ការសម្រេចដាក់ទោសទណ្ឌ លើសកម្មជនទាំង១១រូប របស់គណបក្សប្រឆាំង បានបង្កឲ្យមានប្រតិកម្ម កើត​ឡើង​ពីគ្រប់មជ្ឈដ្ឋាន។ បន្ទាប់ពីសេចក្ដីថ្លែងការណ៍ របស់អង្គការសម្ព័ន្ធខ្មែរជំរឿន និងការពារសិទិ្ធមនុស្ស ហៅ​កាត់ថា លីកាដូ ដែលបានហៅការសម្រេច របស់តុលាការកម្ពុជា ថាមានចរិកនយោបាយនោះមក រដ្ឋលេខា​ធិការ និងជាអ្នកនាំពាក្យ នៃទីស្តីការគណរដ្ឋមន្រ្តី លោក ផៃ សីផាន បានប្រតិកម្មតបវិញ ដោយបានហៅ សេចក្តី​ថ្លែងការណ៍នោះ ថាមានចរិតលំអៀង ដោយមាននិន្នាការនយោបាយ។

លោក ផៃ ស៊ីផាន បានសរសេរ ក្នុងគណនេយ្យហ្វេសប៊ុករបស់លោក ចាត់ទុកថា សេចក្តីថ្លែងការណ៍នោះ ថា​ជាការបំភ័ន និងប្រាសចាកពីគោលដៅយុត្តិធម៌ និងសិទ្ធមនុស្ស ដែលជាអណត្តិរបស់អង្គការ ក្នុងកិច្ចការពារ និងលើកស្ទួយ ដែលជាគោលដៅ របស់អង្គការមិនមែនរដ្ឋាភិបាល លីកាដូ នៅក្នុងវិស័យស្នូលរបស់ខ្លួន។

ប្រតិកម្មនេះ ត្រូវបានធ្វើឡើង បន្ទាប់ពីអង្គការលីការដូ ចេញនូវសេចក្តីថ្លែងការណ៍មួយ នារសៀលថ្ងៃទី២១ ខែ​កក្កដា ឆ្នាំ២០១៥ នេះថា៖ «មិនមានភាពចៃដន្យនោះទេ ដែលមនុស្សពីរនាក់ ក្នុងចំណោមមនុស្សទាំងបីនាក់ ដែលត្រូវបានផ្តន្ទាទោស ដាក់ពន្ធនាគារដល់ទៅ ២០ឆ្នាំ ដែលអ្នកទាំងនោះ មានវត្តមាននៅក្នងព្រឹត្តិការណ៍ នៅ​ខេត្តស្វាយរៀង។ (...) សូមកុំឲ្យតុលាការ ក្លាយជាឧបករណ៍នយោបាយ។ ហើយសូមអំពាវនាវ សូមឲ្យលើក​ចោល​សាលក្រម និងការផ្តន្ទាទោសទាំងនោះ ដោយផ្អែកលើមូលហេតុ នៃសវនាការ ដែលប្រព្រឹត្តិទៅ​មិន​ប្រក្រតី និងអង្គហេតុពិតនៃករណីនេះ។»

នៅក្នុងសេចក្ដីថ្លែងការណ៍នោះ នាយិកាអង្គការលីកាដូ អ្នកស្រី ណាលី ពិឡូត បានលើកឡើងថា៖ «ការវិនិច្ឆ័យ​ក្ដីរបស់តុលាកាក្រុង ជាការបំភិតបំភ័យ ដល់គណៈបក្សសង្រ្គោះជាតិ បន្ទាប់ពីមានព្រឹត្តិការណ៍ បង្គោលព្រំដែន ខេត្តស្វាយរៀង និងបន្ទាប់ពីគណបក្សសង្រ្គោះ ជាតិបានធ្វើពហិការ មិនចូលរួមក្នុងសម័យពេញអង្គ ដែល​អនុម័ត ទៅលើសេចក្ដីព្រាងច្បាប់ ស្ដីពីអង្គការ មិនមែនរដ្ឋាភិបាល និងសមាគម»។

សម្រាប់លោក ផៃ ស៊ីផាន វិញ បានចាត់ទុកថា ជាភស្ដុតាងមួយបន្ថែមទៀត នៃនិន្នាការនយោបាយ មិន​អព្យាក្រឹត្យ និងការទទួលខុសត្រូវ ចំពោះកាតព្វកិច្ច អង្គការមិនមែនរដ្ឋាភិបាល ដែលដើរតួជាភ្នាក់ងារបរទេស ក្នុងការទទួលបានថវិកា ពីក្រៅស្រុក ដើម្បីកិច្ចប្រតិបត្តិការរបស់ខ្លួន នៅក្នុងប្រទេសកម្ពុជា។ មន្ត្រីអ្នកនាំពាក្យ​រូបនេះ បានសរសេរទៀតថា៖ «អង្គការរបស់លោកស្រីហាក់បីដូចជា ដើរតួនាទី ហួសពីការងារទទួលខុសត្រូវ របស់អង្គការ មិនមែនរដ្ឋាភិបាល ហើយក្លាយជា អ្នកការពារជាក់ស្ដែងរបស់ជនដៃដល់ និងផលប្រយោជន៍ របស់គណបក្សសង្រ្គោះជាតិ។ នៅក្នុងបុព្វហេតុនយោបាយនោះ គឺធ្វើអោយ សាធារណៈជន យល់ដឹងកាន់តែ​ច្បាស់ នៅពេលនេះ។»

លោក ផៃ ស៊ីផាន ដែលគេស្គាល់ថា ជាមន្ត្រីរដ្ឋាភិបាល ដែលសម្បូរវោហាស័ព្ទ នៅក្នុងបណ្ដាញសង្គមនោះ បាន​ថ្លែងបន្តថា សកម្មភាពចម្លែកមួយទៀត គឺការអំពាវនាវ ជ្រៀតជ្រែក ដាក់កំហិតដល់តុលាការ អោយបោះ​បង់​ចោល សេចក្ដីសម្រេចនៃការវិនិច្ឆ័យ (លើសកម្មជនទាំង១១នាក់)។ លោកថា អង្គការដែលជាភ្នាក់ងារ​បរទេស ប្រើលុយបរទេស ពុំមែនជាអង្គការអំណាចរដ្ឋទេ ហើយគ្មានអាណត្តិជ្រៀតជ្រែក ឬដាក់សម្ពាធ ដល់​តុលាការនោះឡើយ។

មន្ត្រីរដ្ឋាភិបាលរូបនេះ បានអំពាវនាវឲ្យមានការប្ដឹងឧទ្ទរណ៍ ឡើងទៅសាលាឧទ្ទរណ៍ទៀត ប្រសិនបើករណី​នេះ មិនត្រូវបានខាងចុងចោទ ទទួលយក និងបានហៅការលើកឡើង របស់អង្គការលីកាដូ ថាជាការជ្រៀត​ជ្រែក​មួយ។ លោក ស៊ីផាន បានបន្តការវាយប្រហារ របស់លោក ទៅលើអង្កការការពារសិទ្ធិមនុស្ស នេះទៀត​ថា៖ «ការជ្រៀតជ្រែកនេះ គួរតែត្រូវបញ្ចប់ដោយខ្លួនឯង។ (...) អង្គការរបស់លោកស្រី តែងតែធ្វើយុទ្ធនាការ ជាសាធារណៈលើប្រធានបទតម្លាភាព និងប្រឆាំងវប្បធម៌និទណ្ឌភាព។ ហើយចង់បានណាស់ តុលាការ​ឯករាជ្យ ចុះហេតុដូចម្តេច ពេលនេះឧត្តមគតិខាងលើនេះ ទៅទីណាបាត់ ឬបំភ្លេចចោល ដើម្បីប្រឆាំងនឹង​តុលាការ ឬរដ្ឋាភិបាលកម្ពុជា?»

ចំពោះអ្នកស្រី ណាលី ពិឡូត វិញ បានថ្លែងអះអាង នៅក្នុងសេចក្ដីថ្លែងការណ៍ នោះថា៖ «នគរបាល បាន​ចូល​ក្នុងតុលាការភ្លាមៗ បន្ទាប់ពីចៅក្រម ចូលបន្ទប់ពិភាក្សា ដើម្បីចេញសាលក្រម។ នេះបានបង្ហាញយ៉ាង​ច្បាស់​ថា សវនាការនេះ គ្រាន់តែជាការសម្តែង ដោយមានការបញ្ចប់មួយ ដែលត្រូវបានគិតជាមុន ដោយត្រូវបានបង្កើត​ឡើង ដើម្បីគម្រាមកំហែងគណបក្សសង្គ្រោះជាតិ បន្ទាប់ពីព្រឹត្តិការណ៍ នៅខេត្តស្វាយរៀង កាលពីចុង​សប្តាហ៍​មុន។»