ប្រធានអង្គភាពប្រឆាំង អំពើពុករលួយ លោក ឱម យ៉ិនទៀង បានបង្ហាញថា ការប្រឡងសញ្ញាបត្រ មធ្យម​សិក្សា​ទុតិយភូមិឆ្នាំ២០១៥នេះ ចំនួនអ្នកសង្កេតការណ៍ មានជិតប្រាំមួយពាន់នាក់ (៥.៦២៥ នាក់) ក្នុងនោះ មានព្រះសង្ឃចូលរួម ប្រមាណជាងមួយរយអង្គ (១២៧ អង្គ) ដែលនឹងត្រូវចំណាយថវិការ ប្រមាណជាង​ដប់​ប្រាំម៉ឺនដុល្លា (១៥ម៉ឺនដុល្លារ) ជាបន្ទុករបស់ក្រសួងសេដ្ឋកិច្ច និងហិរញ្ញវត្ថុ។

ដោយឡែក រដ្ឋមន្រ្តី រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួន ណារ៉ុន បានថ្លែងក្នុងកម្មវិធីនោះថា ការប្រឡងបាក់ឌុប នៅឆ្នាំ២០១៥នេះ ខាងក្រសួង បានធ្វើការកែទម្រង់ជាច្រើន ពិសេសការរឹតបណ្តឹង នូវការ​លួចចម្លងគ្នា ការលបមើលគ្នា ការទទួលនូវឯកសារពីខាងក្រៅ និងការសូក ដល់គ្រូៗទទួលបន្ទុក តាមមណ្ឌល ឬបន្ទប់ប្រលងជាដើម ជាមួយនឹងការកំណត់វិន័យ និងទោសទណ្ឌ។ លោកបន្តថា ការដែលក្រសួងដាក់ចេញ នូវវិធានការនេះ ដើម្បីឲ្យសិស្សទាំងអស់ ខិតខំពង្រឹងនូវសមត្ថភាព និងគុណភាព នៃចំណេះដឹងរបស់ខ្លួន ដោយ​ខ្លួនឯង ហើយក៏ដើម្បីចូលរួមប្រកួតប្រជែង ជាមួយបណ្តាយុវជន នៃប្រទេសជាសមាជិក សមាគម​អាស៊ាន​ដែរ។

រដ្ឋមន្រ្តីរូបនេះអះអាងថា ឆ្នាំនេះ «អ្នកចេះ គឺជាប់»។ មានន័យថា គ្រប់អ្នកមានសមត្ថភាពទាំងអស់ នឹងប្រលង​ជាប់ ព្រោះការប្រឡងនេះ មានលក្ខណៈតឹងរ៉ឹងបំផុត។ លោកបានអះអាងបន្តថា ទាំងកូនអ្នកក្រ ទាំងកូន​អ្នក​មាន (ប្រាក់ និងអំណាច) ចាំបាច់ត្រូវទទួលបាន នូវភាពស្មើមុខគ្នា នាពេលប្រលង ប្រកបដោយសមត្ថភាព លទ្ធភាព សំដៅនូវសុក្រឹតភាព និងតម្លាភាពសម្រាប់គ្រប់បេក្ខជនប្រលង។

លោក ហ៊ុន ម៉ានី (កូនប្រុសលោកនាយករដ្ឋមន្ត្រី ហ៊ុន សែន) ប្រធានសហភាពសហព័ន្ធយុវជនកម្ពុជា បាន​លើកឡើងថា ការចូលរួមសង្កេតការ នៃអ្នកស្មគ្រចិត្តនៃក្រុមយុវជននេះ ដោយព្យាយាមជម្រុញ ឲ្យមាន​ការ​ពង្រឹងសមត្ថភាពនៃយុវជន ឲ្យស្របតាមពាក្យស្លោក របស់រដ្ឋមន្រ្តីក្រសួងអប់រំ ដែលបានលើកឡើងថា «អ្នក​ចេះ នឹងប្រឡងជាប់»។ លោកបន្តថា ការចូលរួម នៃក្រុមយុវជននាពេលនេះ ចង់ចូលរួមកិច្ចការសង្គម ដើម្បី​ពង្រឹងដល់គុណភាពអប់រំ ដល់យុវជនជំនាន់ក្រោយៗ ក្នុងការចូលរួមប្រកួតប្រជែង ជាមួយនឹងបណ្តាយុវជន នៃប្រទេសជាសមាជិកអាស៊ាន និងពិភពលោក។

សូមរំលឹកដែរថា នាថ្ងៃទី២៤ ខែសីហា ឆ្នាំ២០១៥ ខាងមុខ ការប្រឡងសញ្ញាបត្រ«ទុតិយភូមិ» ប្រចាំ​ឆ្នាំ​២០១៥ និងត្រូវចាប់ផ្តើម។ ក្រសួងបានដាក់ចេញ នូវវិន័យ និងទោសទណ្ឌដល់គ្រូ និងសិស្សដែលគេ (ក្រសួង ឬអ្នក​សង្កេតការណ៍ ឬមន្រ្តីនៃអង្គភាពប្រឆាំងអំពើពុករលួយ) រកឃើញថា បានប្រព្រឹត្តិនូវភាព​មិនប្រក្រតី​ណា​មួយ ក្នុងដំណាក់កាលនៃការប្រលងនេះ៕