ជាមេរៀនមួយ សម្រាប់អ្នកដឹករបស់ធ្ងន់ ឡើងចំណោត ទាំងឡាយផ្សេងទៀត។ បើកម្លាំងយាន អូសឡើង​ទួល​មិនរួច ឬទំងន់ផ្ទុក ធ្ងន់ជាកម្លាំងទប់របស់យាន នោះគេមិនគួរឡើង ឬចុះទួលឡើយ ព្រោះវាអាចបង្ក ឲ្យក្លាយ​ជា​វិនាសកម្មបាន។ ដូចករណីគ្រោះថ្នាក់ដល់ជីវិត របស់ម្ចាស់យានកង់បីនេះ ជាដើម។

ហេតុការណ៍ គ្រោះថ្នាក់ដ៏រន្ធត់ កើតឡើង នៅរសៀលថ្ងៃទី២៣ ខែកក្កដា ឆ្នាំ២០១៥។ រ៉ឺមកកង់បី និងដែកផ្ទុក នៅលើរ៉ឺមក បានបែរក្រឡាប់ មកសង្កត់អ្នកបើកបរ នៅត្រង់ចំណុចកំពង់ដរ អរិយក្សត្រ ស្ថិតនៅឃុំអរិយ្យក្សត្រ ស្រុកល្វាឯម ខេត្តកណ្តាល។ គ្រោះថ្នាក់ ដែលបានកើតឡើង នៅវេលាម៉ោង២ និង៤០នាទីរសៀលនេះ បាន​សម្លាប់អ្នកបើករ៉ឺមក ឈ្មោះ ទ្រី តា ភេទប្រុសអាយុ២៨ឆ្នាំ មុខរបរជាជាងដែក មានទីលំនៅ ក្នុងឃុំស្រុក​ខាង​លើ។

តាមប្រភពព៍ត័មាន ពីកន្លែងកើតហេតុ បានបញ្ជាក់ឲ្យដឹងថា នៅមុនពេលកើតហេតុជនរងគ្រោះ បានបើក​រ៉ុម៉ក ដឹកដែកពេញមួយរ៉ឺម៉ក ពីភ្នំពេញ មកដល់កំពង់ដ អរិយក្សត្រ នៅត្រើយខាងលិច និងបានឆ្លងទៅ​ត្រើយ​ខាង​កើត។ នៅពេលនោះ រ៉ឺម៉កកង់បី ឡើងច្រាំងទន្លេមិនរួច បានពាក់កណ្តាលប៉ុណ្ណោះ ក៏រអិលថយក្រោយ​មក​វិញ។ អ្នកឃើញហេតុការណ៍បានបន្តទៀតថា នៅពេលជនរងគ្រោះ ឃើញសភាពមិនស្រួល ក៏បានលោត​ចេញ ពី​រ៉ឺម៉ក ប៉ុន្តែអកុសល លោតមិនផុត ត្រូវរ៉ឺម៉កក្រឡាប់សង្កត់ ចំក្បាលរបួសធ្ងន់ធ្ងរ។

ក្នុងពេលភ្លាមៗ អ្នកធ្វើដំណើរ ដែលឃើញហេតុការណ៍ដូច្នេះ ក៍ជួយលើករ៉ឺម៉កចេញ ដើម្បីសង្ក្រោះយកជន​រងគ្រោះ ទៅមន្ទីពេទ្យនៅភ្នំពេញ ប៉ុន្តែនៅពេលឆ្លង មកដល់ត្រើយខាងលិច ជនរងគ្រោះបានផុតដង្ហើម​ទៅ​ហើយ។ សាច់ញាតិ និងក្រុមគ្រួសារ បានមកទទួលសាកសព ពីមន្រ្តីមានសមត្ថកិច្ច បន្ទាប់ពីធ្វើ​កោសលវិច័យ​រួច ដើម្បីយកទៅធ្វើបុណ្យ តាមប្រពៃណី នៅឯស្រុកកំណើត៕