សម្ភាស៖ ធ្វើ​យ៉ាង​ណា ដើម្បី​ដណ្ដើម​​អំណាច​ពី​ចៅ​សង្កាត់​ធំ?

ចៅសង្កាត់រងទីពីរ នៃសង្កាត់ទួលសង្កែរ មកពីគណបក្សសង្គ្រោះជាតិ បានធ្វើការផ្តាំផ្ញើរ ទៅគ្រប់ចៅសង្កាត់​រង​ទាំង​អស់ ដែល​មក​ពី​គណបក្ស​ដូច​លោក ឲ្យចូលរួម ឬធ្វើការរំលែកការងារ ពីចៅសង្កាត់ធំ បើមិនអញ្ចឹងទេ ចៅ​សង្កាត់​នឹង​អោប​ការងារ​នោះ​ធ្វើ​តែ​ឯង មិនរវល់នឹងនរណាទាំងអស់។
Loading...
  • ដោយ: អ៊ុម វ៉ារី អត្ថបទ៖ អ៊ុម វ៉ារី ([email protected]) - យកការណ៍៖ស្រ៊ុន ទិត្យ - ភ្នំពេញ ថ្ងៃទី២១ កក្កដា ២០១៥
  • កែប្រែចុងក្រោយ: July 22, 2015
  • ប្រធានបទ: រដ្ឋបាល
  • អត្ថបទ: មានបញ្ហា?
  • មតិ-យោបល់

ក្នុងការងារណាក៏ដោយ ចៅសង្កាត់មួយចំនួន ដែលមកពីគណបក្សកាន់អំណាច តែងតែអោបក្រសោប ឬ​ក្តោបការងារទាំងអស់ មកលើខ្លួនតែម្នាក់ ពិសេសបើចៅសង្កាត់រងទីមួយ ឬទីពីរ មកពីគណបក្សផ្សេង ឬមក​ពីបក្សប្រឆាំងវិញនោះ រិតតែមិនទម្លាក់ការងារ ឲ្យធ្វើតែម្តង។ ដូច្នេះ តោងចៅសង្កាត់រងទី១ និងចៅសង្កាត់​រងទីពីរទាំងនោះ គិតខ្លួនឯងរួចជាស្រេចថា តើខ្លួនចេះអ្វីខ្លះ? តើខ្លួនដឹងអ្វី ពីច្បាប់ខ្លះ? តើខ្លួន ជាចៅសង្កាត់​«រង»នោះ ត្រូវមាននាទីធ្វើអ្វី? តើខ្លួនចេះឬទេ? ហើយបំរើពលរដ្ឋ យ៉ាងដូចម្តេច? នេះជាការលើកឡើង របស់​លោក គ្រុយ ខេមរិទ្ធ ចៅសង្កាត់រងទីពីរ នៃសង្កាត់ទួលសង្កែ ខណ្ឌមានជ័យ រាជធានីភ្នំពេញ នៅក្នុងកិច្ច​សម្ភាស​ផ្ដាច់មុខមួយ ជាមួយទស្សនាវដ្ដីមនោរម្យ.អាំងហ្វូ

ថ្លែងក្នុងកិច្ចសម្ភាស បន្ទាប់ពីបានឡើង មកទីស្នាក់ការគណបក្សសង្គ្រោះជាតិ ដើម្បីទទួលការងារថ្មី ក្នុងនាម​ជាចៅសង្កាត់រងនោះ លោក ខេមរិទ្ធ បានពន្យល់ថា មានមួយចំនួនធំ នៃការមិនចែករំលែកការងារ ពីសំណាក់​ចៅសង្កាត់ ដែលមកពីគណបក្សប្រឆាំងនោះ គឺបណ្ដាលមកពីការរើសអើង ដែលចេញពីទំនាស់ នៃនិន្នាការ​«គណបក្ស»នយោបាយ តែម្តង ហើយចៅសង្កាត់ទាំងនោះ មិនសូវបានគិត ឬបានផ្តោត ការយកចិត្តទុកដាក់ ជាសំខាន់ ទៅលើការបំរើប្រយោជន៍ប្រជាពលរដ្ឋ ឬប្រយោជន៍ ឃុំ/សង្កាត់ របស់ខ្លួនឡើយ។ ពីក្នុងចំណោម​នោះ មានចៅសង្កាត់/មេឃុំ មួយចំនួនតូច ក៏មិនចង់បែងចែកអំណាចរបស់ខ្លួន ទៅឲ្យចៅសង្កាត់«រង»ដែរ ព្រោះ​តែមិនចង់បាត់បង់អំណាច និងលាភសក្ការៈផ្ទាល់ខ្លួន។

លោកថា ទាំងនេះជាចំណោទ ដែលត្រូវចោទសួរ និងស្វែងរកដំណោះស្រាយ សម្រាប់ចៅសង្កាត់«រង» មិនថា​មកពីគណបក្សណាទេ ត្រូវបង្ហាញពីសមត្ថភាព និងលទ្ធភាព ដែលគិតថា ខ្លួនពិតជាអាចទទួល ការងារទាំង​នោះ ពីចៅសង្កាត់ យកមកអនុវត្ត ដោយមានប្រសិទ្ធិភាព និងតម្លាភាពបាន។ ក្នុងករណីដែលចៅសង្កាត់ មិន​ចែក​រំលែកការងារ មកឲ្យចៅសង្កាត់រងធ្វើការងារនោះ ជាទង្វើខុសនឹងច្បាប់ ហើយលោក ខេមរិទ្ធ បានប្រាប់​ពីដំណោះស្រាយថា នៅក្នុងករណីនេះ ចៅសង្កាត់រងទាំងអស់ អាចធ្វើការតវ៉ា ឬផ្តល់កិច្ចសម្ភាស ទៅកាន់អ្នក​សារព័ត៌មាន ពីបញ្ហាដែល ខ្លួនកំពុងជួបប្រទេះនេះ ព្រមទាំងត្រូវផ្តល់របាយការណ៍ ទៅកាន់ថ្នាក់លើ ដើម្បិស្វែង​រកដំណោះស្រាយបន្ថែម។

ចៅសង្កាត់រងខាងលើ បានបន្តថា ក្នុងនាមខ្លួនជាចៅសង្កាត់រង ត្រូវមើលពីជំហររបស់ចៅសង្កាត់/មេឃុំ នោះ​ថា តើគាត់មានជំហរយ៉ាងដូចម្តេច? តើគាត់ចូលចិត្តធម៌ក្តៅ ឬធម៌ត្រជាក់? បើគាត់ចូលចិត្តធម៌ក្តៅ តោង​និយាយ និងពិភាក្សាជាមួយគាត់ ក្នុងករណីគាត់ នៅតែរឹងទទឹង មិនព្រមប្រគល់ការងារ និងភារកិច្ច​មកចៅ​សង្កាត់«រង»ទេ នោះចៅសង្កាត់រង អាចផ្តល់កិច្ចសម្ភាស ជាមួយអ្នកសារព័ត៌មាន។ លោកបន្តថា ទាំងនោះ តោង​ចៅ​សង្កាត់​រង​ខ្លួន​ឯង មានសមត្ថភាពគ្រប់គ្រាន់ ក្នុងការទទួល ដោះស្រាយ និងអនុវត្តន៍ដែរ។

ផ្ទុយទៅវិញ បើចៅសង្កាត់«រង»ទាំងនោះ មិនចូលសាលាសង្កាត់ មិនចូលធ្វើការទេ តើគេអាចប្រគល់ការងារ ឲ្យយ៉ាងដូម្ដេចបាន? បែបនេះ នឹងផ្ដល់ឱកាស ឲ្យលោកចៅសង្កាត់ទាំងនោះ នូវលេសមួយ ដើម្បីចោទប្រកាន់​ចៅសង្កាត់រងនោះ និងប្រកាស នៅចំពោះប្រជាពលរដ្ឋថា៖ «បងប្អូនបោះឆ្នោតឲ្យពួកវា ពួកវាមិនធ្វើការអីផង​ហ្នឹង វាអត់ចូលសង្កាត់ផងហ្នឹង។»

លោក គ្រុយ ខេមរិទ្ធ បានលើកជាឧទាហរណ៍ផ្ទាល់ខ្លួនថា តាំងពីអាណត្តិទីមួយ «ចៅសង្កាត់ (មកពីគណបក្ស​ប្រជាជន) គេមិនអាចប្រគល់តំណែង ឲ្យយើងទេ។ លុះត្រាតែយើងហ្នឹង ចេះស្វែងយល់ពីតួនាទី និងភារកិច្ច យល់​ពីច្បាប់រដ្ឋបាល ឃុំសង្កាត់។ បើយើងយល់ ពីការងារអស់នោះហើយ ទើបយើងអាចទាមទារ នូវអំណាច ទាមទារនូវតួនាទី បានជាគេឲ្យយើងដែរ។»

លោកបន្តថា ការធ្វើការងាររួមគ្នា ដើម្បីពលរដ្ឋ និងដើម្បីសង្កាត់របស់ខ្លួន ឲ្យមានកិច្ចដំណើរការ និងកិច្ច​អភិវឌ្ឍន៍​បានល្អ បើទោះជាយើង (ចៅសង្កាត់ ចៅសង្កាត់រងទីមួយ និងរងទីពីរ) តោងជួយគិតគូរ និងផ្តល់​ជា​យោបល់ ឲ្យគ្នាទៅវិញទៅមក នូវភាពអវិជ្ជមាន ជាមួយគ្នានេះ តោងចេះទទួលយកគំនិតយោបល់ល្អៗ នៃ​អ្នក​ជុំវិញខ្លួន ដើម្បីពង្រឹង និងទាមការការទុកចិត្ត ពីពលរដ្ឋក្នុងមូលដ្ឋានរបស់ខ្លួនដែរ។ ត្រូវចេះប្រាប់ពីកំហុស និង​ជួយ​កែ​លំអ​រគ្នា មិន​មើលបំណាំគ្នា មិនប៉ែងជើងគ្នា មិនគិតពីប្រយោជន៍ផ្ទាល់ខ្លួន ឬបក្សពួកឡើយ។ តែក៏មិន​មាន​ន័យ​ថា ចូល​ដៃ​ចូល​ជើង ឃុបឃឹតគ្នា ឬដើរតាមផ្លូវខុស (ច្បាប់) ជាមួយគេទាំងនោះឡើយ៕


» ទស្សនាវីដេអូ ដែលទាក់ទងនឹងប្រធានបទនេះ៖

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...