ព្រឹទ្ធិសភា និងព្រះមហាក្សត្រជាដើម ហើយវាមិនដូចអ្វី ទៅនឹងការចោទប្រកាន់ ដោយបុគ្គលមួយចំនួន ដែលតែងលើកឡើងថា រដ្ឋាភិបាលកម្ពុជា បានប្រើប្រាស់ផែនទីក្លែងក្លាយ ឬផែនទីចោរ ក្នុងការបោះបង្គោលព្រំដែន ជាមួយប្រទេសវៀតណាមនោះឡើយ។
នាយករដ្ឋមន្រ្តីកម្ពុជា បានទទួលស្គាល់ថា លោកមិនមែនជាអ្នកឯកទេស ខាងផែនទីទេ តែលោកព្យាយាម យល់អំពីផែនទីនេះ តាមរយៈការប្រៀបធៀបផែនទីបោន និងផែនទីUTM មកពីបារាំង ឃើញថា គ្មានអ្វីខុសគ្នានោះទេ។ លោកបានធ្វើការចោទជាសំនួរថា អ្នកចោទគេប្រើផែនទីក្លែងក្លាយ តើហ៊ានលាលែងតំណែងឬអត់? តើហ៊ានទទួលខុសត្រូវរបៀបណា? ហ៊ានសុំទោសឬទេ? ហ៊ានទទួលខុសត្រូវឬទេ ខាងសីលធម៌? ឥឡូវហ៊ានឬទេ បើចិត្តជាកូនប្រុស? លោកបង្ហាញថា ការចោទរដ្ឋាភិបាលនោះ ជាការប្រព្រឹត្តឧក្រិដ្ឋកម្ម និងជាឧក្រិដ្ឋជន។
ដឹកគោ ឲ្យទៅស្ដាប់ចាប៉ី...
នៅក្នុងប៉ុន្មានខែចុងក្រោយនេះ ការរំជើបរំជួលជុំវិញការប្រើប្រាស់ផែនទី ដើម្បីបោះបង្គោលជាមួយប្រទេសវៀតណាម បានក្លាយជាបញ្ហាដ៏រសើប ដែលក្រុមប្រឆាំងបានលើកយកមកចង្អុលទៅរដ្ឋាភិបាល ដោយអះអាងថា ផែនទីសព្វថ្ងៃដែល រដ្ឋាភិបាលកំពុងប្រើប្រាស់នេះ ជាផែនទីក្លែងក្លាយ ឬជាផែនទីចោរ។ នៅចំពោះការចោទប្រកាន់នេះ យុទ្ធនាការផ្ទៀងផ្ទាត់ផែនទីមួយ ត្រូវបានរដ្ឋាភិបាលលោក ហ៊ុន សែន ធ្វើឡើង ដោយបានស្នើរទៅសុំខ្ចីផែនទី ពីបណ្ដាប្រទេសមហាអំណាច និងពីអង្គការសហប្រជាជាតិ មកផ្គូផ្គងជាមួយផែនទី របស់រដ្ឋាភិបាល។ ឆ្លងចេញពីយុទ្ធនាការនេះ រដ្ឋាភិបាលបានប្រកាសដោយខ្លួនឯងថា ផែនទីទាំងអស់ មានភាពដូចគ្នាទាំងស្រុង។
ចំពោះការផ្ទៀងផ្ទាត់ផែនទី ដែលបង្កើតឡើង និងលទ្ធផល ដែលប្រកាសអះអាងឡើង ដោយរដ្ឋាភិបាលតែម្នាក់ឯងនេះ មិនទាន់ទទួលបាន នូវការទុកចិត្ត ពីបណ្ដាសកម្មជនព្រំដែនកម្ពុជា នោះឡើយ។ រីឯមន្ត្រីជាច្រើនភាគី ដែលបានចូលរួមពិនិត្យ «ពិធីផ្ទៀងផ្ទាត់ផែនទី»នោះទៀតសោត ត្រូវបានអ្នកសង្កេតការណ៍ លើបញ្ហាព្រំដែនចាត់ទុកថា ដូចជាបានដឹក«គោ ឲ្យទៅស្ដាប់ចាប៉ី»ដូច្នេះ៕
» សូមទស្សនា និងស្តាប់ការបកស្រាយ របស់លោកនាយករដ្ឋមន្រ្តី ហ៊ុន សែន ទាំងស្រុងដូចខាងក្រោម៖
------------
------------