សាសា ព្រមានទៅ«សួរសុខទុក្ខ»អ្នកកាសែត ដល់ការិយាល័យ!
- ដោយ: ដារី អត្ថបទ និងយកការណ៍៖ ដាវី ([email protected]) - ភ្នំពេញ ថ្ងៃទី ០៣ សីហា ២០១៥
- កែប្រែចុងក្រោយ: August 04, 2015
- ប្រធានបទ: តារា
- អត្ថបទ: មានបញ្ហា?
- មតិ-យោបល់
-
ច្បាស់ហើយ! នាង ឯក សុជាតា ហៅកញ្ញា សាសា បានថ្លែងព្រមានទៅសួរ«សុខទុក្ខ» អ្នកសារព័ត៌មាន ដល់ការិយាល័យតែម្ដង នៅថ្ងៃទី៥ ខែកក្កដានេះ បន្ទាប់ពីនាងវិលត្រឡប់ ពីរាជធានីបាងកក មកដល់រាជធានីភ្នំពេញវិញ។ នៅលើគណនីហ្វេសប៊ុករបស់នាង មានសរសេរថា៖ «ចាំស្អែក ខ្ញុំនឹងត្រលប់ទៅភ្នំពេញ ហេីយជិះឡានទៅសួរសុខទុក្ខ បងអ្នកការសែត នៅមុខកម្ពុជាថ្មីតែម្តង! ព្រោះឥឡូវនេះ នាងខ្ញុំនៅទីក្រុងបាងកក!»
អតីតតារាទូរទស្សន៍ ដែលបានល្បីដល់កំពូល រហូតដល់ឆាកអន្តរជាតិ ដោយសារអ្នកសារព័ត៌មាន នៅក្នុងសំនុំរឿងវាយតប់ ជាមួយលោកឧកញ៉ា សុខ ប៊ុន នោះ ដូចជាមានអាការៈ មិនសប្បាយចិត្ត នឹងអ្នកសារព័ត៌មាន មួយចំនួននោះឡើយ។ ក្ដៅពើតផ្សារ ឱរ៉ាឆេះឈួល ព្រោះមិនសុខចិត្តនឹងដំណឹង ដែលនិយាយ ពីគ្រោះថ្នាក់ចរាចរណ៍មួយ នៅក្រុងបាត់ដំបង ហើយដែលត្រូវបានអ្នកសារព័ត៌មាន រាយការណ៍ថា ជនបង្កជិះឡានទំនើបនោះ ជារូបនាងផ្ទាល់តែម្ដង។
ព័ត៌មានដែលត្រូវបានចេញផ្សាយ បន្តបន្ទាប់គ្នា នៅថ្ងៃទី៣ ខែសីហាម្សិលម៉ិញនេះ បានសរសេរថា កញ្ញា សាសា បានបើករថយន្តទំនើបមួយ ពណ៌ស មានគ្នាជាតារាពី ៥ ទៅ៦នាក់ ទៅបុក ជាមួយរ៉ឺម៉កម៉ូតូ ដឹកទឹកកក ពេញទំហឹង កាលពីម៉ោង ១១យប់ ថ្ងៃទី២ ខែសីហា ឆ្នាំ២០១៥។ ពត៌មាននោះ បានស្រង់ប្រភព មិនបញ្ចេញឈ្មោះ មកបញ្ជាក់ថា កញ្ញា សាសា ត្រូវបានជម្លៀសខ្លួនចេញ ហើយករណីគ្រោះថ្នាក់ចរាចរណ៍នេះ ត្រូវបានធ្វើការសម្រមសម្រួល ជាមួយជនរងគ្រោះ ដើម្បីបញ្ចប់រឿងត្រឹមណ្នឹង។
ប្រតិកម្មទៅនឹងព័ត៌មានខាងលើ នាង ឯក សុជាតា បានសរសេរ នៅលើគណនីហ្វេសប៊ុករបស់នាង កាលពីថ្ងៃម្សិលម៉ិញថា៖ «ឡាននោះ ជាឡានមិត្តរបស់ខ្ញុំ នៅបាត់ដំបងទេ»។ បន្ទាប់មក កញ្ញា សាសា បានបញ្ចេញយោបល់ តបទៅនឹងប្រិយមិត្តរបស់នាងថា នាងកំពុងធ្វើការ នៅរាជធានីបាងកកនៅឡើយ ក្នុងគ្រានេះ។
ដោយឡែក ចំពោះករណីគ្រោះថ្នាក់ចរាចរណ៍ នៅក្រុងបាត់ដំបងនោះ ត្រូវបានលោក ឈាង រ៉ុង មន្ត្រីនគរបាលចរាចរណ៍ក្រុង លើកយកកំណត់ហេតុ មកបញ្ជាក់ថា ជាករណីរបស់ម្ចាស់រថយន្ដម៉ាក Porsche ភេទប្រុស ដែលមានឈ្មោះឡូតូ វ័យ៣២ ឆ្នាំ ហើយបានបើក ទៅប៉ះរឺម៉កម៉ូតូដឹកទឹកកក ដែលបើកបរដោយឈ្មោះ ទុយ មោង វ័យ ៤២ ឆ្នាំ។ នេះបើតាមរបាយការណ៍មួយ របស់សារព័ត៌មានភ្នំពេញប៉ុស្ដ៍ ចេញផ្សាយក្នុងថ្ងៃទី៤ ខែសីហានេះ ដែលបង្ហាញថា ម្ចាស់រថយន្ដទំនើប មិនមែនជាកញ្ញា សាសា នោះទេ។
សូមបញ្ជាក់ដែរថា គ្រោះថ្នាក់ចរាចរណ៍ខាងលើ បានកើតឡើង នៅត្រង់ចំណុច ក្បែរមន្ទីរពេទ្យវិសាលសុខ ស្ថិតនៅក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង កាលពីវេលាម៉ោង ១១ និង ៥០ នាទីយប់នាថ្ងៃទី ០២ ខែសីហា ឆ្នាំ២០១៥ នោះដែរ។ ភាគីទាំងសងខាង បានសម្រួលគ្នាបញ្ចប់រឿង ដោយខាងម្ចាស់រថយន្ត បានសងថ្លៃខូចខាត ដល់ជនរងគ្រោះ ក្នុងតម្លៃ ៣លានរៀល៕
