អ្នកភូមិ នៅកន្លែងកើតហេតុថា ទង្វើរបស់មន្រ្តីគយ​ចល័ត​ទាំងនេះគ្រាន់តែដើម្បីបម្រើប្រយោជន៍​ផ្ទាល់ខ្លូន​ប៉ុណ្ណោះ គ្មានបានជួយដល់ប្រជាពលរដ្ឋនោះទេ មានតែបង្ក ឲ្យភាពភ័យខ្លាច ដល់ប្រជាពលរដ្ឋ​កើនឡើងទ្វេរ​ដង។ អ្នកភូមិបញ្ជាក់ថា ដូចជាករណីបង្កគ្រោះថ្នាក់ សម្លាប់អ្នកភូមិម្នាក់ និងរងរបួស៣នាក់ផ្សេងទៀត នៅព្រឹក​ថ្ងៃទី១០ សីហាកន្លងមកនេះ គឹដោយសារតែមន្រ្តីគយទាំងអស់នោះ ដែលទាមទារលុយ ពីម្ចាស់ថយន្តដឹក​ឥវ៉ាន់​មិនបាន ក៏តាំងដេញចាប់ នៅពេលឡានដឹកឥវ៉ាន់ (ទូរទស្សន៍...) ឃើញហេតុការណ៍មិនស្រួល ម្ចាស់ឡានបាន​បើកគេច។ រហូតដល់កន្លែងកើតហេតុ រថយន្ដនោះដែលចាប់ហ្វាំងមិនទាន់ បានបុកម៉ូតូពីរគ្រឿងពេញទំហឹង បណ្តាលឲ្យមាន មនុស្សរបួស និងស្លាប់។

ហេតុការណ៍គ្រោះថ្នាក់ ដ៏រន្ធត់ក្រឡាប់ធ្លាក់ឡាន និងខ្ទេចម៉ូតូស្លាប់មនុស្សនេះ ធ្វើឲ្យមានសម្ពាធយ៉ាងខ្លាំង ដល់​អ្នករស់នៅតាម​ បណ្តោយផ្លូវជាតិលេខ៥ ជាពិសេសនៅក្នុងកើតហេតុ ភូមិនិមិត្តទីមួយ សង្កាត់ប៉ោយប៉ែត្រ ក្រុង​ប៉ោយប៉ែត ខេត្តបន្ទាយមានជ័យនេះតែម្ដង។ អ្នកភូមិខ្លះនិយាយថា ខ្លាចមិនហ៊ានបើកបរតទៅទៀត ព្រោះបារម្ភ​ការដេញចាប់លើកក្រោយ ទៅប៉ះនឹងពួកគាត់។ អ្នកខ្លះសំនូមពរឲ្យប្រធានមន្រ្តីគយ មេត្តាឈប់ចាប់​ជំរឹត​ទារ​ប្រាក់ ពីអ្នករកស៊ីចិញ្ចិមតែក្រពះបែបនេះទៀត ព្រោះតែគ្មានលទ្ធភាព ទើបខំរកស៊ី ហើយបើត្រូវចំណាយ ឲ្យ​គយ​គ្រប់​ពេលទៀត មិនដឹងថាបានអ្វីចិញ្ចិមប្រពន្ធកូននោះទេ។

ជុំវិញការចោទប្រកាន់ របស់ប្រជាពលរដ្ឋខាងលើ  ទស្សនាវដ្តីមិនអាចទាក់ទងសុំការបំភ្លឺពីលោក ហ៊ុយ សុជាតិ មេគយនិងរដ្ឋាករក្រុងប៉ោយប៉ែតបានទេនៅពេលភ្លាមៗ ដោយទូរស័ព្ទរបស់លោកបានបិទ។ យ៉ាងណា​ក៏​ដោយ ការបើករថយន្ដគេច ពីក្រុមគយទាំងនោះ ទោះជានៅក្នុងមូលហេតុណាក៏ដោយ និងបានមកបង្កគ្រោះថ្នាក់ ជា​ជីវិត​មនុស្សដូច្នេះ មិនមែនជាទង្វើស្របច្បាប់ របស់អ្នកប្រើប្រាស់ លើទ្រូងផ្លូវនោះទេ៕