រដ្ឋមន្រ្តីក្រសួងការងារ របស់ប្រទេសកម្ពុជា បានថ្លែងអះអាងថា គោលបំណងសំខាន់ នៃការបង្កើត ឲ្យមាន​ច្បាប់​គ្រប់គ្រង សហជីព មានពីរចំណុចសំខាន់៖ ទីមួយ) ដើម្បីកំណត់នីតិវិធី ក្នុងការទបស់ស្កាត់ នូវបាតុភាព​ណាមួយ ដែលអាចបង្កអសន្តិសុខ ដល់សង្គមជាតិ និងទីពីរ ដើម្បីការពារ និងលើកស្ទួយសិទ្ធិ និងសេរីភាព របស់អង្គការសហចីព និងអង្គការវិជ្ជាជីវៈ នៅកម្ពុជា។

ការលើកឡើង របស់រដ្ឋមន្ត្រីក្រសួងការងារ លោក អ៊ិត សំហេង បានធ្វើឡើងទៅកាន់ អ្នកសារព័ត៌មាន នៅ​ក្រោយកិច្ចប្រជុំត្រីភាគី ដោយបិទទ្វាមួយ នៅទីស្ដីការក្រសួង ដើម្បីបន្តការជជែកគ្នា លើសេចក្ដី​ព្រាងច្បាប់​សហជីព មុននឹងសេចក្ដីព្រាងច្បាប់នេះ ត្រូវបានដាក់ ទៅកាន់ទីស្តីការ គណរដ្ឋមន្រ្តីយ៉ាងយូរបំផុត ក្នុងខែ​ក្រោយ (សីហា) ហើយនឹងដាក់ជូន រដ្ឋសភាអនុម័ត បើគ្មានអ្វីប្រេប្រួលទេ យ៉ាងយូរបំផុត ចុងឆ្នាំ២០១៥នេះ។

លោក អ៊ិត សំហេង បានពន្យល់ថា ការអនុវត្តសិទ្ធិសេរីភាព ណាមួយក៏ដោយ ត្រូវតែ ធ្វើឲ្យបានត្រឹមត្រូវ តាម​ច្បាប់ និងនីតិវិធី។ លោកបានថ្លែងឡើងថា៖ «ដើម្បីទប់ស្កាត់ នូវសកម្មភាពមួយចំនួន ដែលសង្គមជាតិ ដែល​គ្រប់ភាគីពាក់ព័ន្ធទាំងអស់ តែងមានការលើកឡើង និងមានសំណូមពរ មកដល់រាជរដ្ឋាភិបាល និងក្រសួង​រៀបចំនីតិវិធីទប់ស្គាត់។»

យ៉ាងណាចំពោះការកែប្រែ ឬការបល់ចោលចំណុចណាមួយ នៃសេចក្តីព្រាងច្បាប់នោះ លោករដ្ឋមន្រ្តី​ក្រសួង​ការងារ មិនអាចបញ្ជាក់បានឡើយ ដោយសារតែ កំពុងស្ថិតក្នុងការពិភាក្សា។ លោកបានថ្លែងទៀតថា មក​ទល់​ពេលនេះ សេចក្តីព្រាងច្បាប់ ដែលមានប្រមាណជិត១០០មាត្រានោះ សម្រេចបានជារូបរាង ជាង៩០ភាគ​រយ​ហើយ។

» សូមស្តាប់ និងទស្សនាការបកស្រាយទាំងស្រុង ដូចខាងក្រោម៖