តំណាងកម្មករ លោក ខាត់ ឡួត បានប្រាប់ទស្សនាវដ្តី​ មនោរម្យ.អាំងហ្វូ ឲ្យដឹងថា អស់រយៈពេល ជាង១០ថ្ងៃ​ហើយ ដែលក្រុមកម្មករធ្វើការតវ៉ា តែគ្នានក្រសួង និងអ្នកដែលជាប់ពាក់ព័ន្ធ ចេញមកជួយដោះស្រាយ បញ្ហា​របស់កម្មករទេ មានតែដាក់ពង្រាយកម្លាំង ដើម្បីទប់ស្កាត់កម្លាំងតវ៉ានេះទៀត។ លោកបញ្ជាក់ទៀតថា នៅ​ថ្ងៃ​ទី២២ ខែកក្កដាឆ្នាំ ២០១៥នេះ ចំណុចទាមទារ ដ៏សំខាន់សម្រាប់កម្មករ គឺសុំឲ្យថៅកែ ជាជនជាតិចិន ពិនិត្យ​កិច្ចសន្យាចុះកុងត្រា ជាមួយកម្មករ ក្នុងរយៈពេលប្រាំឆ្នាំម្តង តាមកិច្ចសន្យា របស់ថៅកែ។

កម្មការនីម្នាក់ ដែលកំពុងកាន់បដា ប្រកាសសរសេរថា៖ «ក្រុមហ៊ុន PUMA ត្រូវតែជំរុញឲ្យនិយោជក ដោះ​ស្រាយ​ជាមួយកម្មករនិយោជិត»នោះ បានរៀបរាប់ថា ក្នុងចំណោមរោងចក្រពីរ គានធិច១ និងគានធិច២ គឺមានថៅកែតែមួយ ជាជនជាតិចិនដូចគ្នា។ កញ្ញាបានបន្តថា ថ្ងៃនេះ ក្រុមកម្មករត្រូវបាមក្រុមកងម្លាំងចម្រុះ ទប់ស្កាត់មិនឲ្យតវ៉ា នៅមុខរោងចក្រទេ។ ប៉ុន្តែសភាពការណ៍តឹង ដូចខ្សែរខ្លែងនោះ ត្រូវបានរលត់ទៅវិញ ដោយបញ្ជាឲ្យក្រុមកម្មករ មកតវ៉ានៅមុខក្រសួងការងារ។

ក្រុមកម្មករ និងតំណាងកម្មករ ប្រមាណ៤០០នាក់ នៅតែមិនទាន់មាន អ្នកដោះស្រាយពីញ្ហា នៅក្នុងរោងចក្រ​ជាមួយថៅកែនេះ នៅឡើយ។ តំណាងក្រុមកម្មករ បានបញ្ជាក់ជាចុងក្រោយថា អ្នកនៅក្នុងរោងចក្រទាំងអស់ មិនព្រមចូលធ្វើការជាដាច់ខាត បើថៅកែមិនដោះស្រាយ បញ្ហាឲ្យកម្មករ៕