ករណីបណ្ដេញអ្នកសារព័ត៌មាន ចេញពីរដ្ឋសភាព ទំនងជាត្រូវបានលោក ឈាង វុន និងអគ្គលេខាធិការ​ដ្ឋាន​រដ្ឋសភា ថ្លែងពង្វាង ដោយនិយាយយោង ពីសន្ដិសុខរបស់រដ្ឋសភាទៅវិញ នេះបើតាម លិខិតមួយច្បាប់ ចេញ​ដោយលោក ឡេង ប៉េងឡុង អគ្គលេខាធិការរដ្ឋសភា បន្ទាប់ពីការថ្លែង របស់លោក ឈាង វុន នៅក្នុង​សន្និសីទ​សារព័ត៌មាន ដែលប្រាប់លោក ខៀវ កាញារីទ្ធ ទាក់ទងនឹង«អធិបតេយ្យភាព» នៃបរិវេណរបស់​រដ្ឋសភា។

លិខិតចុះថ្ងៃទី១៧ ខែកក្កដា ឆ្នាំ២០១៥ របសអគ្គលេខសធិការដ្ឋាន រដ្ឋសភា បានឲ្យដឹងថា រដ្ឋសភាព ជា​ស្ថាប័ន​សាធារណៈរបស់រដ្ឋ មិនមែនជាកន្លែងសាធារណៈ ដូចទីលានប្រជាធិបតេយ្យ និងសួនច្បារសាធារណៈ នោះទេ។ ប៉ុន្តែចំពោះអ្នកសារព័ត៌មាន ពុំមានការហាមឃាត់ ក្នុងការទាក់ទង ធ្វើការចេញចូលណាមួយឡើយ ដោយគ្រាន់តែអ្នកសារព័ត៌មាន (១) ត្រូវមានប័ណ្ណអ្នកសារព័ត៌មាន ចេញដោយក្រសួងព័ត៌មាន ហើយត្រូវប្ដូរ​យកប័ណ្ណចេញចូល ពីមន្ត្រីសន្តិសុខរបស់រដ្ឋសភា និង (២) ត្រូវគោរពតាមការចាត់ចែង របស់​អគ្គលេខា​ធិការ​ដ្ឋាន​រដ្ឋសភា។

ទៅរៀនសូត្រឡើងវិញ ព្រោះរដ្ឋសភាមិនមែនជាផ្សារត្រី...

លិខិត ដែលចុះហត្ថលេខាដោយលោក ឡេង ប៉េងឡុង អគ្គលេខាធិការរបស់រដ្ឋសភា បានធ្វើឡើងនៅថ្ងៃទី១៧ ខែកក្កដា និងចេញផ្សាយ មកដល់ដៃអ្នកសារព័ត៌មាន នៅថ្ងៃទី១៨ ខែកក្កដា ក្រោយការថ្លែង ទៅកាន់អ្នក​សារព័ត៌មាន របស់លោក ឈាង វុន អ្នកនាំពាក្យ និងជាប្រធានគណៈកម្មការ កិច្ចការបរទេស សហប្រតិបត្តិការ​អន្តរជាតិ ឃោសនាការ និងព័ត៌មាននៃរដ្ឋសភា ដែលបានរំលឹកប្រដៅ ឲ្យរដ្ឋមន្រ្តីក្រសួងព័ត៌មាន លោក ខៀវ កាញារីទ្ធ ទៅ«រៀនសូត្រ»ឡើងវិញ ដោយបានអះអាថា រដ្ឋសភាមិនមែនជាទីផ្សារ«លក់ត្រី» សម្រាប់អ្នកណា​ចូលក៏បាននោះឡើយ។

ក្នុងសន្និសីទសារព័ត៌មាន កាលពីព្រឹកថ្ងៃទី១៧ ខែកក្កដា លោក ឈាង វុន បានថ្លែងថា នឹងផ្ញើលិខិត ព្រម​ទាំង​បទបញ្ជាផ្ទៃក្នុងរដ្ឋសភា ឲ្យលោក ខៀវ កាញារីទ្ធ បានអាន។ លោក ឈាង វុន និយាយថា៖ «ខ្ញុំសុំផ្ញើរ ម៉េសសេក (សារ) ហ្នឹង ជូនឯកឧត្តម ខៀវ កញារិទ្ធ មិនមែនចេះតែចូលមកទេ។ ត្រូវបង្ហាញ​ខ្លួននៅមុខ​សន្តិសុខ។ ហ្នឹង គេរៀបចំអញ្ចឹង។ ត្រូវទទួលយកស្លាកសញ្ញាភ្ញៀវ សម្រាប់ពាក់សម្គាល់។ (...) មិនមែនផ្សារត្រី​ទេណា! ផ្សារថ្មី ផ្សារត្រី ក៏មានបទបញ្ជារបស់គេ ក្នុងនោះដែរ ត្រូវធ្វើយ៉ាងម៉េចខ្លះ។ មិនមែនសួនច្បារ មុខវត្ត​បុទុមទេ។ (...) សូម​ប្រយ័ត្នប្រយ៉ែងអាហ្នឹងៗ។ ដោយខ្ញុំគ្រាន់តែថា សូមអភ័យទោសឧត្តម ខៀវ កញារិទ្ធ បើ​គាត់​មិនបាន​និយាយ​ទេ សុំទុកក្នុងធុងសម្រាមចុះ កុំលើកមកនិយាយ តែបើគាត់បាននិយាយពិតប្រាកដមែន សូមឲ្យគាត់​មើលច្បាប់ ទាំងឡាយឡើងវិញ។»

ប្រតិកម្មទាំងប៉ុន្មាន ខាងលើនេះ ត្រូវបានធ្វើឡើង បន្ទាប់ពីរដ្ឋមន្រ្តីក្រសួងព័ត៌មាន បានថ្លែងមកកាន់​អ្នក​សារព័ត៌មាន កាលពីថ្ងៃទី១៥ ខែកក្កដា កន្លងមកនេះ ដោយបានអះអាងថា «រដ្ឋសភា»គឺជាកន្លែងសាធារណៈ ដែលអ្នកសារព័ត៌មាន អាចចេញចូលធ្វើការរបស់ខ្លួន ដោយមិនត្រូវបាន មន្ត្រីសាធារណៈណាម្នាក់ មានសិទ្ធិ​បណ្ដេញចេញឡើយ។ ការថ្លែងរបស់លោក ខៀវ កាញារីទ្ធ ធ្វើឲ្យគេនឹកឃើញ ទៅដល់សកម្មភាព របស់លោក ឈាង វុន ដែលធ្លាប់បានបណ្តេញ អ្នកសារព័ត៌មាន ឲ្យចេញពីបរិវេណរដ្ឋសភា កាលពីថ្ងៃទី១ ខែកក្កដា ឆ្នាំ​២០១៥ ខណៈពេលអ្នកសារព័ត៌មាន កំពុងធ្វើកិច្ចសម្ភាស ជាមួយតំណាងរាស្រ្ត មកពីគណបក្សប្រឆាំង។

» សូមអានអត្ថបទទាក់ទងឡើងវិញ ដោយចុចនៅលើទីនេះ។

ទស្សនាវដ្តីមនោរម្យ.អាំងហ្វូ មិនអាចសុំប្រតិកម្ម ពីលោក ខៀវ កាញារីទ្ធ បានទេ នូវការលើកឡើងខាងលើ ហើយគេក៏មិនទាន់ឃើញលោករដ្ឋមន្ត្រី បានប្រតិកម្មតប ជាសាធារណៈវិញដែរ មកទល់នឹងពេលនេះ។ ប៉ុន្តែ​ការលើកឡើង រវាងលោក រដ្ឋមន្ត្រី និងលោក ឈាង វុន ដែលត្រូវបានអគ្គលេខាធិការរដ្ឋសភា បញ្ជាក់បន្ថែម នៅ​​ក្នុងលិខិតនោះ ត្រូវបានគេមើលឃើញថា បានធ្វើឡើងនៅក្នុងបរិបទខុសគ្នា។ លោក ខៀវ កាញារីទ្ធ និយាយ​​អំពីកិច្ចការ និងសិទ្ធិរបស់អ្នកសារព័ត៌មាន ខណៈលោក ឈាង វុន និងលោក ឡេង ប៉េងឡុង ហាក់​ដូច​ជា​និយាយ​ពង្វាង ពីសន្តិសុខរបស់រដ្ឋសភាពទៅវិញ (ជាឧទារហរណ៍៖ តើអ្នកសារព័ត៌មាន ចូលទៅលួចឆក់ នៅ​ក្នុងរដ្ឋសភាឬ? ឬដើម្បីសម្ភាសនរណាម្នាក់ ចាំបាច់ទៅសុំការអនុញ្ញាត ពីមន្ត្រីសន្តិសុខ ពីអគ្គលេខាធិការ ឬ​ពី​ប្រធានរដ្ឋសភាពឬ?)។

មន្រ្តីមួយរូប មកពីគណបក្សប្រឆាំង ដែលមានវត្តមាន ក្នុងសន្និសីទសារព័ត៌មាន បានខ្សឹបដោយសុំ​មិន​បញ្ចេញ​ឈ្មោះ ប្រាប់ទស្សនាវដ្តីមនោរម្យ.អាំងហ្វូថា៖ «ពេលនោះ (ពេលលោក ឈាង វុន ដេញអ្នកសារព័ត៌មាន ដែល​កំពុងសម្ភាស តំណាងរាស្ត្រគណបក្សប្រឆាំង) អ្នកសារព័ត៌មាន ក៏ចង់បានប្រតិកម្មភ្លាមៗ ពីភាគីបដិបក្ស ដូច្នេះ​ក៏ត្រូវសម្ភាស ឬសួរនាំនៅចំពោះមុខ ភ្លាមៗដែរ។ តែលោក ឈាង វុន បែរជាមក ដេញចេញ មិនឲ្យនិយាយ ដោយ​អះអាងថា មិនទាន់សុំការអនុញ្ញាត ពីប្រធានរដ្ឋសភា មុននឹងឆ្លើយនោះ។ (…) នេះជាចំណុច​ដែល​លោក ឈាង វុន ធ្វើ​ខុស ឆ្លើយ​ខុស និង​ប្រតិកម្មខុស។»៕

» រំលឹករូបភាពឡើងវិញ នៃការបណ្ដេញអ្នកសារព័ត៌មាន របស់លោក ឈាង វុន កាលពីថ្ងៃទី០១ ខែកក្កដា ឆ្នាំ២០១៥៖

» លិខិត របស់លោក ឡេង ប៉េងឡុង៖