ប្រធានក្រុមស្រាវជ្រាវនៃរាជបណ្ឌិត្យសភាកម្ពុជា លោក សុខ ទូច បានធ្វើការអះអាង នៅមុខអ្នកសារព័ត៌មាន និងតំណាងមកពីភាគីទាំង៦ថា ផែនទាំង២៦ផ្ទាំង ដែលទទួលបានពី ក្រុមទាំងបីផ្សេងៗនោះ ភាគច្រើនត្រូវគ្នា​ទាំងអស់ លើកលែងតែបែបទីមួនផ្ទាំង ដែលទទួលបានពីគណបក្សសង្គ្រោះជាតិទេ ដែលនៅមានការខ្វះខាត​ចំនួនពីផ្ទាំង ជាន់គ្នាមួយផ្ទាំង និងមួយផ្ទាំងទៀត មិនអាចយកជាការ ព្រោះជាផែនទី បង្ហាញពីដីវៀតណាម។

លោកបានបញ្ជាក់ថា ផែនទីដែលគណបក្សសង្គ្រោះជាតិខ្វះនោះ រួមមានផែនទីលេខ២ និងលេខ១៥។ ហើយ​លោកស្នើឲ្យគណបក្សមួយនេះ រកផែនទីទាំងពីរមកបង្គ្រប់ ដើម្បីធ្វើការផ្ទៀងផ្ទាត់គ្នាជាបន្ត រហូតដល់កម្ពុជា ទទួលបានផែនទីបន្ថែម ពីអង្គការសហប្រជាជាតិ នាថ្ងៃទី២០ ខេសីហា ឆ្នាំ២០១៥ ខាងមុខនេះ។

លោក សុខ ទូច ក្នុងសន្និសីទសារព័ត៌មាន ផ្ទៀងផ្ទាត់ផែនទី នាព្រឹកថ្ងៃទី១៤ ខែសីហា បានដាក់ការកត់​សម្ភាល់​ថា ទាំងផែនទីរាជរដ្ឋាផិបាល ផែនទីគណបក្សសង្គ្រោះជាតិ និងផែនទីនៃវិទ្យាស្ថាន ITM (វិទ្យស្ថាននៃ​ប្រទេស​បារាំង) ដែលរាជបណ្ឌិតសភា បានថតចម្លងមកនោះ មានត្រាតែមួយដូចគ្នា។ លោក សុខ ទូច បន្ថែមថា ផែនទី​របស់រដ្ឋាភិបាល ប្រើប្រាស់បច្ចុប្បន្ន មាន២៦ផ្ទាំង អាចយកជាការចំនួន២៦ផ្ទាំង។ ឯផែនទីរបស់​គណបក្ស​សង្គ្រោះ​ជាតិ មាន២៦ផ្ទាំងដូចគ្នា តែយកជាការបាន តែ២៣ផ្ទាំងប៉ុណ្ណោះ ក្នុងនោះនៅខ្វះពីរផ្ទាំង ច្រឡំមួយ​ផ្ទាំង និងជាន់គ្នាមួយផ្ទាំង។ លោកបានស្នើ ឲ្យគណបក្សសង្គ្រោះជាតិ រកផែនទីពីរផ្ទាំងទៀត ដើម្បីផ្ទៀងផ្ទាត់ ជាមួយ​ផែនទីរាជរដ្ឋាភិបាល។

លោក អ៊ូ ចាន់រិទ្ធិ តំណាងឲ្យគណបក្សសង្គ្រោះជាតិ បានធ្វើការអះអាងចំពោះមុខអ្នកសារព័ត៌មានថា គណបក្ស​សង្គ្រោះជាតិ មិនដែលបានចោទប្រកាន់ លើរាជរដ្ឋាភិបាលបច្ចុប្បន្ននេះ ថាបានប្រើប្រាស់ផែនទីក្លែង​ក្លាយទេ។ លោកបន្តថា ក្រុមការងារនៃគណបក្សសង្គ្រោះជាតិ ស្វែងរកផែនទីចំនួនពីរ ដែលមិនមាននោះ មកប្រគល់​ជូន​រាជបណ្ឌិតសភា​ នាពេលឆាប់ៗខាងមុខនេះ។ លោក ចាន់រិទ្ធិ បានថ្លែងឲ្យដឹងថា៖ «ខ្ញុំនឹងជម្រាបទៅ​ខាង​គណបក្ស ដើម្បីស្រាវជ្រាវ ស្វែងរកពីផ្ទាំង បន្ថែមទៀត ដើម្បីបង្គ្រប់ទាំង២៦ផ្ទាំង។ (...) យើងមិនអាចកំណត់​ពេលទេ តែយើងព្យាយាមបំផុត ដើម្បីដោះស្រាយលើបញ្ហានេះ។»

រីឯលោក ឈាង វុន មកពីគណបក្សប្រជាជនកម្ពុជាវិញ បានលើកឡើងថា ខាងរដ្ឋសភាមិនបានចាត់តាំង​លោក ឲ្យមកចូលរួមការងារផ្ទៀងផ្ទាត់ផែនទីនេះទេ តែលោកត្រូវបានតំណាង រាជបណ្ឌិតសភាកម្ពុជា ជាអ្នក​អញ្ជើញ​ដោយផ្ទាល់ ក្នុងនាមបុគ្គលតែប៉ុណ្ណោះ។ យ៉ាងណាលោកបានបង្ហាញ នូវជំហរយ៉ាងខ្លីថា៖ «ការផ្ទៀងផ្ទាត់​នេះ ដំណើរការទៅល្អ គ្មានទំនាស់នោះ វាជាកត្តាសំខាន់ សម្រាប់ឲ្យខាងឯកឧត្តម សុខ ទូច យកទៅធ្វើ​ការងារ​នេះ បានផលប្រយោជន៍ជូនប្រជាពលរដ្ឋយើង។»

សូមបញ្ជាក់ថា អ្នកចូលរួមពិនិត្យផែនទីទាំង២៦ផ្ទាំង មកពីគណបក្សប្រជាជនកម្ពុជានោះ មានជាអាថ៌ លោក ហ៊ុន ណេង, លោក ម៉ុង រីទ្ធី, លោក ម៉ម ប៊ុនហេង និងលោក ឈាង វុន ជាដើម។ ចំណែកតំណាង មកពី​គណបក្ស​សង្គ្រោះជាតិ រួមមាន លោក អ៊ូ ចាន់ រិទ្ធិ លោក ឡុង រី និងលោក យូ ស៊ុនហេង ជាដើម៕