«ខ្ញុំមិនដឹងទេ។ មិនដឹងថា ត្រូវទៅនៅឬអត់ទេ មិនដឹងថានៅបាន ឬយ៉ាងណាទេ។ ខ្ញុំមានកូនចៅមើលថែរ ប្រហែល​ជាគេមិនទទួល ឬយ៉ាងណាទេ។ ប្រហែលជាគេទទួល តែអ្នកគ្មានទីពឹងហើយមើលទៅ។ ខ្ញុំមិនដឹង​ច្បាស់ទេក្មួយ។» នេះជាការអះអាង របស់លោកតាម្នាក់ ជាប្រជាពលរដ្ឋ ដែលមានទីលំនៅ ក្បែរមន្ទីរពេទ្យ​រ៉ូស្ស៊ី តបនឹងសំនួរ របស់ទស្សនាវដ្តីមនោរម្យ.អាំងហ្វូ ដែលសួរថា តើលោកតាបានដឹង និងចង់ទៅស្នាក់នៅ ក្នុង​មជ្ឈ​មណ្ឌលព្រះសីហនុរាជ ដែលជាមជ្ឈមណ្ឌល ថែទាំមនុស្សចាស់ដំបូងគេ នៅកម្ពុជានេះឬទេ?

កាលពីព្រឹកថ្ងៃទី៦ ខែសីហា ឆ្នាំ២០១៥នេះ មជ្ឈមណ្ឌលទីមួយ នៅកម្ពុជា ដែលទទួលថែទាំមនុស្សចាស់ ត្រូវ​បានសម្ភោធ និងដាក់ឲ្យប្រើប្រាស់ ក្រោមព្រះរាជាអធិបតី នៃព្រះរាជវត្តមាន នៃអង្គព្រះមហាក្សត្រកម្ពុជា និង​សម្តេចម៉ែ។ អមព្រះរាជដំណើរ ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ​កម្ពុជា និងព្រះរាជមាតាព្រះអង្គ សម្តេចព្រះមហាក្សត្រី មុនីនាថ សីហនុ (សម្តេចម៉ែ) នៅក្នុងការយាងសម្ភោធ មជ្ឈមណ្ឌលថែទាំមនុស្សចាស់ ព្រះសីហនុរាជនេះ រួមមានប្រធានរដ្ឋសភា លោកហេង សំរិន នាយករដ្ឋមន្រ្តី លោក ហ៊ុន សែន, និងមន្រ្តីជាន់ខ្ពស់ នៃរដ្ឋាភិបាលច្រើននាក់។

លោកតាដដែល គ្រាន់តែឆ្លើយថា នៅពេលដែលព្រះមហាក្សត្រ មកសម្ពោធមជ្ឈមណ្ឌលនេះ ទើបលោកតា​ទើបដឹងថា មានមន្ទីរ ឬកន្លែង សម្រាប់ទទួលថែទាំមនុស្សចាស់។ ប៉ុន្តែលោកតា មិនបានដឹង ពីគោលការណ៍​នៃមណ្ឌលនេះ ថាតើមានការទទួលមនុស្សនោះ យ៉ាងណាឡើយ។

ចំណែកអ្នកសី រស់ ធីតា ដែលរស់នៅក្បែរនោះដូចគ្នា បានថ្លែងប្រាប់ទស្សនាវដ្តីមនោរម្យ.អាំងហ្វូថា អ្នកស្រី​អបអរសារ ដែលកម្ពុជាមានមណ្ឌលសម្រាប់ទទួល និងថែរក្សា មនុស្សចាស់នេះ។ អ្នកស្រីថ្លែងថា កម្ពុជា​កំពុង​ឈាន ទៅរកភាពរីចម្រើន ដូចប្រទេសដទៃ ដែលអាចបង្កើតបាន នូវមជ្ឈមណ្ឌលនេះ។ តែអ្នកស្រីហាក់នៅ​អស់​សង្ឃឹមថា តើមណ្ឌលនេះ នឹងអាចឈរជើងបានដល់ពេលណា? រាល់ការចំណាយ ជាបន្ទុកអ្នកណា? តើត្រូវ​យក​ប្រាក់ ពីកូនចៅ នៃមនុស្សចាស់ ដែលត្រូវទៅនៅនោះឬ? យ៉ាងណាអ្នកស្រីបានបន្ថែមថា អ្នកស្រី​សង្ឃឹម​ថា មណ្ឌលមួយនេះ នឹងទទួលយកមនុស្សចាស់​ទាំងឡាយ ដោយស្មើភាពគ្នា មិនរើសអើងមាន-ក្រ និង​មិន​មាន​និន្នាការ​នយោបាយ។

អ្នកស្រី ធីតា បានថ្លែងឲ្យដឹងថា៖ «ខ្ញុំសប្បាយចិត្ត បើមណ្ឌលមួយនេះ ទទួលយកមនុស្សចាស់ ដោយស្មើ​ភាព​គ្នា។ មិនថាមាន-ក្រ ឬអ្នកនោះធ្លាប់ជាសមាជិក នៃគណបក្សនយោបាយប្រឆាំង ឬមានក្រុមគ្រួសារ ដែលមិន​មែនជាសមាជិក នៃគនបក្សកាន់អំណាចនោះ។ (...) ពិបាកដែរ បើការតម្លៃ នៃការមើលថែរមនុស្សចាស់ នៅក្នុង​មណ្ឌលនេះ ជាបន្ទុកកូនចៅនោះ។ តែបើយកតិចតួច មិនបញ្ហាទេ តែបើយកច្រើន គ្មានអ្នកណាហ៊ាន​ យក​ពួក​គាត់ទៅដាក់ទេ។ (...) ចាំមើលគេដំណើរការសិនប្អូន មីងមិនទាន់ហានថា ច្រើនជាងនេះទេ។»

សូមបញ្ជាក់ថា មជ្ឈមណ្ឌលថែទាំមនុស្សចាស់ ព្រះសីហនុរាជ ត្រូវបានកសាងឡើង ក្នុងឆ្នាំ២០១៤ និងទ្រទ្រង់​ថវិការ សម្រាប់សាងសង់មជ្ឈមណ្ឌលនេះ ដោយព្រះរាជទាន នៃព្រះរាជទ្រព្យផ្ទាល់ នៃអង្គសម្តេចម៉ែ។  ទឹក​ប្រាក់​សរុប ដើម្បីសាងសង់មជ្ឈមណ្ឌល់ មានប្រមាណជាង បីលានដុល្លាអាមេរិក៕