នាវិមានសន្តិភាព លោក សុខ ទូច បានលើកឡើងថា ផែនទីដែលកម្ពុជា ទទួលបានពីបារាំង និងដែលត្រូវ​បាន​ផ្ទៀងផ្ទាត់ កាលពីថ្ងៃទី៣ ខែកញ្ញានេះ មិនមែនជាផែនទីរបស់សម្តេចតា (ព្រះបរមរតនកោដ្ឋ) ជាអ្នកយក​ទៅ​ដំកល់ទុក នៅបារាំងឡើយ តែជាផែនទីគូសវាស ដោយបារាំង កាលដែលខ្លួន នៅគ្រប់គ្រងលើកម្ពុជានោះ។

ប្រធានក្រុមស្រាវជ្រាវ បញ្ហាព្រំដែន នៃរាជបណ្ឌិតសភាកម្ពុជា ដែលជាសេនាធិការមួយ របស់រដ្ឋាភិបាល​កម្ពុជា  បានបន្ថែមថា ផែនទីដែលកម្ពុជាទទួលបាន ពីបារាំងនោះ គ្រាន់តែជាផែនទី សម្រាប់ការផ្ទៀងផ្ទាត់ ជាមួយនឹងផែនទីផ្លូវការ របស់កម្ពុជាប៉ុណ្ណោះ។ លោកថា មានតែផែនទីផ្លូវការរបស់កម្ពុជាទេ ដែលអាចយក​ជាផ្លូវការ សម្រាប់ការវាស់វែង និងកំណត់បញ្ហាព្រំដែន កម្ពុជា-វៀតណាម តាមផ្លូវច្បាប់បាន។

ក្នុងកិច្ចសម្ភាស ជាមួយអ្នកសារព័ត៌មាន លោក សុខ ទូច បានថ្លែងអះអាងថា ថ្ងៃទី៣ ខែកញ្ញានេះ ជាថ្ងៃដែល​កម្ពុជា បានបញ្ចប់នូវភាព«សង្ស័យ» របស់អ្នកនយោបាយ ឬអ្នកសារព័ត៌មាន ពីបញ្ហាប្រើប្រាស់ផែនទី ក្នុង​ការ​កំណត់ព្រំប្រទល់ ជាមួយនឹងប្រទេសជិតខាង។ អ្នកស្រាវជ្រាវបញ្ហាព្រំដែនរូបនេះ បានពន្យល់ថា៖ «ផែនទី​បារាំង គ្រាន់តែមកផ្ទៀងផ្ទាត់ (ផែនទី) របស់រាជរដ្ឋាភិបាលទេ។ ព្រោះផែនទីរាជរដ្ឋាភិបាលមានកត្តាបី ទីមួយ​មូលដ្ឋានច្បាប់ ទីពីរការឯកភាពគ្នា រវាងភាគីវៀតណាម និងភាគីកម្ពុជា ទីបីគឺ ព្រះមហាក្សត្របានឡាយ​ព្រះហស្ថ។»

ឯលោក អ៊ូ ច័ន្ទរិទ្ធិ ហាក់ដូចជាមិនទាន់ទទូលយក នូវលទ្ធផល នៃការផ្ទៀតផ្ទាត់នេះឡើយ។ តំណាងរាស្រ្ត មក​ពីគណបក្សសង្គ្រោះជាតិរូបនេះ ដែលមានវត្តមាន ក្នុងការផ្ទៀងផ្ទាត់ផែនទីទាំងឡាយ របស់រាជរដ្ឋាភិបាល ជា​មួយនឹងផែនទី មកពីប្រទេសបារាំងនោះ បានលើកឡើងថា មកដល់ពេលនេះ គណបក្សសង្គ្រោះជាតិ កំពុង​ស្ថិតនៅក្នុងការប្រម៉ែប្រមូលផែនទី នៅឡើយដែរ។ លោកបានបន្តថា ការផ្ទាងផ្ទាត់ជាថ្មី អាចនឹងកើតមាន ក្រោយ​ការប្រមូលរួចរាល់ (ចប់) នឹងក្រោយពីទទួលបាន ការអនុញ្ញាតពីរដ្ឋាភិបាលនោះ។

មន្ត្រីតំណាងគណបក្ស បានថ្លែងទៀតថា៖ «បញ្ហាព្រំដែន បញ្ហាផែនទី បញ្ហាទឹកដី ជា “បញ្ហា” របស់ខ្មែរគ្រប់​រូប។ បើនៅតែមានបញ្ហា យើងនៅតែបន្តរលើបញ្ហានេះ ដើម្បីឲ្យប្រជាពលរដ្ឋលោកជ្រាបច្បាស់ ដូចខ្ញុំ​បញ្ជាក់​ហើយ មិនមែនជារឿង របស់បុគ្គលណាម្នាក់ទេ។»

រដ្ឋមន្ត្រីការបរទេស លោកឧបនាយករដ្ឋមន្ត្រី ហោ ណាំហុង ដែលជាប្រធានគណៈកម្មការ ចំពោះកិច្ច​សម្រប​សម្រួល ការងារទទួល និងផ្ទៀងផ្ទាត់ផែនទីដែរនោះ បានបញ្ជាក់ថា នេះជាលើកចុងក្រោយ ក្នុងការផ្ទៀងផ្ទាត់​ផែនទីព្រំដែន កម្ពុជា-វៀតណាម ហើយ។ លោកបានបន្តថា រដ្ឋាភិបាលនឹងមិនទទួល នូវសំណើរអ្វីផ្សេង​ពី​នេះ សម្រាប់ការផ្ទៀតផ្ទាត់ផែនទីនេះ ទៀតឡើយ។

ជាមួយនឹងការបញ្ចាប់ ទទួលការផ្ទៀងផ្ទាត់នេះ ក្នុងនាម​លោក តំណាងឲ្យលោកនាយករដ្ឋមន្រ្តី ហ៊ុន សែន លោក ហោ ណាំហុង បានស្នើឲ្យគណបក្ស នយោបាយ បញ្ចប់សកម្មភាព​របស់​ខ្លួន ក្នុងរឿងព្រំដែន ហើយងាក​មក​ធ្វើ​កម្មវិធី​នយោបាយ ដើម្បីទទួលការគាំទ្រ និងទទួលការបោះឆ្នោត ពី​ប្រជា​ពលរដ្ឋ​វិញ៕