ស្ត្រីបុរស ដែលមិនស្គាល់អត្តសញ្ញាណ ទាំង០៩រូបនោះ ត្រូវបានកងកម្លាំង អន្តោប្រវេសន៍ឃាត់ខ្លូន កាលពី ម៉ោង០៣ សៀល ថ្ងៃទី០៧ ខែកក្កដា ឆ្នាំ២០១៥ នៅចំណុចពីរខុសគ្នា។ ទីមួយ នៅក្នុងហាងកាហ្វេ យីហោ «ណាត់កាហ្វេរ» និងមួយកន្លែងទៀត យីហោ«កោសជប់» ដែលស្ថិតនៅតាមបណ្តោយផ្លូវ ៣៧១ សង្កាត់​បឹង​ទំពន់ ខណ្ឌមានជ័យ រាជធានីភ្នំពេញ។

មន្រ្តីអន្តោប្រវេសន៍ ដែលបានចុះទៅដល់ទីតាំង បានបញ្ជាក់ថា អាជ្ញាធរបានឃាត់ខ្លូន ជនជាតិវៀតណាម ០៩រូប ក្នុងនោះស្រ្តី០៨ នាក់ និងបុរសម្នាក់។ នៅក្នុងខ្លូនអ្នកទាំង០៩រូប គ្មានឯកសារណាមួយ ដែលបញ្ជាក់ថា ខ្លូន​មានក្រដាសស្នាមខ្មែរនោះទេ។ កម្លាំងអន្តោប្រវេសន៍ បានឲ្យដឹងទៀតថា អ្នកទាំងនោះនិយាយភាសាខ្មែរ មិន​ច្បាស់​ទៀតផង។

បច្ចុប្បន្នក្រុមស្រ្តីបុរស ជនជាតិវៀតណាមទាំង០៩រូប ដែលត្រូវបានមន្ត្រីអន្តោប្រវេសន៍រកឃើញ ថាបានបើក​កន្លែងរកស៊ី និងរស់នៅខុសច្បាប់ខាងលើ កំពុងត្រូវបញ្ជូនខ្លូន ទៅកាន់ការិយាល័យអន្តោប្រវេសន៍ រាជធានី​ភ្នំពេញ ដែលគ្រោងនឹងរៀបចំឯកសារ បញ្ជូនអ្នកទាំងនោះ ទៅកាន់ប្រទេសរបស់ខ្លូនវិញ។ មន្ត្រីអន្តោ​ប្រវេសន៍ បាន​ប្រាប់​ឲ្យដឹងទៀតថា មិនមែនជាលើកទីមួយទេ ដែលអាជ្ញាធរអន្តោប្រវេសន៍កម្ពុជា បញ្ជូនខ្លូន​ជនជាតិ​វៀតណាម ឲ្យត្រឡប់ទៅវិញនោះ ហើយបានអះអាងបន្ថែមថា ការឃាត់ខ្លូននឹងនៅ តែមានធ្វើជាបន្តបន្ទាប់ ក្នុង​ពេល​ខាង​មុខ៕