សង្គ្រាមពាក្យសម្ដី ជុំវិញពាក្យដ៏ល្បីថ្មីមួយ របស់លោក ហ៊ុន សែន នាយករដ្ឋមន្ត្រីបីទសវត្សន៍ នៅតែបន្តសូរ ឥតអាក់។ អ្នកនៅជុំវិញលោក ហ៊ុន សែន បានខិតខំស្វែងរកការពន្យល់ពាក្យ «មីស្រី» ដែលលោក ហ៊ុន សែន បានថ្លែងជាសាធារណៈ នៅចំពោះប្រជាជាតិ ថានេះជាពាក្យសមញ្ញ ដែលត្រូវបានប្រើ ទៅលើស្ត្រីណាដែល​​មក​ធ្វើ​បាតុកម្ម តែបែរជាមានសកម្មភាព មិនប្រក្រតីទៅវិញ។ សម្រាប់រដ្ឋ​លេខា​ធិការ និងជាអ្នកនាំពាក្យទីស្ដីការ​គណៈរដ្ឋមន្ត្រី លោក ផៃ ស៊ីផាន វិញ ពាក្យ«មីស្រី»​នេះ មានការបកស្រាយ មួយទៀតដោយឡែក។

ដំបូងឡើយ លោក ស៊ីផាន ចង់បង្ហាញ ពីស្រ្តីចំណាស់ម្នាក់ ឈ្មោះ ង៉ែត ឃុន ហៅ យាយម៉ាមី ដែលតែងតែ​មាន​វត្តមាន ក្នុងការតវ៉ានានា ទាក់ទងនឹងបញ្ហាសិទ្ធិដីធ្លី សំនៅដ្ឋាន និងសេរីភាព ខាងផ្លូវច្បាប់ជាដើម ដោយលោក ស៊ីផាន ហៅស្ត្រីចំណាស់ មកពីសហគមន៍បឹងកក់ម្នាក់នេះ ថាជាបាតុករអាជីព និងពហុវិស័យ។ បន្ទាប់មក អ្នក​នាំពាក្យទីស្ដីការ បានបបួលគេឯង មកចោទជាសំណួរថា៖ «តើគួរហៅគាត់ជាមេ ឬជាមី?»។

លោក ផៃ ស៊ីផាន បានពន្យល់ថា «ស្ត្រីចំណាស់នេះ ក៏មានទេពកោសល្យ ក្នុងការសម្តែងផងដែរ ដោយម្តង​ម្កាលក្រុមហ៊ុន ឬស្ថាប័នផលិតឯកសារ មកពីបញ្ចឹមប្រទេស ក៏ជួលគាត់ ឲ្យសម្តែងផងដែរ នៅក្នុងសាច់រឿង នៃបរិបទសិទ្ធិសេរីភាព ក្នុងការបញ្ចេញយោបល់ ក៏ដូចជាការរំលោភដីធ្លីជាដើម។ល។»

មិនអាចស្វែងរកប្រតិកម្មតប ពីអ្នកស្រី ង៉ែត ឃុន ហៅ យាយម៉ាមី បានឡើយ នៅពេលនេះ។

យាយម៉ាមី ជា«មីស្រី ទាត់ធាក់» ដែលលោក ហ៊ុន សែន ចោទប្រកាន់?

ពាក្យ«មីស្រី»ពីរម៉ាត់នេះ ត្រូវបានលោក ហ៊ុន សែន ថ្លែងកាលពី​ថ្ងៃ​ចន្ទ ​ក្នុង​ពិធី​សម្ពោធ​​​ស្ពាន​មិត្តភាព​ កម្ពុជា ​ចិន​ នៅ​ក្រុង​តាខ្មៅ ​ដើម្បីធ្វើការវាយប្រហារ​ (ដោយសម្ដី) ទៅ​លើ​ស្ត្រី​ម្នាក់​ ដោយ​មិន​បញ្ចេញ​ឈ្មោះ ក្រោម​ហេតុ​ផល​ថា ​ស្រ្តី​រូប​នោះ ​បាន​ប្រើ​អំពើ​ហិង្សា​ក្នុង​ការ​តវ៉ា។ លោក ហ៊ុន សែន ថ្លែងថា៖ «ក្នុង​ចំណោម​​អ្នក​វាយ​ មាន​​ស្ត្រី​ម្នាក់​ទាត់​ធាក់ ​ដូចជា​បោក​ចំបាប់​។ ត្រូវ​តាម​ចាប់​ខ្លួន​ មីស្រី​នោះ​ឲ្យ​បាន​។ នេះ​មិន​ហៅ​ស្រ្តី​ទេ​ នេះ​ហៅថា​ មី​ស្រី​ ទាត់​ធាក់​»។

បន្ទាប់ពីការថ្លែង របស់នាយករដ្ឋមន្ត្រីខាងលើនេះ ប្រតិកម្មជាច្រើន បានធ្លាក់ចុះមកជាបន្តបន្ទាប់។ ស្ត្រីជាង​១០​នាក់ ដែល​តំណាង​ឲ្យ​អង្គការ​ប្រមាណជា ៥០ អង្គការ បានជួបប្រជុំគ្នានៅថ្ងៃទី៣ ខែសីហា និងបានសម្តែង​នូវ​អារម្មណ៍ ​សោកស្តាយ​ និង​មិន​ពេញ​ចិត្ត​​​ ចំពោះ​​លោក ហ៊ុន សែន ដែល​បាន​​ប្រើ​ពាក្យ​បែបនេះ​ មក​លើ​​ស្រ្តី​។ ក្រុម​ស្ត្រីៗទាំងនោះ បានហៅសម្ដីរបស់លោក ហ៊ុន សែន ជា​គំរូ​មិន​ល្អ​មួយ​ ក្នុងថានៈជាមេដឹកនាំ​កំពូល សម្រាប់​មន្រ្តី​ក្រោម​ឱវាទ​ និង​អ្នក​ជំនាន់​ក្រោយ​​ ព្រមទាំងបានរំលោភ ទៅលើសិទ្ធិស្ត្រី ហើយធ្វើឲ្យ​ប៉ះ​ពាល់ ​ដល់​ស្រ្តី​ទូទៅ។

ប៉ុន្តែលោក ជុំ កុសល ទីប្រឹក្សានាយករដ្ឋមន្ត្រី និងជាពិធីករទូរទស្សន៍ ដ៏ល្បីឈ្មោះម្នាក់នោះ បានលើក​យក​ពាក្យ «មីស្រី»នេះ មកពន្យល់ នៅលើជញ្ជាំងហ្វេសប៊ុកលោកថា៖ «"មី" នេះ គឺក្លាយឃ្លាត មកពីពាក្យ "មេ" ដែល​គេ​ប្រើ​សាមញ្ញ ដូចជាពាក្យ "មីនេះ មីនោះ ឬមេនេះ មេនោះ។ល។" ហើយពាក្យនេះ មី គឺស្មើនឹងពាក្យ "មេ"នេះ​ឯង។ អញ្ចឹងពាក្យ "មីស្រី" គឺមានន័យស្មើនឹង "មេស្រី" នេះឯង! បើត្រឹមប៉ុណ្ណឹង តើវាខុសឆ្គងអីទៅ?»៕