គ្មានសម្ដី ហ៊ុន សែន សមត្ថកិច្ចកម្ពុជាចាប់ ឈូក បណ្ឌិត មិនបាន!
- ដោយ: ដារា រិទ្ធ អត្ថបទ៖ ដារា រិទ្ធ ([email protected]) - ភ្នំពេញ ថ្ងៃទី០៧ សីហា ២០១៥
- កែប្រែចុងក្រោយ: August 09, 2015
- ប្រធានបទ: យុត្តិធម៌
- អត្ថបទ: មានបញ្ហា?
- មតិ-យោបល់
-
បើសិនជាគ្មានសម្ដីបញ្ជា របស់នាយករដ្ឋមន្ត្រីបីទសវត្សន៍ លោក ហ៊ុន សែន កាលពីថ្ងៃចន្ទទេ តើអាជ្ញាធរមានសមត្ថកិច្ចកម្ពុជា មានសមត្ថភាព ក្នុងការនាំខ្លួនទណ្ឌិត ឈូក បណ្ឌិត មកផ្ដន្ទាទោសបានឬទេ? មិនមាននរណា អាចឆ្លើយជំនួសក្រុមសមត្ថកិច្ចបានទេ នៅពេលដែលទណ្ឌិតមួយរូប ដែលរស់នៅក្រៅឃុំរាប់ឆ្នាំ ទើបតែចូលខ្លួនមកសារភាព នៅចំពោះមុខសមត្ថកិច្ច កាលពីថ្ងៃសៅរ៍ម្សិលម៉ិញនោះ។
លោក ឈូក បណ្ឌិត បានចូលមកសារភាព នាវេលាម៉ោង ប្រមាណ១២ថ្ងៃត្រង់ ថ្ងៃទី៨ ខែសីហា នៅស្នងការដ្ឋាន នគរបាលរាជធានីភ្នំពេញ ហើយត្រូវបានមន្ត្រីនគរបាលរាជធានី ធ្វើការបញ្ជូនខ្លួន នៅម៉ោង១៣ និង៣០នាទី ឆ្ពោះទៅកាន់សាលាដំបូង ខេត្តស្វាយរៀង ជាបន្តទៅទៀត ដើម្បីចាត់ការតាមច្បាប់។ នេះបើតាមការអះអាងរបស់លោក ជួន សុវណ្ណ ស្នងការនគរបាលរាជធានី ដែលថ្លែងប្រាប់ក្រុមអ្នកសារព័ត៌មាន ក្នុងរសៀលថ្ងៃដដែល។
លោក ជួន សុវណ្ណ បាននិយាយថា៖ «មិនមានការចាប់ខ្លួនទេ គឺជាការចូលខ្លួន មកស្នងការដ្ឋាននគរបាល រាជធានីភ្នំពេញ ដោយខ្លួនឯង»។
ចំណែកឯព្រះរាជអាជ្ញារង អមសាលាដំបូង ខេត្តស្វាយរៀង លោក ផាន់ រតនា ក៏បានអះអាង នៅរសៀលថ្ងៃដដែលដែរថា លោក ឈូក បណ្ឌិត ត្រូវបានបញ្ជូនខ្លួន ឲ្យចូលពន្ធនាគារខេត្តរួចរាល់ហើយ។
ការចូលសារភាព របស់លោក ឈូក បណ្ឌិត បានធ្វើឡើងប្រាំមួយថ្ងៃ ក្រោយការថ្លែងខ្លាំងៗ របស់លោក ហ៊ុន សែន ឲ្យតាមស្វែងចាប់ខ្លួន មនុស្សមួយចំនួន ដែលបានសង្ស័យថា បានប្រព្រឹត្តិអំពើហិង្សា នៅក្នុងព្រឹត្តិការណ៍ ថ្ងៃទី១៥ ខែកក្កដា ឆ្នាំ២០១៥។
ក្នុងពិធីសម្ពោធ ដាក់ឲ្យប្រើប្រាស់ស្ពានឆ្លងទន្លេបាសាក់ ក្នុងខេត្តកណ្តាល កាលពីថ្ងៃច័ន្ទកន្លងទៅ លោក ហ៊ុន សែន បានឆ្លៀតនិយាយភ្ជាប់ករណីចាប់ខ្លួន សកម្មជនគណបក្សប្រឆាំង ទៅករណីលោក ឈូក បណ្ឌិត ថា៖ «ឥឡូវសន្ទនានៅតែសន្ទនា ប៉ុន្តែរឿងច្បាប់ ទាក់ទងនឹងបទល្មើសព្រហ្មទណ្ឌ អត់សន្ទនាជាមួយ។ បិទផ្លូវតវ៉ា។ អាហ្នឹង ខ្ញុំអត់មានសិទ្ធិ។ ហើយបញ្ជាតាមចាប់ខ្លួន ចេះតែតាមចាប់ខ្លួន ព្រោះអាហ្នឹងវារឿងព្រហ្មទណ្ឌ។ លោកឯងមិនតាមចាប់! ប៉ូលិសខុស! សូម្បីតែរឿង ឈូក បណ្ឌិត មិនតាមចាប់ខ្លួន គឺប៉ូលិសខុស។»
ឈ្មោះ និងរូបថតលោក ឈូក បណ្ឌិត ត្រូវបានបង្ហោះពេញពិភពលោក នៅក្នុងបញ្ជីតាមចាប់ខ្លួន នៃនគរបាលអន្តរជាតិ ឬអាំងទែប៉ូល (Interpol) ជាប់ជិតមួយឆ្នាំហើយ ប៉ុន្តែសម្រេចសម្រួលទៅ លោក ឈូក បណ្ឌិត មិនមែនទៅសំងំលាក់ខ្លួន នៅក្រៅប្រទេស ដូចការប្រមើលស្មាន (ឬជាការបង្វែងដាន) របស់កម្លាំងសមត្ថកិច្ចកម្ពុជា នាពេលមុនទេ។ តែជាការលាក់ខ្លួន ដែលបានធ្វើឡើង នៅក្នុងប្រទេសកម្ពុជានេះតែម្ដង ព្រោះបើសូម្បីលោក ហ៊ុន សែន ខ្លួនលោកក៏បានថ្លែងបង្ហើបឲ្យដឹង ពីករណីនេះដែរ។ លោក ហ៊ុន សែន ថ្លែងឡើងថា៖ «ទើបដល់ឥឡូវ ទើបឮអី ចេញអាដែងស្អី អាំងទែប៉ូល ចេញតាមចាប់។ ឥឡូវអាបទល្មើស នៅថ្ងៃ១៥កក្កដា លោកឯងមិនតាមចាប់ បន្តិចទៀតលោកឯងនឹងខុស។»
ចំពោះក្រុមអ្នករិះគន់វិញ មិនបានទម្លាក់កំហុសទាំងស្រុង ទៅលើកងកម្លាំងសមត្ថកិច្ចកម្ពុជានោះទេ។ ពួកគេបានសម្ដែងមន្ទិលថា ការរស់នៅក្រៅឃុំបានយ៉ាងយូរ របស់លោក ឈូក បណ្ឌិត ដោយសារតែអតីតអភិបាលក្រុងបាវិតរូបនេះ មានមន្ត្រីរដ្ឋាភិបាល ជាខ្នងបង្អែកយ៉ាងរឹងមាំ និងជួយធ្វើការលាក់បំបាំងលោក ពីការប្រម៉ាញ់របស់ក្រុមសមត្ថកិច្ច។ សាក្សីមួយរូប ដែលជាអ្នករត់ម៉ូតូឌុប ធ្លាប់បានប្រាប់ទស្សនាវដ្តីមនោរម្យ.អាំងហ្វូថា លោកបានឃើញវត្តមានលោក ឈូក បណ្ឌិត នៅក្នុងផ្ទះឧបនាយករដ្ឋមន្ត្រី អ្នកស្រី ម៉ែន សំអន កាលពីអំឡុងខែតុលា ឆ្នាំ២០១៣ នៅមុនពេលបុណ្យភ្ជុំបិណ្ឌ។ ប៉ុន្តែការអះអាងនេះ ត្រូវបានបដិសេធចោល ដោយជំនួយការរបស់អ្នកស្រី ម៉ែន សំអន ថាជាការលើកឡើងមិនពិត។
» សូមអានអត្ថបទដែលទាក់ទងឡើងវិញ ដោយចុចនៅលើទីនេះ។
សូមរំលឹកដែរថា លោក ឈូក បណ្ឌិត អតីតអភិបាលក្រុងបាវិត ត្រូវបានចៅក្រមសាលាដំបូងខេត្តស្វាយរៀង កាត់ទោសកាលពីថ្ងៃទី២៥ ខែមិថុនា ឆ្នាំ២០១៣ ឲ្យជាប់ពន្ធនាគារ រយៈពេល ១ឆ្នាំកន្លះ និងបង់ប្រាក់សំណងសរុប ៣៨លានរៀល ពីបទបាញ់ប្រហារទៅលើកម្មការិនី៣នាក់ ឲ្យរងរបួស កាលពីអំឡុងខែកុម្ភៈ ឆ្នាំ២០១២។ ប៉ុន្តែលោក ឈូក បណ្ឌិត បានបាត់ខ្លួនសូន្យឈឹង បន្ទាប់ពីសាលក្រមតុលាការកំពូល ចុះថ្ងៃទី២៦ ខែធ្នូ ឆ្នាំ២០១៤ បានចូលជាស្ថាពរនោះមក។
កាលពីចុងខែកក្កដាកន្លងទៅ ស្ត្រីទាំងបីនាក់ ដែលរងគ្រោះពីការបាញ់បោះ របស់លោក ឈូក បណ្ឌិត មានឈ្មោះ ប៊ុន ចិន្តា , នុត សុខន និង កែវ នា បានដាក់ពាក្យប្តឹងមករដ្ឋសភាជាតិ ដើម្បីសុំអន្តរាគមន៍ ឲ្យតាមចាប់ខ្លួន លោកឈូក បណ្ឌិត និងទាមទារយុត្តិធម៌។ ពួកនាងបានប្រៀបធៀប សំណុំរឿងរបស់ពួកនាង ទៅនឹងសំណុំរឿងកញ្ញា ឯក សុជាតា ហៅ សាសា អតីតពិធីការិនីទូរទស្សន៍ ដែលបានរងគ្រោះ ពីការវាយតប់របស់លោកឧកញ៉ា សុខ ប៊ុន ហើយបានទទួលការយកចិត្តទុកដាក់ យ៉ាងមានប្រសិទ្ធភាព ពីរដ្ឋមន្ត្រីមហាផ្ទៃ លោក ស ខេង និងជាពិសេស ពីនាយករដ្ឋមន្ត្រី លោក ហ៊ុន សែន៕