ករណីចង់កសម្លាប់ខ្លួននេះ បានកើតឡើង នៅវេលាម៉ោង ប្រមាណជា១៥ និង៣០នាទីល្ងាច ថ្ងៃទី១៧ ខែសីហា ឆ្នាំ២០១៥ ហើយបានបង្កការភ្ញាក់ផ្អើល ដល់ប្រជាពលរដ្ឋដែលរស់នៅ ជុំវិញកន្លែងកើតហេតុ។ បុរសជា​អាជីវករ​លក់ ស្បែក​ជើងមួយរូប នៅផ្សារអូឡាំពិក បានចង់ករសម្លាប់ខ្លួន ដោយមិនដឹងមូលហេតុ​ច្បាស់​លាស់។ ហេតុ​ការណ៍​នេះ កើតនៅផ្ទះជួលលេខ ៧៩E3 តាមបណ្តោយផ្លូវលេខ១៦៤ កែងផ្លូវ លេខ១០៩ ក្នុង​សង្កាត់​​អូឬស្សី​ទី៣ ខណ្ឌ​៧មករា រាជធានីភ្នំពេញ។

បើតាមសំដីរបស់ម្ចាស់ផ្ទះ ឈ្មោះ យៀវ គៀង បានឲ្យដឹងថា ជនរងគ្រោះជាអាជីវករលក់ស្បែកជើង ផ្សារ​អូឡាំពិក រស់នៅជាមួយប្រពន្ធ និងកូនឈ្នូល ២នាក់ ហើយព្រលឹមឡើងពួកគេទៅបាត់ យប់បានមកផ្ទះ​។ ចំណែក​ជនរងគ្រោះ តែងតែយកបាយទៅឲ្យ នៅម៉ោង ៨ ឬ ៩ ជារៀងរាល់ថ្ងៃ។ លុះដល់ថ្ងៃកើតហេតុ ម្ចាស់​ផ្ទះ​បានជួបនឹងជនរងគ្រោះ នៅពេលព្រឹកដែរ ស្រាប់តែដល់ពេលថ្ងៃ ក៏លឺថាជនរងគ្រោះចង់កសម្លាប់ខ្លួន ក្នុង​បន្ទប់​ទឹក ស្លាប់បាត់ទៅហើយ ទាំងមិនដឹងមូលហេតុច្បាស់លាស់។ គាត់បានបញ្ជាក់ថា ជនរងគ្រោះ មាន​ស្រុក​កំណើត​នៅព្រែកពោធិ៍។

ក្រោយពេលរកឃើញបុរសរងគ្រោះ ប្រជាពលរដ្ឋបានទូរស័ព្ទហៅ រថយន្តសង្រ្គោះបន្ទាន់ និងសមត្ថកិច្ច​ដើម្បី​ជួយជនរងគ្រោះ តែគួរឲ្យស្តាយជនរងគ្រោះ បានដាច់ខ្យល់ស្លាប់បាត់ទៅហើយ។

តាមសំដី របស់មន្ត្រីសមត្ថកិច្ច បានអះអាងដែរថា បុរសជនរងគ្រោះ ដែលមានឈ្មោះ តាំង ហ្គិចឡាយ អាយុ​​៤០ឆ្នាំ ពិតជាបានចង់កសម្លាប់ខ្លួន ក្នុងបន្ទុប់ទឹកខ្លួនឯង។ តែមន្ត្រីសមត្ថកិច្ចទាំងនោះ នៅតែមិនទាន់ដឹងពី​មូលហេតុដែលបណ្ដាល ឲ្យបុរសនេះគិតខ្លីដូច្នេះឡើយ។ ក្រោយពីធ្វើកោសល្សវិច្ច័យរួច ក្រុមសមត្ថកិច្ចបាន​ប្រគល់សាកសព អោយទៅក្រុមគ្រួសារ ដើម្បីយកទៅធ្វើបុណ្យតាមប្រពៃណី នៅស្រុកកំណើត​របស់ខ្លួន៕