បន្ទាប់ពីមានព្រឹត្តិការណ៍ចាប់ចង បានធ្វើទៅលើក្រុម អ្នកគាំទ្រគណបក្សសង្គ្រោះជាតិ ដោយក្រុមអាជ្ញាធរ និង​តុលាការកម្ពុជានោះ ប្រតិកម្មចេះតែធ្លាក់ចុះមក ជាបន្តបន្ទាប់។ ប្រតិកម្មដែលបង្កចំណាប់អារម្មណ៍ ខ្លាំងជាងគេ​នោះ ជាការថ្លែងវាយប្រហារយ៉ាងចាស់ដៃ ទៅលើគណបក្សសង្គ្រោះជាតិ ពីសំណាក់លោក ផៃ ស៊ីផាន រដ្ឋ​លេខា​ធិការ និងជាអ្នកនាំពាក្យទីស្ដីការគណៈរដ្ឋមន្ត្រី។

នៅលើទំព័រហ្វេសប៊ុករបស់លោក អ្នកនាំពាក្យដ៏ល្បីឈ្មោះ បានសរសេរចាប់ផ្ដើមដំបូង ដោយពាក្យសម្ដី​ថ្នមៗ​ថា ការនាំ និងឃាត់ខ្លួន ជនទាំងនោះ ជាដែនសមត្ថកិច្ចរបស់តុលាការ ហើយមានចំណាត់ការ តែទៅលើ​បុគ្គល​ល្មើសច្បាប់តែប៉ុណ្ណោះ មិនស្ថិតក្នុងទិដ្ឋភាពនយោបាយ នោះឡើយ។

ប៉ុន្តែបន្ទាប់ពីនេះមក លោក ផៃ ស៊ីផាន បានឈានមួយជំហានយ៉ាងវែង ទៅរកគណបក្សប្រឆាំងថា៖ «ជាការ​ពិសោធន៍ គណបក្សប្រឆាំង តែងតែយកជនរងគ្រោះជាសមាជិក ឬសកម្មជនរបស់ខ្លួន ទោះបីជាជនទាំង​នោះ ស្ថិតនៅក្នុងទិដ្ឋភាពជាក់ស្តែង យ៉ាងណាក៏ដោយ។ (...) ប៉ុន្តែនៅពេលថ្មីៗនេះ គណបក្សសង្គ្រោះជាតិ បាន​ប្រកាសថាជនល្មើស និងជនដៃដល់ ដែលបានចាត់វិធានការដោយតុលាការ និងស្ថាប័នអយ្យការ ជាសកម្មជន​របស់ខ្លួនវិញ។»

លោក ស៊ីផាន បានលើកយកសម្ដី របស់លោក កឹម សុខា និងលោក សម រង្ស៊ី មកពន្យល់ក្នុងមូលហេតុ​របស់​លោកថា៖ «បន្ទាប់ពីបាតុកម្ម ដែលបង្កឲ្យមានភាពហិង្សា នៅរយៈពេល ក្រោយការប្រកាសលទ្ធផល នៃការ​បោះឆ្នោត ឯ.ឧ កឹម សុខា និង ឯ.ឧ សម រង្ស៊ី បានប្រកាស និងច្រានចោលថា ជនដៃដល់ទាំងអស់នោះ មិនមែន​ជាសមាជិក ឬសកម្មជនរបស់ខ្លួនទេ។» តែនៅពេលនេះ គណបក្សនេះ បែរជាប្រកាសទទួលស្គាល់​ជន​ល្មើស ថាជាសមាជិក ឬសកម្មជនរបស់ខ្លួន។

មន្ត្រីអ្នកនាំពាក្យ បានបន្តទៀតថា គណបក្សសង្គ្រោះជាតិ កំពុងបង្ហាញយ៉ាងច្បាស់ ពីការឆក់យកផល​ចំណេញ ផ្នែកនយោបាយផង ក៏ដូចជានាំមុខសាធារណៈជន ឲ្យបាត់បង់ជំនឿ លើដំណើរយុត្តិធម៌ និងរក្សាការពារ​ជន​ល្មើស ឲ្យនៅក្រៅច្បាប់ផង។ លោក ស៊ីផាន បានសរសេរទៀតថា៖ «អាស្រ័យហេតុនេះ ខ្ញុំសូមអ្នក​សារព័ត៌មាន​ទាំងអស់ រក្សានូវជំហររបស់ខ្លួន ក្នុងការវាយតម្លៃស្ថានការណ៍ តាមរយៈពាក្យសកម្មជន ដែលប្រើប្រាស់ដោយ​គណបក្ស CNRP ដើម្បីផលប្រយោជន៍នយោបាយ និងពាក្យជនល្មើស ដែលប្រើប្រាស់ ដោយប្រព័ន្ធតុលាការ ដើម្បីផលប្រយោជន៍ផ្លូវច្បាប់ និងយុត្តិធម៌។»

ប៉ុន្តែការលើកឡើងរបស់លោក ផៃ ស៊ីផាន មិនដូចគ្នាទៅនឹង ការលើកឡើងរបស់លោក អ៊ូ ច័ន្ទឬទ្ធិ តំណាង​រាស្រ្ត និងជាអ្នកនាំពាក្យស្តីទី របស់គណបក្សសង្គ្រោះជាតិ ឡើយ។ លោក ច័ន្ទឬទ្ធិ បានចាត់ទុកថា ការចាប់​ខ្លួន និងដាក់ឃុំជនទាំងនេះ មានចរិតនយោបាយ ដោយសារតែការថ្លែង ​របស់លោកនាយករដ្ឋមន្រ្តី ក្នុងពេលកន្លង​មក គឺជាការបញ្ជា ឲ្យ​មានការ«ចាប់ខ្លួន» តាមរយៈសមត្ថកិច្ច ក៏ដូចជាការបង្គាប់ ដល់​តុលាការឲ្យឃុំខ្លួន សកម្ម​ជន​​គណបក្ស​សង្គ្រោះ​ជាតិ​នេះ។ នៅក្នុងព្រឹត្តិការណ៍ដដែល គណបក្ស​សង្គ្រោះ​ជាតិ បានចេញ​សេចក្តីថ្លែង​ការណ៍​​របស់ខ្លួនមួយ កាលពី​ថ្ងៃទី៥ ខែសីហានេះ ដោយ​អំពាវនាវ​ជាថ្មី ឲ្យ​មាន​ការដោះលែងសកម្មជន គណបក្ស​របស់​ខ្លួន ដោយ​គ្មាន​​លក្ខខណ្ឌ បញ្ឈប់ការប្រើប្រាស់ប្រព័ន្ធតុលាការ ក្នុង​ការគម្រាមកំហែង ចោទ​ប្រកាន់ និង​ចាប់​ខ្លួន សកម្មជន​គណបក្សសង្គ្រោះជាតិជាបន្តទៀត។

សូមរំលឹកជូនថា យ៉ាងហោចណាស់ អ្នកគាំទ្រគណបក្សសង្គ្រោះជាតិ ចំនួន៣នាក់ ត្រូវបានចាប់ខ្លួន និង​បញ្ជូន​ទៅកាន់ពន្ធនាគារព្រៃសរ កាលពីថ្ងៃទី៥ ខែ សីហា ឆ្នាំ២០១៥នេះ បន្ថែមលើសកម្មជន១១នាក់ ដែលសាលា​ដំបូងសម្រេចផ្តន្ទាទោស និងឃុំខ្លួនជាថ្មី កាលពី២១ ខែកក្កដា ឆ្នាំ២០១៥កន្លងមកនេះ ក្រោមបទចោទប្រកាន់ ថាបានពាក់ព័ន្ធក្នុងអំពើហិង្សា កាលពីថ្ងៃទី១៥ ខែកក្កដា ឆ្នាំ២០១៥ នៅទីលានប្រជាធិបតេយ្យ។ ការចាប់ខ្លួន និងឃុំខ្លួននេះ បានធ្វើឡើង បន្ទាប់ពីលោកនាយករដ្ឋមន្រ្តី បានលើកឡើង កាលពីថ្ងៃទី៣ ខែសីហា ឆ្នាំ២០១៥ នាទីក្រុងតាខ្មៅ បានថ្លែងជំរុញ ឲ្យមានការចាប់ខ្លួន ជនប្រព្រឹត្តិអំពើហិង្សានោះ ជាបន្តទៀត៕