មិនពិបាកយល់នោះទេ ព្រោះបើមានបញ្ហា គ្រោះថ្នាក់ចរាចរណ៍កើតឡើង ហើយភាគីណាមួយ មិននៅដោះ​ស្រាយ នោះមូលហេតុ វាច្បាស់ជាភាគីរត់គេចខ្លួននោះ គឺជាអ្នកខុស ហើយមិនហ៊ានប្រឈមមុខ។ ដូចជា​ករណីម្ចាស់រថយន្តបង្ក ម៉ាក តាកូមា (TACOMA) ស្លាកលេខភ្នំពេញ ២A-៦០៥៣ នេះជាដើម ដែលបាន​បង្ក​គ្រោះថ្នាក់ ជាមួយរថយន្តធន់ធ្ងន់ មួយគ្រឿង ម៉ាក នីសាន់ របស់ក្រុមហ៊ុន ឯកជនមួយ ស្លាកលេខ ភ្នំពេញ ៣A-៣៣៣២ ក្នុងទិសដៅស្របគ្នា ដោយវ៉ាស្តាំមិនផុត។

បុរសម្នាក់ នៅក្នុងហេតុការណ៍នេះ បានប្រាប់ឲ្យដឹងថា ដំបូងឡានទាំងពីរ បើកក្នុងទិសដៅស្របគ្នា តាម​បណ្តោយផ្លូវលេខ ២១៧ (ផ្លូវចំការដូង) ស្រាប់តែមកដល់ កន្លែងកើតហេតុ ទល់មុខ ហាងព្រះច័ន្ទពេញវង្ស់ ឡានតាកូមា ព្យាយាមបើកវ៉ារថយន្តធំ ពីខាងស្តាំយ៉ាងលឿន តែមិនបានសម្រេច ដោយប៉ះគៀរឡានធំ បណ្តាលឲ្យឡានតូចមួយនេះ ជ្រុលចង្កូតទៅចំហៀងផ្លូវម្ខាង ជាប់ដីទើបអស់ល្បឿន។

សាក្សីបន្ថែមទៀតថា ភ្លាមៗបន្ទាប់ពីកើតហេតុ ម្ចាស់រថយន្តបង្ក និងកម្មករប្រមាណ៦នាក់ នៅលើនោះ នាំគ្នា​រត់គេចខ្លូនគ្មានសល់ ទុកឡាន និងសម្ភារៈ នៅកន្លែងកើតហេតុទាំងអស់។ ចំណែកអ្នកបើកបរ ឡានធំរបស់​ក្រុមហ៊ុន រោងចក្រផលិតថ្ម ណឹមម៉េងគ្រុប សុំមិនប្រាប់ឈ្មោះ បានប្រាប់ទស្សនាវដ្តីមនោរម្យ.អាំងហ្វូថា អ្នក​បើកឡានតូចនោះ មិនដឹងថា វ៉ាជែងខាងណាត្រូវ។ លោកថា សំណាងហើយ ដែលគ្មានអ្នកណារបួស បើសិន​មានអ្នករបួសវិញ គេច្បាស់ជាចោទលោកថា ខុសមកពីឡានធំ មិនខាន។

ហេតុការណ៍នេះ ត្រូវបានមន្រ្តីប៉ុស្តិ៍ស្ទឹងមានជ័យម្នាក់ លោក ខៀវ ថានខ្សា ឲ្យដឹងនៅល្ងាចថ្ងៃ កើតហេតុថា ករណីនេះ ត្រូវបានបញ្ចប់គ្នា តាមទូរស័ព្ទជាមួយភាគីទាំងសងខាង។ មន្ត្រីរូបនេះ បានបញ្ជាក់ប្រាប់ឲ្យដឹងថា ឡានបង្ក ជាឡានដឹកសម្ភារៈ របស់មន្រ្តីខណ្ឌម្នាក់ ដែលត្រូវបានបើកបរ ដោយកូនចៅ និងក្រុមកម្មករ ភាគី​ទាំងពីរ បានបញ្ចប់បញ្ហារវាងគ្នា តាមរយៈទូរស័ព្ទរួចរាល់ នៅល្ងាចនោះ៕