តើនរណាមួយដែលសុខចិត្ត ឲ្យចោរប្លន់ ចូលមកប្លន់យកទ្រព្យរបស់ខ្លួន បានដោយងាយនោះ? ចម្លើយ៖ ពិត​ជាមិនសុខចិត្តទេ។ តែលក្ខណៈពិសេសនៅក្នុងករណីនេះ គឺភាពក្លាហាន របស់បុរសម្ចាស់យានដ្ឋានម្នាក់នេះ ដែលធ្វើឲ្យអ្នកផង ទ្រាំមិនស្ងើចសរសើរមិនបាន។ ហេតុការណ៍ បានកើតឡើង នៅក្នុងក្រុង «OAKLAND PARK» ក្នុងរដ្ឋផ្លរីដា សហរដ្ឋអាមេរិក កាលពីថ្ងៃចន្ទមកនេះ។

ទោះជាក្រុមចោរ បានប្រាប់ឲ្យក្រាប រាបដល់ដីក៏ដោយ ប៉ុន្តែលោក Andrew Hepburn ម្ចាស់យានដ្ឋាន អាយុ​៣៩ឆ្នាំ នៅតែរកឱកាសដើម្បីងើបមកតដៃ ជាមួយនឹងក្រុមចោរវិញ។ នៅក្នុងពេលដែល​មាន ​ការប្រតាយ​ប្រតប់​គ្នានោះ ចោរម្នាក់ទៀតបានចូលមកវិញ និងបានផ្ទុះអាវុធជាច្រើនគ្រាប់ផង តែទំនងជាមិនអាចប្រឈម នឹងម្ចាស់យានដ្ឋានបាន ទើបចាំបាច់គេចខ្លួន និងទុកគ្នីគ្នារបស់ខ្លួនម្នាក់ នៅទីនោះ។

ចោរម្នាក់ដែលត្រូវបានចាប់ខ្លួននោះ មានឈ្មោះ Conrad Bloomfield អាយុ ៣៦ឆ្នាំ ត្រូវបានម្ចាស់យានដ្ឋាន ចាប់បញ្ជូនទៅឲ្យនគរបាល។ Conrad Bloomfield ត្រូវបានចោទប្រកាន់ ពីបទប្លន់ប្រដាប់អាវុធ និងបទ​ប៉ុនប៉ង​ធ្វើមនុស្សឃាត។ រីឯគូកនម្នាក់ទៀត កំពុងត្រូវបាននគរបាល ស្វែងរកចាប់ខ្លួន៕