វីដេអូនេះ ត្រូវបានសារព័ត៌មានធំៗ នៅអ៊ឺរ៉ុបខាងលិចចាប់អារម្មណ៍ នៅក្នុងសប្ដាហ៍ចុងក្រោយនេះ និងបង្ហាញ​ឲ្យឃើញ ពីសត្វពីរក្បាល ពីងពាងពិស និងខ្យាដំរី ដែលត្រូវបានចាប់ ដាក់ចូលក្រឡមួយ ជាមួយគ្នា។ ពីងពាង​ពិសនោះ ជាប្រភេទ «Steatoda grossa» ដែលគេតែងឃើញរស់នៅ ក្នុងទ្វីបអ៊ឺរ៉ុប អាមេរិក និងនៅលើ​កោះ​អូស្ត្រាលី។ ដោយឡែកខ្យាដំរី ជាប្រភេទ «Buthidae» មកពីតំបន់ដែលក្ដៅជាងគេ នៅលើផែនដី ដូចយ៉ាង​សមុទ្រខ្យាច់ជាដើម។ មនុស្សដែលត្រូវបានសត្វទាំងពីរខាំ ឬទិច សុទ្ធតែរង នូវការចុចចាប់ខ្លាំង និងឈាន​ទៅ​មានដំបៅធំ នៅនឹងមុខរបួសនោះផង។

នៅក្នុងភាពជាសត្វតិរច្ឆាន សត្វមានពិសទាំងពីរ ជួបមុខគ្នា ត្រូវតែមានមួយស្លាប់ មួយរស់។ ដូច្នេះ វាចាំបាច់​ណាស់ ក្នុងការប្រយុទ្ធដើម្បីមានអាយុរស់រាន តទៅមុខទៀត។ បើមើលមួយភ្លែត គេច្បាស់ជាគិតថា ខ្យាដំរី មានប្រៀបជាងពីងពាង ដោយសារតែខ្យាដំរី មានដង្កៀបពីរ នៅខាងមុខ និងកន្ទុយពិសរបស់វា អាច​ត្រូវ​បាន​ប្រើ ដើម្បីវ័ធចាក់ពីងពាង ដែលមានត្រឹមតែមាត់ ដើម្បីខាំបញ្ចូល ពិសរបស់វាប៉ុណ្ណោះ។

ប៉ុន្តែ បើគេពិនិត្យមើលវីដេអូឲ្យច្បាស់ គេច្បាស់ជាផ្លាស់ប្ដូរ ទស្សនៈ​ចំពោះពីងពាងមិនខាន។ គេមិនត្រូវមើល​ងាយពីងពាង ដែលអាចប្រើសសៃសូត្រ ចេញពីគូទរបស់​វា ដើម្បី​យកមករំព័ទ្ធសត្រូវរបស់វា កុំឲ្យរើខ្លួនរួច​នោះ​ឡើយ។ ក្នុងវីដេអូនេះ ទៅដល់ជិតចុងបញ្ចប់ គេនឹង​ឃើញ ខ្យាដំរី​បានកំក្រើកខ្លួនលែងរួច ដោយសារខ្លួនវា ត្រូវ​បានសរសៃសូត្រ ដ៏ស្អិុតរបស់ពីងពាងព័ទ្ធជុំជិត បើ​សូម្បី​កន្ទុយវ័ធរបស់វាក៏ដោយ។

រីឯពីងពាងវិញ ក៏មិនអាចត្រេកអរ នឹងជ័យជំនះរបស់ខ្លួនវាបានដែរ ព្រោះនៅមុនពេលវាបានព័ទ្ធ​សរសៃ​សូត្រ​រំ​ខ្យាដំរី កម្រើកខ្លួនលែងរួចនោះ ខ្លួនវាបានរងនូវការទិច ជាច្រើនទ្រនិច​ របស់ខ្យាដំរីរួចទៅហើយ។ នៅលើខ្នង​ពីងពាង មាន​ស្នាម​ប្រហោង​ ដែលជាស្នាមវ័ធកន្ទុយទិចទាំងនោះ របស់ខ្យាដំរី។ គឺដោយសារ​ប៉ុន្មាន​ក្បាច់​ដំបូង របស់​ខ្យាដំរី​នេះ​ហើយ ដែលបាន​ធ្វើ​ឲ្យ​ពីងពាង​​នៅចុង​បញ្ចប់ បានស្លាប់ដូចគ្នា៕