ជំនួបរវាងមេដឹកនាំសម្ព័ន្ធសហជីពកម្ពុជា និងមន្ដ្រីរបស់សាលារាជធានីភ្នំពេញ អំពីគម្រោងធ្វើបាតុកម្មរបស់កម្មករ ដើម្បី​ទាមទារដំឡើងប្រាក់ឈ្នូលអប្បបរមាជូនកម្មករ និយោជិតសម្រាប់ឆ្នាំ២០១៣ នៅរសៀលថ្ងៃទី២៥ ខែធ្នូ ម្សិលម៉ិញនេះ។

រូបថតចម្លងពីអេក្រង់ នៃព្រឹត្តិប័ត្ររបស់សម្ព័ន្ធសហជីបកម្ពុជា។

លោកស្រី យ៉ាង សុភ័ណ្ឌ ប្រធានសម្ព័ន្ធសហជីពកម្ពុជា បាននិយាយថាការគ្រោងធ្វើកូដកម្មនេះ ពុំមានការកែប្រែទេ ព្រោះខាងសហជីព បានចេញខិតប័ណ្ណផ្សព្វផ្សាយរួចរាល់ហើយ លោកស្រីមិនទាន់មានការកែប្រែអ្វីឡើយ ដោយរង់ចាំ​មើល​នៅ​ពេលកម្មករជួបជុំគ្នាសិន។

ចំណែកលោក ម៉ៃ សុភ័ក្រ្តា អគ្គលេខាធិការសម្ព័ន្ធសហជីពកម្ពុជា ដែលបានចូលរួមប្រជុំផ្ទាល់ជាមួយ សាលារាជធានី​ភ្នំពេញ បានលើកឡើងថា សហជីពគាត់ត្រូវបាន អនុញ្ញាតឲ្យដឹកនាំកម្មករធ្វើ បាតុកម្មហើយ ក៏ប៉ុន្តែមិនអាចជួបជុំនៅ សួនច្បារមុខតុលាការកំពូល (អតីតរដ្ឋសភា) នោះទេ គឺត្រូវធ្វើនៅទីលានប្រជាធិបតេយ្យ។ មូលហេតុដែល​សាលា​រាជធានីភ្នំពេញ មិនអនុញ្ញាតឲ្យសហជីពដឹកនាំកម្មករ ជួបជុំធ្វើបាតុកម្មនៅសួនច្បារមុខតុលាការកំពូលនោះ ដោយសារ​តែទីតាំងនោះ នៅជិតព្រះបរមរាជវាំង ដែលជាទីកន្លែងកម្កល់ព្រះបរមសព របស់អតីតព្រះមហាក្សត្រ ព្រះបាទ​នរោត្តម​សីហនុ: ដូច្នេះហើយសាលាធានីភ្នំពេញ ស្នើរឲ្យសហជីពដឹកនាំកម្មករជួបជុំធ្វើ បាតុកម្មនៅទីលានប្រជាធិបតេយ្យវិញ។

លោកបានយល់ព្រម ធ្វើការជួបជុំ និងសម្តែងមតិ នៅទីលានប្រជាធិបតេយ្យ ដែលមានអ្នកចូលរួមចំនួន ២៥០ នាក់ពី​គ្រប់ខេត្ត-ក្រុង នៅវេលាម៉ោង ៨.៣០នាទីព្រឹក ក្នុងការដាក់ញត្តិជូននាយករដ្ឋមន្ដ្រី និងស្ថាប័នរដ្ឋពាក់ពន្ធ័មួយចំនួនទៀត ទាមទារដំឡើងប្រាក់ឈ្នូលជូនដល់កម្មករ និយោជិតឲ្យដល់១៥០ ដុល្លារ ក្នុងមួយខែ សម្រាប់ឆ្នាំ២០១៣ ដែលបច្ចុប្បន្ន​នេះទទួលបានប្រាក់ខែគោល តែ៦១ដុល្លារ ប៉ុណ្ណោះក្នុងមួយខែ ។

ទាក់ទងនឹងការយកញត្តិ ទៅប្រគល់ជូនស្ថាប័នពាក់ព័ន្ធ លោកអះអាងថានឹងពុំមានការដង្ហែក្បួនឡើយ គឺគ្រាន់តែចាត់​តំណាង២០នាក់ ក្នុងការដើរដោយថ្មើរជើង ចាប់ពីទីលានប្រជាធិបតេយ្យ ឆ្ពោះទៅវិថីព្រះស៊ីសុវត្ថិ និងបត់ស្តាំ សំដៅ​ទៅ​ដើមពោធិ៍មុខវត្តបទុមវតី ដើម្បីប្រគល់ញត្តិ ជូនខុទ្ទកាល័យនាយករដ្ឋមន្ត្រី និងបន្តដំណើរតាមសួនមុខវត្តបទុមវតី សំដៅ​ឆ្ពោះទៅវិមានរដ្ឋសភាជាតិ ដើម្បីប្រគល់ញត្តិនេះជាចុងក្រោយ ។

លោកអគ្គលេខាធិការសម្ព័ន្ធសហជីពកម្ពុជារូបនេះ បានស្រង់ពាក្យសម្ដីរបស់ លោក កើត ឆែ នាយករដ្ឋបាល​សាលា​រាជធានីភ្នំពេញ ប្រាប់អ្នកសារពត៌មានយ៉ាងដូច្នេះថា សហជីពត្រូវធានាក្នុងការធ្វើបាតុកម្មនេះ ដោយសង្ឈឹម​ថា​ការងារ​នេះ«មិនបំរើ» ឲ្យគណបក្សនយោបាយណាមួយ ឬ«រំខាន»ដល់ព្រះបរមសពព្រះមហាក្សត្រឡើយ ហើយអាជ្ញាធរ​បាន​គម្រាមនឹងមានវិធានការតាមច្បាប់ ប្រសិនបើមិនគោរពតាមការព្រមព្រៀងនៃកិច្ចប្រជុំនេះ ហើយនឹងមិនអនុញ្ញាត​ឲ្យធ្វើ​បន្តទៀតទេ។

សូមបញ្ជាក់ថា សិទ្ធិសំដែងមតិ សិទ្ធិធ្វើបាតុកម្ម របស់ពលរដ្ឋកម្ពុជាគ្រប់រូប មានចែង និងធានាការពារដោយរដ្ឋធម្មនុញ្ញ នៃប្រទេសកម្ពុជា បើទោះជាការសំដែងមតិ ឬការធ្វើបាតុកម្មនោះ មានរូបរាងជាលក្ខណៈសហជីព ឬជាប់ទាក់ទង​មាន​និន្នាការនយោបាយ ទៅគណបក្សណាក៏ដោយ។ កាលពីថ្ងៃទី២០ ខែធ្នូ ឆ្នាំ២០១២កន្លងទៅ លោកស្រី យ៉ាង សុភ័ណ្ឌ ប្រធាន លោក ឈុន សំអូន មន្ត្រីសហជីព និងលោក រ៉ុង បញ្ញា មន្ត្រីសហជីព នៃសម្ព័ន្ធសហជីពកម្ពុជា បានសរសេរ​លិខិតរួមគ្នាមួយច្បាប់ ជូនលោក កែប ជុតិមា អភិបាលរាជធានីភ្នំពេញ ដើម្បីជូនដំណឹងពីការរៀបចំបាតុកម្មអហឹង្សាមួយ នៅថ្ងៃទី៣០ ខែធ្នូ ឆ្នាំ២០១២ វេលាម៉ោង ៨:៣០ នាទី ព្រឹក នៅសួនច្បារមុខតុលាការកំពូល (អតីតរដ្ឋសភា) ក្នុងគោល​បំណងទាមទារ«ដំឡើងប្រាក់ឈ្នូលអប្បបរមា» ជូនកម្មករ និយោជិក៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី២៥ ធ្នូ ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ