មន្ត្រីរដ្ឋាភិបាល ជាពិសេសលោក វ៉ា គឹមហុង ប្រធានគណៈកម្មាធិការចម្រុះខណ្ឌសីមា និងបោះបង្គោល​ព្រំដែន​កម្ពុជា  សុទ្ធតែអះអាងថា ខ្សែបន្ទាត់ ដែលមានក្នុងផែនទី មកពីបារាំង «ត្រួតស៊ីគ្នា» នឹងខ្សែរបន្ទាត់ របស់​ផែនទី របស់រដ្ឋាភិបាល ដែលកំពុងតែប្រើប្រាស់សព្វថ្ងៃ។ ជាមួយគ្នានេះ ការផ្ទៀងផ្ទាត់ផែនទីមកពី UN ក៏ត្រូវ​បាន​អះអាងថា ដូចគ្នានឹងផែនទីរដ្ឋាភិបាលដែរ។ ការថ្លែងរបស់មន្ត្រីជាន់ខ្ពស់រដ្ឋាភិបាល បាន​ធ្វើឡើង​សឹង​​តែ​រាល់​លើក ជារៀងនៅក្រោយ ការផ្ទៀងផ្ទាត់ផែនទីនានា នៅវិមានសន្តិភាព (វិមានរដ្ឋាភិបាល)។

ការអះអាងខាងលើ របស់លោក វ៉ា គឹមហុង មិនបានធ្វើឲ្យមន្រ្តី និងអ្នកគាំទ្រមួយចំនួន នៃក្រុមប្រឆាំង អស់ចិត្ត​នោះឡើយ ព្រោះតែបញ្ហាផ្ទៀងផ្ទាត់ផែនទីនេះ មិនបានបង្ហាញ ពី«ការពិត» ថាតើនៅតាម​ព្រំដែន មានការ​បាត់​បង់ដីឬអត់។ តាមលោក គង់ គាំ ប្រធានគណបក្ស សម រង្ស៊ី បានបង្ហាញ នូវទស្សនៈផ្ទាល់ខ្លួន​ថា បើទោះបី​ជា​ផែនទី ដែលបានទទួលមកពី UN ឬ ពីប្រទេសណាផ្សេងទៀត ដូចគ្នានឹងផែនទី របស់​រដ្ឋាភិបាល​ក៏ដោយ វា​មិន​មែន​ជាកិច្ចសំខាន់ ដែលត្រូវយកចិត្តទុកដាក់នោះឡើយ។ លោកស្នើឲ្យភាគីទាំងអស់ គួរឈប់​ឈ្លោះ​គ្នា ដោយ​ទទួល​យកនូវផែនទី ដែលបានមកពី UN និងពីបណ្តាប្រទេសផ្សេងៗ ដែលរដ្ឋាភិបាលអះអាង​ថា​ដូចគ្នានោះ មក​ប្រើ​ជំនួស​វិញ។

ក្នុងកិច្ចសម្ភាសរបស់លោក ជាមួយនឹងបណ្តាញព័ត៌មាន ក្នុងស្រុកមួយ លោក គង់ គាំ បានលើកឡើងថា៖ «ប្រសិន​បើ​អ្នកអញ្ជើញ ទៅផ្ទៀងផ្ទាត់ចម្រុះ ពីសមាសភាពផ្សេងៗ ហើយឃើញថាផែនទី ពីបារាំងមក ដូច​ផែនទី​របស់​រដ្ឋាភិបាល សូមឲ្យអនុវត្តផែនទីរបស់បារាំង ជាជាងផែនទីរបស់រដ្ឋាភិបាល ដែលមានត្រា​វៀតណាម តាំងពីឆ្នាំ​១៩៨២, ១៩៨៣, ១៩៨៥។ (...) ព្រោះវាផ្ទុយពីកិច្ចព្រមព្រៀង ទីក្រុងប៉ារីស។»

សម្រាប់លោក សុខ ទូច កាលពីថ្ងៃទី៣ ខែកញ្ញា ម្សិលម៉ិញនេះ ក៏បានលើកឡើងថា លោកនៅមិនទាន់ជឿជាក់ និងទទួលស្គាល់ ឬកាន់ជើងភាគីណាម្នាក់ឡើយ ទោះបីការពិនិត្យនោះឃើញថា ផែនទីដូចគ្នាក៏ដោយ។ លោក​អះអាងនៅវិមានសន្តិភាព ជាមួយអ្នកសារព័ត៌មានថា សម្រាប់ក្រុមលោក កិច្ចចាំបាច់នៃការកំណត់ថា​«ជឿជាក់ ឬមិនជឿនោះ» នឹងបានដឹងក្រោយពេល ដែលក្រុមរងារលោក បានចុះដល់ផែនដី ហើយធ្វើការ​ផ្ទៀងផ្ទាត់​ផ្ទាល់។ លោកបានអះអាងថា ឯលទ្ធផលយ៉ាងណានោះ លោកនឹងសុំរយៈពេលពីរឆ្នាំ ក្នុងការផ្ទៀងផ្ទាត់​ភាព​ជាក់ស្តែង នៃផែនទីនិងផែនដីទាំងនេះ។

ផ្ទុយនឹងការលើកឡើង របស់លោក គង់ គាំ ខាងលើ លោក សុខ ទូច បានអះអាងជាលើកទីពីរថា៖ «មានតែ​ផែនទីរាជរដ្ឋាភិបាលទេ ដែលអាចប្រើប្រាស់ ក្នុងការបោះបង្គោលខណ្ឌសីម៉ាបាន។ ព្រោះជាផែនទីផ្លូវច្បាប់ ដែលមានកត្តាបីយ៉ាង អាចទទួលយកបាន។ ទីមួយមូលដ្ឋានច្បាប់, ទីពីរការឯកភាពគ្នា រវាងភាគីវៀតណាម និងភាគីកម្ពុជា, ទីបី ព្រះមហាក្សត្រ បានឡាយព្រះហស្ថលេខា។»

យ៉ាងណា ការលើកឡើងរបស់លោក សុខ ទូច ត្រូវបានមន្រ្តីជាន់ខ្ពស់ នៃគណបក្សសង្គ្រោះជាតិម្នាក់ បាន​លើក​ឡើងថា ពិតជាអន្ទង់វែង ប្រើឆ្នាំងវែងមែន។ មន្រ្តីរូបនេះបានបន្តថា ការរង់ចាំការវាងវែងរបស់លោក សុខ ទូច ខណៈរដ្ឋាភិបាល កំពុងមានគម្រោងបន្តការបោះបង្គោល ជាមួយនឹងវៀតណាមនោះ តើគិតយ៉ាងណា បើ​រដ្ឋាភិបាលបានបង្ហាញជំហរថា នឹងមិនមានការផ្អាក ការបោះបង្គោល ព្រំដែនកម្ពុជា-វៀតណាម ផងនោះ?

ថ្លែងដោយសុំមិនបញ្ចេញឈ្មោះ មន្រ្តីដដែលនោះបានចោទសួរថា តើរយៈពេលចុះពិនិត្យ អង្កេត និងវាស់វែង រយៈពេលពីរឆ្នាំនោះ លោក សុខ ទូច អាចស្នើរដ្ឋាភិបាល ឲ្យផ្អាកជាបណ្តោះអាសន្ន នៃការបោះបង្គោល​ព្រំដែន បន្តរជាមួយនឹងភាគីវៀតណាម បានដែរឬទេ? លោកសង្កត់ធ្ងន់ថា៖ «បើអាច នោះការអះអាង​របស់​លោក សុខ ទូច អាចទទួលយកបាន។ តែបើមិនអាចទេ កុំអន្ទង់វែងឆ្នាំងវែង ស្នើទៅប្រទេសបារាំង សុំកំណត់​ហេតុ ស្តីពីការវាស់វែងដោយផ្ទាល់ដៃ នៃក្រុមអាជ្ញាធររដ្ឋបាលបារាំង (គ្រប់គ្រង) ជំនាន់នោះ មកពិនិត្យ និង​ផ្ទៀង​ផ្ទាត់តែម្តងទៅ ជាការស្រេច ហើយទាន់ពេលផង។»

ដោយឡែកលោក ផៃ ស៊ីបាន អ្នកនាំពាក្យទីស្ដីការគណៈរដ្ឋមន្ត្រី បានលើកឡើងថា ការផ្ទៀងផ្ទាត់ផែនទីដទៃ ជាមួយផែនទីរដ្ឋ គ្រាន់តែជាកិច្ចគួបផ្សំ មិនមែនជាការចាំបាច់ទៀតទេ។ លោកបានពាំនាំពាក្យ របស់​លោក​នាយក​រដ្ឋមន្រ្តី ហ៊ុន សែន  ដែលបានថ្លែងលើកឡើង នាព្រឹកថ្ងៃទី០៤ ខែកញ្ញា ឆ្នាំ២០១៥ ក្នុងកិច្ចប្រជុំ​គណៈ​រដ្ឋមន្ត្រី មកបញ្ជាក់ថា៖ «ការងារផ្ទៀងផ្ទាត់ផែនទី ជាការងារបំភ្លឺ ដល់ប្រជាពលរដ្ឋខ្មែរទាំងអស់»។

អ្នកនាំពាក្យរូបនេះ លើកឡើងហាក់ចង់ព្រមានថា៖ «គណបក្ស CNRP គួរមានភាពស្មោះត្រង់នឹងប្រជាជាតិ ចំពោះករណីផែនទីនេះ ដើម្បីផលប្រយោជន៍ប្រជាជាតិរួម។ (...) ក៏ប៉ុន្តែ ភាពល្ងង់ខ្លៅដទៃទៀត របស់អ្នកមាន​និន្នាការប្រឆាំង ឬប្រើប្រាស់ ដើម្បីផលប្រយោជន៍ប្រជាភិថុត ឬនយោបាយនោះ ក៏ត្រូវតែបញ្ចប់ហើយ។ ដែន​សមត្ថកិច្ច និងការអនុវត្តច្បាប់ ចំពោះការងារព្រំដែន ត្រូវតែបន្តម៉ឺងម៉ាត់ និងគ្មានការយោគយល់។»

លោក ផៃ ស៊ីផាន ថាលោកនាយករដ្ឋមន្រ្តី សូមធ្វើការរំលឹក ដល់ក្រុមដែលលោក បានហៅថា«ខ្លៅ» ចំពោះ​ការងារទាំងអស់នេះថា៖ «ការដោះស្រាយការងារព្រំដែន ជាមួយថៃ គឺតាមរយៈអនុសារណៈយោគយល់គ្នា ឆ្នាំ២០០០ ជាមួយនឹងផែនទីកម្ពុជា-ថៃ ដែលផលិតតាមរយៈ អនុសញ្ញា១៩០៤ និង១៩០៧ ជាមួយផែនទី​ខ្នាត ១/២០០.០០០។ ជាមួយឡាវ គឺ(ផលិត)ឆ្នាំ១៩៩៥ លើផែនទីខ្នាត ១/១០០.០០០។ ឯជាមួយវៀតណាម (ផលិត) ឆ្នាំ១៩៨៥ លើផែនទីខ្នាត១/១០០.០០០។ រឿងផ្ទៀងផ្ទាត់ផែនទី ចប់ហើយ ការងារនីតិរដ្ឋ ត្រូវតែបន្ត​ដោយម៉ឹងម៉ាត់។»៕