ប្រភពពីកន្លែងកើតហេតុ បានឲ្យដឹងថា បុរសរងគ្រោះឈ្មោះ ឈាវ ស៊ីដេត អាយុ៤០ឆ្នាំ មានមុខរបរ ជាអ្នក​បើក​ឡាន ដឹកសម្ភារៈជីកដី។ នៅមុនពេលកើតហេតុ គេឃើញនៅយប់ថ្ងៃទី២៧ ខែសីហានោះ បុរសរងគ្រោះ អង្គុយ​ស៊ីផឹក ជាមួយមិត្តភក្កិ នៅក្នុងហាងមួយកន្លែង ជិតបូរីសែនមនោរម្យ។ មួយសន្ទុះក្រោយមក បុរសរងគ្រោះ​ដើរចេញ ពីហាងទៅកន្លែងស្នាក់នៅ ស្រាប់តែដើរបានពាក់កណ្តាល ផ្លូវមានរថយន្តមួយគ្រឿង សេរីឆ្លាម ពណ៍ ស្ករ បើកតាមបុរសរងគ្រោះពីក្រោយ។ បន្តិចក្រោយមក ឡានបង្កបានបើកគៀរបុរសនោះ ឲ្យដួលទៅផ្លូវ មុន​នឹង​មនុស្សមួយក្រុម ដែលដើរចេញពីរថយន្ត បានយកដែករឹង (ដែកឆាប) ចាក់ទៅលើខ្លូនជនរងគ្រោះ បណ្តាល​ឱ្យ​រងរបួសជាទម្ងន់ នៅកន្លែងកើតហេតុ។

សាក្សីបានបន្តទៀតថា ដោយភាពឈឺចាប់បន្ទាប់ពីត្រូវរបួស ជនរងគ្រោះ  បានស្រែកឱ្យអ្នកនៅជិតខាង ជួយ​អន្តរាគមន៍ អ្នកទាំងនោះ បានបញ្ជូនជនរងគ្រោះ ទៅមន្ទីពេទ្យក្បែរកន្លែងកើតហេតុ ដើម្បីសង្គ្រោះជីវិត។ ក្រុម​អ្នកជួយសង្គ្រោះ បានឲ្យដឹងថា ជនរងគ្រោះត្រូវរបួស ធ្ងន់ត្រង់ពោះ មានឈាមច្រើនចេញមកភ្លាមៗ។ ជន​សង្ស័យ ជាអ្នកប្រព្រឹត្តម្នាក់ ក្នុងចំណោមមនុស្សមួយក្រុម ដែលជិះឡានមកតាមចាក់បុរសរងគ្រោះ នៅលើផ្លូវ​ជាតិ​លេខ៤ ទល់មុខបូរីសែនមនោរម្យនេះ បាននាំគ្នីគ្នាបើកឡាន គេចខ្លូនបាត់ស្រមោល បន្ទាប់ពីធ្វើ​សកម្មភាព​រួច។

មន្ត្រីនគរបាល ដែលចុះអន្តរាគមន៍ ក្នុងករណីគ្រោះថ្នាក់នេះ បានឲ្យដឹងថា គេនៅសង្ស័យនៅឡើយ ពីបញ្ហា​ចុះ​មកធ្វើឃាត កណ្តាលផ្លូវទាំងយប់នេះ រហូតដល់ម៉ោង២៣ ថ្ងៃដដែល។ លោកបន្ថែមថា ទោះជាហេតុការណ៍នេះ មិនទទួលបានអត្តសញ្ញាណ ជនបង្ករក៏ដោយ តែមន្រ្តីនគរបាលនៅបន្តស៊ើបអង្កេតបន្ថែម ពីរឿងនេះ នៅពេល​ជន​រងគ្រោះ បានសះស្បើយ៕