សវនាការនីមួយៗ នៃសាលាជម្រះក្តី ខ្មែរក្រហម ត្រូវបានធ្វើការបែងចែក ទៅតាមភាពលំដាប់លំដោយ នៃ​អង្គហេតុ ក្នុងការជមនុំជ្រមះក្តី ដើម្បីឲ្យមានភាពប្រទាក់ក្រឡាគ្នា ដើម្បីឲ្យយល់ ពីដំណើរការវិវឌ្ឍន៍មួយៗ។ រីឯសំណុំរឿង០០២ វគ្គ២នេះ អង្គជំនុំជំរះសាលាដំបូង របស់សាលាក្ដីវិសមញ្ញ នឹងចាប់ផ្តើមដំបូង ស្វែងយល់ និងស្តាប់អង្គហេតុ ទាក់ទងនឹងសហករណ៍ មន្ទីរសន្តិសុខ និងការរដ្ឋានការងារ។ នេះបើតាមការអះអាង របស់​លោក នេត្រ ភត្រា អ្នកនាំពាក្យសាលាក្តីខ្មែរក្រហម ក្នុងសន្និសីទសារព័ត៌មាន នាព្រឹកថ្ងៃទី២៣ ខែកក្កដា ឆ្នាំ​២០០១៥នេះ។

លោក នេត្រ ភត្រា បានរៀបរាប់ថា នាថ្ងៃទី២៧ ខែកក្កដា ខាងមុខ ជនជាប់ចោទ នួន ជា និង ខៀវ សំផន នឹង​ត្រូវបានកោះហៅ ឲ្យចូលសវនា ការពាក់ព័ន្ធ នឹងរឿងការដ្ឋានទំនប់ត្រពាំងថ្មនេះ។ តែលោក នួន ជា មិនមាន​វត្តមានទេ ក្រោមមូលហេតុ«ជំងឺ»។ សម្រាប់លោក ខៀវ សំផន ក្នុងអាយុ៨៤ឆ្នាំវិញ មានសុខភាពគ្រាន់បើ អាច​នឹងចូលរួម ក្នុងសវនាការបាន និងម្យ៉ាងទៀត លោក ខៀវ សំផង មិនដែលបោះបង់សវនាការទេ តែងតែបាន​ចូលរួម ដោយផ្ទាល់គ្រប់សវនាការ។

ក្រៅពីបញ្ហាថវិការ សម្រាប់ដំណើរការរបស់សាលាក្តី វិសមញ្ញ ដែលបង្កើតឡើង ដោយកិច្ចព្រមព្រៀង រវាង​រដ្ឋាភិបាលលោក ហ៊ុន សែន និងអង្គការសហប្រជាជាតិនោះ អ្នកនាំពាក្យនៅបានត្អូញត្អែរទៀត ពីបញ្ហា​សុខភាព របស់ជនជាប់ចោទ ដែលមានលក្ខណៈផុយស្រួយយ៉ាងខ្លាំង។ លោក ភត្រា បានស្រង់ការអះអាង របស់មេធាវី ការពារក្ដីឲ្យលោក នួន ជា មកថ្លែងថា លោក នូន ជា ដែលមានអាយុ៨៨ឆ្នាំនោះ មានបញ្ហាផ្នែក​ចង្កេះ ដែលមិនអនុញ្ញាត ឲ្យគាត់អង្កុយយូរបាន។ ប៉ុន្តែដំណើរការ នៅក្នុងសវនាការយ៉ាងណានោះ នៅតែត្រូវ​បានលោក នួន ជា តាមដាន ពីបន្ទប់សោធទស្សន៍ បានដដែល។

ទំនប់ត្រពាំងថ្ម ជាការដ្ឋានមួយ ដែលសម័យខ្មែរក្រហម បានកែនប្រជាពលរដ្ឋ មកពីតំបន់ផ្សេងៗ ដើម្បីលើក​ទំនប់​ត្រពាំងថ្មនេះ នៅក្នុងគោលបំណងសេដ្ឋកិច្ច របស់របបអាវខ្មៅ ខ្មែរក្រហម។ លោក នេត្រា បានពន្យល់ថា ដោយផ្អែកតាមការបញ្ជាក់ របស់សាក្សី ប្រជាពលរដ្ឋ ដែលបានកែន មកកាន់ការរដ្ឋាននេះ មានចំនួន ពីមួយ​ម៉ឺន​ប្រាំពាន់នាក់ ទៅពីរម៉ឺននាក់។ តែសម្រាប់ប្រជាពលរដ្ឋ ដែលបានស្លាប់ ក្នុងដំណើរការ នៃការសាងសង់​ការដ្ឋាន​នោះ មិនទាន់មាន តួរលេខច្បាស់លាស់នៅឡើយ។ យ៉ាងណា តាមរយៈជនរងគ្រោះផ្ទាល់ ពីការរដ្ឋាន​នោះ បច្ចុប្បន្នមានចំនួន ៩៩នាក់ ដែលបានដាក់ពាក្យបណ្តឹង មកសាលាក្តីខ្មែរក្រហម ក្នុងសំណុំរឿង​លេខ​០០២ វគ្គ២នេះ។

សូមបញ្ជាក់ថា ការរដ្ឋានទំនប់ត្រពាំងថ្ម មានទីតាំងស្ថិតនៅ ភូមិត្រពាំងថ្មកណ្តាល និងភូមិប៉ោចារ ឃុំប៉ោចារ ស្រុកភ្នំស្រុក ខេត្តបន្ទាយមានជ័យបច្ចុប្បន្ន ដែលពីមុន ស្ថិតក្នុងខេត្តបាត់ដំបង។ តែតាមការកំណត់ ទីតាំង​ភូមិសាស្រ្តរដ្ឋបាល សម័យបក្សកុម្មុយនីសកម្ពុជា ការដ្ឋានទំនប់ត្រពាំងថ្មនេះ មានទីតាំងស្ថិតនៅក្នុងតំបន់​ប្រាំ នៃភូមិភាគពាយ័ព្យ ស្ថិតនៅប្រមាណជា៥០គីឡូម៉ែត្រ ភាគឦសាន នៃក្រុងស៊ីសុផុន។ កសាងឡើង ក្នុង​ចន្លោះ​ឆ្នាំ១៩៧៦ និងបញ្ចប់ក្នុងខែឧសភា ឆ្នាំ១៩៧៧ តំនប់ត្រពាំងថ្ម មានខ្នងប្រហែងជាង១០ម៉ែត្រ ជើងទំនប់​ប្រហែល ១៨ម៉ែត្រ និងកំពស់ប្រហែលពី ៣ទៅ៥ ម៉ែត្រ។ អាងទំនប់នេះ អាចផ្ទុកទឹក ដែលមានបណ្តោយ ប្រមាណ​ជា១០គីឡូម៉ែត្រ និងទទឹង ប្រមាណជា៧គីឡូម៉ែត្រ៕