តើសេចក្ដីព្រាងច្បាប់ស្ដីពី សមាគម និងអង្គការក្រៅរដ្ឋាភិបាល ពិតជាច្បាប់ ដែលប្រជាជាតិខ្មែរទាំងមូល ពិត​ជាត្រូវការមែនឬ? មិនប្រាកដជាដូច្នេះទេ ព្រោះក្រុមតំណាងរាស្ត្រ ដែលតំណាងឲ្យសម្លេងមួយភាគ របស់​ប្រជាជាតិខ្មែរ មិនបានយល់ស្របនឹងខ្លឹមសារនៃច្បាប់នេះទេ។ មិនត្រឹមតែប៉ុណ្នឹង តំណាងរាស្ត្រមួយរូប ថែម​ទាំងចោទថា សេចក្ដីព្រាងច្បាប់ ដែលត្រូវបានរដ្ឋសភាព ដែលមានតំណាងរាស្ត្រ មកពីឯកបក្សចូលរួមប្រជុំ អនុម័តនោះ ថាជាសេចក្ដីព្រាងច្បាប់ ដែលមិនគ្រប់ខែ នោះទៀត។

ក្នុងកិច្ចសម្ភាស ជាមួយទស្សនាវដ្តីមនោរម្យ.អាំងហ្វូ នាព្រឹកថ្ងៃទី១៣ ខេកក្កដា ឆ្នាំ២០១៥នេះ លោក រៀល ខេមរិន្ទ្រ តំណាងរាស្រ្តមណ្ឌលស្វាយរៀង មកពីគណបក្សសង្គ្រោះជាតិ បានប្រៀបប្រដូច ការអនុម័ត​សេចក្ដី​ព្រាងច្បាប់មួយនេះ ទៅនឹងកូន ក្នុងផ្ទៃម្តាយមួយ ដែលមិនទាន់ដល់ពេល ឬគ្រប់ខែ ត្រូវប្រសូត្រនោះឡើយ។

ការលើកឡើង របស់មន្រ្តីគណបក្សសង្គ្រោះជាតិរូបនេះ ហាក់ចង់ប្រៀបប្រដូចបក្សខ្លួន (គណបក្ស​សង្គ្រោះ​ជាតិ) ថាជាឪពុក នៃសេចក្តីព្រាងច្បាប់ខាងលើ ហើយក៏ហាក់ចាត់ទុក គណបក្សប្រជាជនកម្ពុជា ជាម្តាយ​យ៉ាងដូច្នោះដែរ។ លោកបន្តថា ច្បាប់នេះ នៅឡើយមិនសមល្មម នឹងលើកយកមកអនុម័តឡើយ មានន័យ​ថា ប្រពន្ធខ្លួន (គណបក្សប្រជាជនកម្ពុជា) មិនទាន់គ្រប់ខែ ដើម្បីឈានដល់ពេលវេលាមួយ ឆ្លងទន្លេ​តាម​ច្បាប់​ធម្មជាតិឡើយ តែឥឡូវនេះ ប្រពន្ធរបស់ខ្លូន ក៏កំពុងត្រូវបានវះកាត់ដោយរដ្ឋសភា ក្នុងការបង្កើតកូនមួយ ដែល​មិនទាន់គ្រប់ខែផងនោះ ឲ្យមានកំណើតឡើង។

តំណាងរាស្រ្តរូបនេះ បានលើកឡើងថា ការពិតទៅច្បាប់នោះ នៅមានពេលវេលាច្រើនណាស់ សម្រាប់ការ​ជជែក ពិភាក្សាគ្នា មានន័យថា កូននោះអាចរស់នៅក្នុងផ្ទៃម្តាយ រហូតដល់គ្រប់ខែ តាមច្បាប់ធម្មជាតិ គឺប្រាំបួន​ខែ ដប់ថ្ងៃ។ លោកបន្តថា ម្តាយដែលជាគណបក្សប្រជាជនកម្ពុជា មានចរិតរឹងរួស ចង់ឈ្នះចាញ់ នៅតែបង្ខំ​ពេទ្យ (រដ្ឋសភា) ឲ្យវះកាត់បង្កើតកូន ឲ្យខានតែបាន បើទោះដឹងថាមានឧបសគ្គ ឬគ្រោះថ្នាក់ ដល់ទាំងជីវិត​កូន និងជិវិតម្តាយខ្លួនឯងក៏ដោយ។

លោក ខេមរិន្ទ្រ បានថ្លែងឡើងថា៖ «ទារកដែលគ្រប់ទឹក គឺ៩ ខែ ១០ថ្ងៃ។ ការបង្កើតច្បាប់នេះ ប្រៀបដូច​ទារក​មួយ ដែលបង្កើតមក ទើបតែ៥-៦ ខែកើត នោះវាក៏នឹងមិនគ្រប់ទឹក។ ដូច្នេះច្បាប់នេះ មិនគ្រប់គ្រាន់ ឮហើយ​យកជាផ្លូវការបានដែរ ព្រោះជាធម្មតាររដ្ឋសភា ជាសភាជាតិ ត្រូវមាន១២៣រូប តែបើការអនុម័ត​ច្បាប់៥០%​បូក១ ជាចំនួនមួយភាគ ហើយចំនួនមួយភាគទៀត ៥៥(សម្លេង) មិនបានចូលរួម ច្បាប់នោះ គ្មានប្រយោជន៍ និងគ្មានប្រសិទ្ធិភាព និងតម្លាភាព។»

លោកបានបង្ហាញ នូវហេតុផលមួយថា ការបង្កើតច្បាប់មួយនេះ ដោយតក់ក្រហល់ ទាំងមិនគ្រប់ខែ របស់ គណបក្សប្រជាជនកម្ពុជា ថា ក៏ជាការបង្កើតកូនមួយ ដែលមិនគ្រប់ទឹក ព្រោះតែម្តាយដែលជា គណបក្ស​ប្រជាជន​កម្ពុជា អាចប្រើប្រាស់លទ្ធភាពនេះ គ្រាប់គ្រាន់ ក្នុងការគ្រប់គ្រង ឬចង់ឃុំឃាំង ឬវាយអ្នកណា​ម្នាក់​ដោយ យកកូនមិនគ្រប់ទឹកនោះ មកប្រើប្រាស់ ជាលេស។ លោក បានថ្លែងឲ្យដឹងទៀតថា៖ «កាលណាគេ (គណបក្សប្រជាជនកម្ពុជា) គ្រប់គ្រងបាន អ្វីក៏ដោយបើគេដាក់ក្រោល ដាក់ខ្នោះ បាននោះគេក៏មានភាព​ងាយ​ស្រួល ក្នុងការគ្រប់គ្រងយើង។ ឥឡូវច្បាប់នេះ មិនទាន់ទាំងបានគ្រប់គ្រង ដោយរដ្ឋាភិបាលគណបក្ស​ប្រជាជន​ផង ឃើញមានការវាយតប់ និងចាប់ប្រជាពលរដ្ឋដាក់គុក ច្រវ៉ាក់ ចុះទម្រាំច្បាប់ ដែលគ្រប់គ្រង​ដោយ​គណបក្ស​ប្រជាចនកម្ពុជា រដ្ឋាភិបាលដែលដឹកនាំ ដោយលោក ហ៊ុន សែននោះ សឹងថាសម្លាប់មនុស្ស ដោយក្រៅ​ប្រព័ន្ធ​ច្បាប់​បាន។»

សូមបញ្ជាក់ថា នាព្រឹកថ្ងៃទី១៣ ខែកក្កដា ឆ្នាំ២០១៥នេះ តំណាងរាស្រ្តមកពីគណបក្សសង្រ្គោះជាតិ ទាំង៥៥រូប បានធ្វើពហិការ មិនចូលរួមប្រជុំសភា ជាលើកទីពីរ។ លើកទីមួយ អំឡុងពេលបង្កើតរដ្ឋសភា នីតិកាលទី៥នេះ និងលើកទីពីរ ក្នុងកិច្ចពិភាក្សា និងអនុម័តសេចក្តីព្រាងច្បាប់ សមាគម និងអង្គការមិនមែនរដ្ឋាភិបាល។ ច្បាប់​នេះ បានចាប់កំណើតជាផ្លូវការ ភ្លាមៗ ក្រោមសម្លេងអនុម័ត៦៨ លើ៦៨ ដែលជាសម្លេង របស់តំណាងរាស្ត្រ មកពីគណបក្សប្រជាជនកម្ពុជាតែមួយ៕

» សូមទស្សនាកិច្ចសម្ភាសដូចខាងក្រោម៖