ការរកឃើញបំណែក ដែលមានប្រវែង២ម៉ែត្រ ដែលមានទម្រង់ជាស្លាបមួយ របស់យន្ដហោះនោះ កំពុង​ត្រូវ​បាន​សង្ស័យថា ជាផ្នែកមួយ នៃយន្ដហោះប៊ូអីង (Boeing 777) បាត់ខ្លួន របស់ក្រុមហ៊ុនម៉ាឡេស៊ីអ៊ែរឡាញ ដែល​ភ្ជាប់​ជើងហោះហើរ លេខ MH370។ យន្ដហោះនេះ បានបាត់ខ្លួន នៅថ្ងៃទី៨ ខែមីនា ឆ្នាំ២០១៤ ហើយជា​ការ​បាត់​ខ្លួន​ដ៏អាថ៌កំបាំង ជាងគេ នៅក្នុងប្រវត្តិសាស្ត្រ នៃអាកាសចរណ៍ស៊ីវិល របស់ពិភពលោក។ នាយករដ្ឋមន្ត្រី នៃ​ប្រទេស​ម៉ាឡេស៊ី លោក ណាជីប រ៉ាហ្សាក់ (Najib Razak) បានប្រកាសថា បំណែកនេះ ទំនងជារបស់​យន្ដហោះ ប៊ូអីង ៧៧៧។

អាជ្ញាធររបស់កោះ រ៉េអ៊ុយញ៉ុង (La Réunion ស្ថិតក្នុងភាគខាងលិច នៃមហាសមុទ្រឥណ្ឌា) បានរាយការណ៍​ពី​ករណីនេះ មកកាន់ការិយាល័យរបស់បារាំង ហៅកាត់ថា BEA ដែលមានជំនាញខាងការស៊ើបអង្កេត ករណី​គ្រោះថ្នាក់តាមផ្លូវអាកាស ដើម្បីឲ្យការិយាល័យនេះ ផ្ដើមការងារស៊ើបអង្កេតរបស់ខ្លួន ជាមួយការស៊ើបអង្កេត ជា​លក្ខណៈអន្តរជាតិផ្សេងទៀត ដែលដឹកនាំដោយប្រទេសអូស្ត្រាលី។ អ្នកនាំពាក្យរបស់ការិយាល័យ សុវត្ថិភាព​អាកាសចរណ៍ របស់ប្រទេសអូស្ត្រាលី បានប្រកាសឲ្យដឹងថា៖ «យើងបានទទួលរូបថតច្រើនសន្លឹក ទាក់​ទង​នឹងបំណែក ហើយយើងកំពុងសិក្សាមើល ថាតើជាបំណែកអ្វី»។

ហិបក្រម៉ៅមួយទៀត ក៏ត្រូវបានរកឃើញដែរ!

បន្ថែមពីលើបំណែក យន្ដហោះនោះ បំណែកហិបពណ៌ក្រម៉ៅមួយទៀត ក៏ត្រូវបានរកឃើញ នៅនឹងកន្លែង​តែ​មួយដែរ កាលពីព្រឹកថ្ងៃព្រហស្បត្តិ៍។ អាជ្ញាធរបារាំង ទទួលបន្ទុកខាង ការដឹកជញ្ជូនតាមផ្លូវអាកាស បាន​ទទួល​យកបំណែកហិបនេះ មកទុក ដើម្បីរង់ចាំការស៊ើបអង្កេត។

បំណែកទាំងនេះ ត្រូវបានរកឃើញ នៅលើឆ្នេរនៃក្រុង «Saint-André» របស់កោះ រ៉េអ៊ុយញ៉ុង ដោយ​បុគ្គលិក​ច្រើននាក់ នៃសមាគមមួយ ដែលមានជំនាញខាង ការបោសសំអាតតំបន់ឆ្នេរ។ សាក្សីម្នាក់ ពីក្នុងចំណោម​នោះ បានថ្លែងឲ្យដឹងថា៖ «បំណែកនេះ មានហ៊ំព័ទ្ធ ដោយគ្រំងាវ ជាច្រើន ដែលមើលទៅ ដូចជាវានៅក្នុងទឹក តាំង​ពី​យូរមកហើយ»។

មកដល់ពេលនេះ នៅមិនទាន់មាន សេចក្ដីសន្និដ្ឋានណាមួយ អាចបញ្ជាក់បាននៅឡើយ ពីការរក​ឃើញ​បំណែក​នេះ ខណៈអ្នកស៊ើបអង្កេត កំពុងស្វែងរកព័ត៌មាន ដែលមានការទាក់ទង នឹងយន្ដហោះបាត់ខ្លួន ដូច​ជាអត្តលេខសម្គាល់ របស់បំណែកនេះជាដើម។ ប្រភពមួយពីអាជ្ញាធរ បានបញ្ជាក់ថា៖ «វាដូចជាឆាប់ពេក ក្នុង​ការធ្វើសេចក្ដីសន្នីដ្ឋាន ក្នុងពេលនេះ។ ដំបូងយើងត្រូវកំណត់ថា តើបំណែកនេះ ជារបស់យន្ដហោះប្រភេទអ្វី។ បន្ទាប់មក យើងនឹងកំណត់ទៀតថា តើយន្ដហោះនោះ ជារបស់ក្រុមហ៊ុនណាមួយ។»

បំណែកនៃយន្ដហោះ MH370 អាចជាការសង្ស័យ ខ្លាំងជាងគេ...

បើទោះជាករណីបាត់ខ្លួន របស់យន្ដហោះ MH370 ដែលមានអ្នកដំណើរ ២៣៩នាក់ កំពុងត្រូវបានជាប់សង្ស័យ ដោយក្រុមអ្នកស៊ើបអង្កេតនោះក៏ដោយ តែក៏នៅមានករណីធ្លាក់យន្ដហោះ មួយចំនួនទៀត បានកើតឡើង នៅ​ក្នុងមហាសមុទ្រឥណ្ឌាដែរ។ ប៉ុន្តែសម្រាប់អ្នកជំនាញ បានអះអាងជឿជាក់ថា នេះពិតជាបំណែក របស់​ស្លាប​យន្ដហោះ ប៊ូអីង។ អ្នកជំនាញ ខាងសុវត្ថិភាពអាកាសចរណ៍បារាំង លោក «Xavier Tytelman» បានសរសេរ​នៅលើគណនីទ្វីសធើរ (Twitter) របស់លោកថា៖ «បំណែកមួយ ដែលមិនគួរឲ្យជឿបាន នៃស្លាបយន្ដហោះ «B777» និងបំណែកផ្សេងទៀត ត្រូវបានរកឃើញ»។ បំណែកនេះ ជាផ្នែកមួយ នៃគែមស្លាបយន្ដហោះ ដែល​អ្នកបើកបរយន្ដហោះ អាចធ្វើការបើកបិទបាន ដើម្បីបញ្ជឲ្យយន្ដហោះ ហោះឡើង និងចុះចត៕

» វីដេអូ ពីការរកឃើញបំណែកយន្ដហោះ៖