ហេតុការណ៍មួយ បានបង្កការភ្ងាក់ផ្អើល ដល់អ្នកធ្វើដំណើរ នៅតាមផ្លូវបេតុងមួយ កាលពីថ្ងៃទី១១ ខែ សីហា ឆ្នាំ២០១៥ ដោយសារតែ ស្រ្តីរងគ្រោះបានស្រែកឆោរឡោឡើង និងដេញតាមចោរមួយក្រុម មានគ្នា ២នាក់ ដែលបានជិះម៉ូតូធ្វើសកម្មភាព ឆក់កាបូបរបស់គាត់ នៅពេលស្ត្រីរូបនេះ កំពុងធ្វើដំណើរតាមផ្លូវ។ ហេតុការណ៍​នេះ កើតឡើងនៅក្នុង ខណ្ឌសែនសុខ រាជធានីភ្នំពេញ បណ្តាលឲ្យស្រ្តីរងគ្រោះ របួសមុខ និងក្បាលជង្គង់​យ៉ាង​ដំណំ នៅពេលស្រ្តីរងគ្រោះដួលម៉ូតូ។

ភ្លាមៗ ក្រោយពេលកើតហេតុនោះ សមត្ថកិច្ចខណ្ឌសែនសុខ បានបញ្ជូនដំណឹងដល់កងរាជអាវុធហត្ថ ខណ្ឌ​ព្រែកព្នៅ ដើម្បីធ្វើការស្រាវជ្រាវ តាមចាប់ជនសង្ស័យ ដែលគេចខ្លួន ទៅខណ្ឌព្រែកព្នៅនោះ។ ក្រោយពេល​ធ្វើការស្រាវជ្រាវភ្លាមៗ សមត្ថកិច្ចខណ្ឌព្រែកព្នៅ ចាប់បានជនសង្ស័យ១នាក់ ពីក្នុងចំណោមជនសង្ស័យ​ពីរ​នាក់។

ស្រ្តីរងគ្រោះមានឈ្មោះ ផន សោភា មានអាយុ ៣៥ ឆ្នាំ រស់នៅក្នុងភូមិ អន្លុងក្ងាន់ សង្កាត់ខ្មួញ ខណ្ឌសែនសុខ រាជធានីភ្នំពេញ។ ចំណែកជនសង្ស័យ មានឈ្មោះ ម៉ក់ ពិសិដ្ឋ អាយុ ៣០ឆ្នាំ មានមុខរបរមិនច្បាស់លាស់ មាន​ទីលំនៅ ក្នុងភូមិត្រពាំងអញ្ចាញ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។

ក្រោយពេលចាប់ខ្លួនជនសង្ស័យបាន សមត្ថកិច្ចបានដកហូតទូរស័ព្ទ ចំនួនពីគ្រឿង និងលុយចំនួន២៥០០០​រៀល ប្រគល់ឲ្យស្រ្តីរងគ្រោះវិញ ហើយបានដកហូតម៉ូតូមួយគ្រឿង ដែលជនល្មើសជិះធ្វើសមកម្មភាព ម៉ាក ហុងដា ពណ៍ខ្មៅ ស៊េរី ២០១៥ ស្លាកលេខភ្នំពេញ 1C 8677 ព្រមទាំងកូនសោរតេឡេរថយន្តចំនួន ១ និង​គ្រឿង​ញៀន ប្រភេទម៉ាទឹកកក ១ ថង់តូចផងដែរ ពីជនសង្ស័យ។

បច្ចុប្បន្ន ជនសង្ស័យត្រូវបានសមត្ថកិច្ច ខណ្ឌព្រែកព្នៅ កសាងសំនុំរឿងដើម្បីបញ្ជូនទៅតុលាការ៕