លោក ហ៊ុន សែន បានថ្លែងអះអាងថា បើប្រទេសបារាំង ប្រទេសអង់គ្លេស និង UN មិនព្រមឲ្យកម្ពុជាខ្ចីផែនទី នោះរដ្ឋាភិបាលរបស់លោក គ្រោងនឹងចាយប្រាក់ ប្រមាណជា៥លានដុល្លារ ដើម្បីបញ្ជូនអ្នកជំនាញ​កិច្ចការ​ព្រំដែន គ្រប់និន្នាការនយោបាយ ទៅត្រួតពិនិត្យផែនទី ដែលតម្កល់នៅទីនោះវិញ។ ប្រមុខរដ្ឋាភិបាលកម្ពុជា បានថ្លែងដូច្នេះ នៅក្នុងពិធីបើកសម្ពោធ ដាក់ឲ្យប្រើប្រាស់ជាផ្លូវការ នូវស្ពានមិត្តភាព កម្ពុជា-ចិន តាខ្មៅ ដែល​ជាស្ពានឆ្លងកាត់ ទន្លេបាសាក់ ប្រវែង ៨៥៥ម៉ែត្រ ក្នុងព្រឹកថ្ងៃទី០៣ ខែសីហា ឆ្នាំ២០១៥នេះ។

នាយករដ្ឋមន្ត្រីចាស់វស្សា របស់កម្ពុជា បានពន្យល់ថា៖ «បើអង្គការសហប្រជាជាតិ មិនអនុញ្ញាតឲ្យនាំផែនទី​ចេញ យើងក៏សុខចិត្ត (ចាត់)តាំងប្រតិភូទៅទីនោះវិញ ដោយនាំទៅ ទាំងបក្សក្រៅរដ្ឋាភិបាល និងអ្នកដែលជាប់​ពាក់ព័ន្ធ ដូចជារាជបណ្ឌិត្យសភា ឬក៏គណបក្សនយោបាយណាទៀត រាជរដ្ឋាភិបាលសុខចិត្ត ចេញលុយថ្លៃ​កាប៉ាល់ហោះ ថ្លៃអូតែល ឲ្យទៅដល់អង្គការសហប្រជាជាតិ។ បើបារាំងមិនឲ្យខ្ចីផែនទី យើងទៅដល់ប៉ារីស នាំ​ផែនទីខ្មែរទៅដល់ប៉ារីស។ បើថាអង់គ្លេសមាន អង់គ្លេសមិនព្រមឲ្យ យើងសុខចិត្តទៅអង់គ្លេស ទៅ! ចាត់តាំង​ទៅ! យ៉ាងច្រើន ចាយ៥លានដុល្លាដើម្បីជាតិ។»

គម្រោងការថ្មីរបស់លោក ហ៊ុន សែន ជាភាគបន្ត នៃបញ្ហាព្រំដែន ដ៏ចម្រូងចម្រាសរវាងប្រទេសកម្ពុជា និង​ប្រទេសជិតខាង ជាពិសេស ជាមួយនឹងប្រទេសវៀតណាម បន្ទាប់ពីក្រុមគណបក្សប្រឆាំង បានដឹកនាំ​ការ​ចូល​ទៅពិនិត្យបង្គោលព្រំដែន ក្នុងខេត្តស្វាយរៀង និងបានរកឃើញថា មានការបោះចូល មកក្នុងទឹកដីកម្ពុជា។ ប៉ុន្តែ​ការរកឃើញនេះ ត្រូវបានរដ្ឋាភិបាលបដិសេធ និងបានដង្ហោយរកខ្ចីផែនទី ដែលកម្ពុជាបានតំកល់ទុក នៅ​អង្គការ​សហប្រជាជាតិ និងពីប្រទេសមហាអំណាចបីផ្សេងទៀត។

ផែនទី ខ្នាត ១/១០០.០០០ ដែលត្រូវបានយកទៅតម្កល់ទុក នៅអង្គការសហប្រជាជាតិ នៅឆ្នាំ១៩៦៤ ដោយ​សម្ដេច សីហនុ ជាផែនទី ដែលត្រូវបានបោះពុម្ពធ្វើឡើង នៅចន្លោះឆ្នាំ១៩៣៣ ដល់១៩៥៣ ដោយក្រុម​ភូមិសាស្ត្រ​ឥណ្ឌូចិន ក្រោមការគ្រប់គ្រង របស់រដ្ឋាភិបាលបារាំង ក្នុងនាមជាអាណាព្យាបាល លើ​ប្រទេសកម្ពុជា​នា​ពេល​នោះ ហើយក៏ជាផែនទី ដែលត្រូវបានទទួលស្គាល់ ជាលក្ខណៈអន្តរជាតិដែរ។

ប៉ុន្តែការស្នើសុំខ្ចីផែនទី ពីអង្គការសហប្រជាជតិ និងប្រទេសមហាអំណាច មកផ្ទៀងផ្ទាត់នេះ បានបង្កមន្ទិល ឲ្យ​ក្រុមអ្នកតាមដានបញ្ហាព្រំដែន និងក្រុមគណបក្សប្រឆាំង ចោទរដ្ឋាភិបាលលោក ហ៊ុន សែន ថាបានបង្កើត​ផែនទី​មួយ ដោយគ្មានការទទួលស្គាល់ ជាអន្តរជាតិ ឬជាផែនទីក្លែងក្លាយ ទៅចរចានិងបោះបង្គោល ជាមួយ​ប្រទេសវៀតណាម។ ដោយសារតែដូច្នេះហើយ ទើបលោក ហ៊ុន សែន បាន«ដំដែក​គោលបញ្ចូលឲ្យកប់» ធ្វើ​យ៉ាងណាស្វែងរកផែនទី ដែលគេនិយាយថា ជា«ផែនទីពិត» មកជជែកជាមួយគ្នា ឲ្យដឹងសខ្មៅ។ ក្នុងព្រឹកថ្ងៃ​ដដែលនេះ លោកនាយករដ្ឋមន្ត្រី បានព្រមានមេដឹកនាំគណបក្សសង្គ្រោះជាតិ ឲ្យបង្ហាញផែនទីដែលខ្លួន​មាន​នោះ ចេញមកដាក់លើតុ ឬបើមិនអញ្ចឹងទេ នឹងមានវិធានការ តាមផ្លូវច្បាប់៕