លោកតា អាឡិចសេនឌ័រ និងលោកយាយ ជេនណែត តូកស្កូ បានរួមរស់ជាមួយគ្នា សឹងតែពេញមួយ​ជីវិត​នេះ។ គូស្នេហ៍មួយគូនេះ បានស្គាល់គ្នាតាំងពីនៅកុមារ នៅពេលដែលពួកគាត់ទើបនឹងមានអាយុ៨ឆ្នាំ នៅ​ក្បែរក្រុង សានឌីយ៉េហ្គូ។ ពួកគាត់ទាំងពីនាក់ បានរៀបការជាមួយគ្នា នៅឆ្នាំ១៩៤០។

នៅក្នុងសេចក្ដីរាយការណ៍មួយ របស់ទូរទស្សន៍តំបន់ «10 News KGTV» របស់អាមេរិក បានឲ្យដឹងថា ស្ថានភាពសុខភាព របស់លោកតា អាឡិចសេនឌ័រ ដែលមានអាយុ៩៦ឆ្នាំ បានធ្លាក់ចុះដុនដាបខ្លាំង ដោយ​មូលហេតុបាក់ឆ្អឹងត្រគាក។ ដោយមានលោកយាយ មករស់នៅក្បែររហូតនោះ លោកតាបានសម្រេច​រស់​នៅ ក្នុងគេហដ្ឋានតូចល្មមួយ ដើម្បីអាចទទួលបាន នូវការព្យាបាលដ៏ងាយស្រួល ពីសំណាក់គ្រូពេទ្យ។

ដោយឃើញស្វាមីចាស់ព្រឹទ្ធរបស់ខ្លួន កាន់តែរីងរៃ ពីមួយថ្ងៃទៅមួយថ្ងៃ ស្ថានភាពសុខភាព របស់លោក​យាយ ជេកណែត តូកស្កូ ដែលមានអាយុ៩៥ឆ្នាំដែរនោះ ក៏ចេះតែអស់សង្ឃឹមទៅដែរ។

ចាំអូនផង...

ហើយទីបំផុតទៅ លោកតា អាឡិចសេនដ័រ បានលាចាកលោក នៅក្នុងរង្វង់ដៃភរិយាចំណាស់របស់ខ្លួន។ លោកយាយបាននិយាយខ្សិបខ្សួល ដាក់ត្រជៀកស្វាមី ដែលស្ចាប់លែងឮទៅហើយថា៖ «ជាអ្វីដែល​បង​ចង់​បាន។ បងបានស្លាប់ នៅក្នុងដៃរបស់អូន ហើយអូនស្រឡាញ់បង។ អូនស្រឡាញ់បង។ ចាំអូនផង... អូន​នឹង​ទៅតាមបង ក្នុងពេលបន្តិចទៀត។»

បន្ទាប់ពីលោកតា បានលាចាកលោក មិនទាំងដល់ ២៤ម៉ោងផង លោកយាយ ជេកណែត ក៏បានផុតដង្ហើម ស្លាប់ទៅដែរ។ អ្នកទាំងពីរមានកូន៥នាក់ ចៅ១០នាក់ និងចៅលួត៦នាក់ ហើយប្រវត្តិស្នេហ៍អមតៈ របស់​ពួក​គាត់ មិនមាននរណាម្នាក់ គិតថានឹងបំភ្លេចចោលឡើយ៕

» ខាងក្រោមនេះ ជារូបភាព បង្ហាញពីជីវិតរបស់គូស្នេហ៍ទាំងពីរ និងបទយកការណ៍ របស់ស្ថានីយទូរទស្សន៍ ក្នុងតំបន់៖