ហេតុការណ៍នេះ បានកើតឡើងនៅថ្ងៃទី ០៨ ខែកញ្ញា ឆ្នាំ២០១៥ វេលាម៉ោង ១៥ និង ៥០នាទីរសៀល ដែល​បង្កឡើង ដោយរថយន្តដឹកខ្សាច់ ដែលបានទៅបុកម៉ូតូ សងកូរ៉េ នៅតាមផ្លូវជាតិលេខ២ ក្នុងភូមិដំណាក់សង្កែ សង្កាត់ព្រែកកំពិស ខណ្ឌដង្កោ រាជធានីភ្នំពេញ។ គ្រោះថ្នាក់បានបណ្ដាល ឲ្យអ្នកជិះម៉ូតូទាំងពីរនាក់ ស្រ្តីជា​ប្រពន្ធបាក់ភ្លៅទាំងពីរ ចំណែកប្តី បានបាក់ឆ្អឹងដងកាំបិត។

តាមប្រភព ពីកន្លែងកើតហេតុ បានឲ្យដឹងថា គេឃើញមានប្តីប្រពន្ធពីរនាក់ខាងលើ បានជិះម៉ូតូពណ៍ក្រហម ពាក់ស្លាក លេខ ភ 6595 ស.រ 1 តាមផ្លូវជាតិលេខពីរ ទិសដៅពីលិចទៅកើត ស្របទិសជាមួយរថយន្ត ធុន ហ៊ីណូ ពណ៌សរ មានស្លាកលេខភ្នំពេញ 3B 3248 ដែលជារថយន្តដឹកខ្សាច់ បើកបរដោយ បុរស​មិនស្គាល់​អត្តសញ្ញាណ។ ប៉ុន្តែរថយន្តធំនេះ បានបើកបរក្នុងល្បឿនលឿន លុះមកចំណុចកើតហេតុ ក៏បានបុកម៉ូតូពី​ក្រោយ ពេញមួយទំហឹង ធ្វើឲ្យប្រពន្ធម្ចាស់ម៉ូតូ ខ្ទាតចូលក្រោមរថយន្ត បណ្តោយឲ្យកិនរបួសទាំងពីរនាក់ ប្ដីប្រពន្ធ។

ក្រោយពេលកើតហេតុ ប្រជាពលរដ្ឋនៅម្តុំនោះ បាននាំគ្នាហៅរថយន្តសង្គ្រោះ ដើម្បីដឹកជនរងគ្រោះ ទៅ​សង្រ្គោះ​បន្ទាន់ភ្លាមៗ នៅឯមន្ទីពេទ្យ។ រីឯសមត្ថកិច្ចចរាចរណ៍ខណ្ឌដង្កោវិញ ក៏បានមកអន្តរាគមន៍ នៅ​កន្លែង​ដែរ ហើយបាននាំយករថយន្តបង្ក និងម៉ូតូ ទៅរក្សាទុក ដើម្បីរងចាំការដោះស្រាយ នៅពេលក្រោយ៕