ខេត្តឡុងអានប្រាប់ខេត្តស្វាយរៀង ឲ្យទប់ស្កាត់«ពួកជ្រុលនិយម»
- ដោយ: ដារា រិទ្ធ អត្ថបទ៖ ដារា រិទ្ធ ([email protected]) - ភ្នំពេញថ្ងៃទី០៣ កក្កដា ២០១៥
- កែប្រែចុងក្រោយ: July 03, 2015
- ប្រធានបទ: ព្រំដែន
- អត្ថបទ: មានបញ្ហា?
- មតិ-យោបល់
-
ប្រធានគណកម្មាធិការប្រជាជនបដិវត្តន៍ ខេត្តឡុងអាន លោក ដូ ហ៊ុយឡាំ (Do Huu Lam) បានផ្ញើរលិខិតមួយ មកអភិបាលខេត្តស្វាយរៀង លោក ជៀម អំ ស្នើឲ្យមានវិធានការបង្ការ ឱ្យបានគ្រប់គ្រាន់ ដើម្បីការពារឱ្យមានប្រសិទ្ធិភាព កុំឲ្យមានឧបទ្ទវហេតុកើតឡើងជាថ្មី ដូចការប៉ះទង្គិចកាលពីថ្ងៃទី២៨ ខែមិថុនា ឆ្នាំ២០១៥។ នេះ បើតាមការផ្សាយឲ្យដឹង របស់សារព័ត៌មានវៀតណាមជាច្រើន ជាពិសេសសារព័ត៌មាន «DatViet» ចេញផ្សាយនៅព្រឹក ថ្ងៃសុក្រ ទី០៣ ខែកក្កដានេះ។
លិខិតចុះថ្ងៃទី០២ ខែកក្កដា របស់លោក ដូ ហ៊ុយឡាំ បានស្នើអាជ្ញាធរមានសមត្ថកិច្ច នៃប្រទេសកម្ពុជា ឲ្យចាត់វិធានការគួរឲ្យទទួលយកបាន ធ្វើយ៉ាងណា ដើម្បីដោះស្រាយឧប្បត្តិហេតុ ដែលបានកើតឡើង កាលពីថ្ងៃទី២៨ ខែមិថុនា ឆ្នាំ២០១៥ និងធ្វើយ៉ាងណា ការពារទប់ស្កាត់ ប្រកបដោយប្រសិទ្ធិភាពខ្ពស់ កុំឱ្យកើតមានឡើង នូវករណីស្រដៀងគ្នានេះជាថ្មីទៀត ដែលអាចធ្វើឲ្យរំខាន ដល់ដំណើរបោះបង្គោលខ័ណ្ឌសីមា រវាងប្រទេសទាំងពីរ។ លិខិតនោះ បានសរសេរបន្ថែមថា សកម្មភាពរបស់ ក្រុម«ជ្រុលនិយម»ទាំងនេះ នឹងឈានទៅធ្វើឲ្យខូច ដល់ទំនាក់ទំនងជាអ្នកជិតខាង ដល់ចំណងមិត្តភាព និងកិច្ចសហប្រតិបត្តិការ រវាងខេត្តទាំងពីរ។
ការផ្ទុះអំពើហិង្សា វាយដុំគ្នា បានផ្ទុះឡើង កាលពីថ្ងៃទី២៨ ខេមិថុនា ឆ្នាំ២០១៥ម្សិលម៉ិញ នៅតាមព្រំដែនកម្ពុជា វៀតណាមខេត្តស្វាយរៀង រវាងប្រជាពលរដ្ឋវៀតណាម និងក្រុមយុវជនកម្ពុជា ដែលបានចុះអង្កេតព្រំដែន ដឹកនាំដោយក្រុមតំណាងរាស្រ្ត មកពីគណបក្សសង្គ្រោះជាតិ។ ហេតុការណ៍ប៉ះទង្គិចគ្នានេះ បានកើតឡើងត្រង់ចំណុច ភូមិឆ្លក ឃុំត្នោត ស្រុកកំពង់រោទិ៍ ខេត្ត ស្វាយរៀង (បង្គោលព្រំដែនលេខ២០៣)។ ក្រុមពលរដ្ឋកម្ពុជា ប្រមាណជាង១០០នាក់ ត្រូវបានពលរដ្ឋ និងកម្លាំងសមត្ថកិច្ចវៀតណាមរារាំង ស្ទាក់ផ្លូវ មិនឲ្យចូលទៅពិនិត្យមើលព្រំដែន ដែលមានការសង្ស័យថា វៀតណាមបានរំកិល រំលោភចូលក្នុងដីកម្ពុជា។
លិខិតរបស់អាជ្ញាធរខេត្តឡុងអាន ជាលិខិតផ្លូវការ ផ្ញើរមកអាជ្ញាធរកម្ពុជា លើកទីពីរ បន្ទាប់ពីកំណត់ទូតលើកទីមួយ ត្រូវបានក្រសួងការបរទេសវៀតណាម ផ្ញើរមកកម្ពុជា កាលពីថ្ងៃទី៣០ ខែមិថុនា ថ្កោលទោសចំពោះការបង្កហេតុ ដែលប្រទេសកុម្មុយនីស បានហៅថា បង្កឡើងដោយ«ពួកជ្រុលនិយម»កម្ពុជា។
អ្នកនាំពាក្យ ក្រសួងការបរទេសវៀតណាម លោក ឡេ ហាយប៊ិញ (Le hai binh) ត្រូវបានស្រង់សំដី ដោយសារព័ត៌មាននានា នៅក្នុងប្រទេសវៀតណាម យកមកផ្សាយថា៖ «យើងខ្ញុំសូមរិះគន់យ៉ាងខ្លាំង ចំពោះសកម្មភាពហិង្សា ដែលប្រព្រឹត្ត ដោយជនជ្រុលនិយមកម្ពុជា។ (…) ល្មើសច្បាប់ប្រទេសទាំងពីរ, សន្ធិសញ្ញា, អនុសញ្ញា និងកិច្ចព្រមព្រៀង រវាងប្រទេសវៀតណាម និងកម្ពុជា។ ធ្វើឲ្យប៉ះពាល់ដល់ដំណើរការ បោះបង្គោលព្រំដែន និងទំនាក់ទំនងដ៏ល្អ រវាងវៀតណាម និងកម្ពុជា។ (…) សូមអំពាវនាវ ឲ្យស្ថាប័នពាក់ព័ន្ធរបស់កម្ពុជា ត្រូវមានវិធានការទប់ស្កាត់ កុំឲ្យសកម្មភាពដដែលនេះ កើតឡើងជាថ្មីទៀត។»
សម្រាប់រដ្ឋាភិបាលកម្ពុជាវិញ បានថ្លែងឡើងថា កំពុងស្វែងរក ដំណោះស្រាយលើបញ្ហានេះ។ អ្នកនាំពាក្យ ទីស្តីការគណៈរដ្ឋមន្រ្តី លោក ផៃ ស៊ីផានក្នុងកិច្ចសម្ភាស ជាមួយទស្សនាវដ្តីមនោរម្យ.អាំងហ្វូ កន្លងមក បានលើកឡើងថា រដ្ឋាភិបាលនឹងស្វែងរក ដើមហេតុដំបូង ដែលនាំឲ្យកើតនូវអំពើហិង្សានោះ។ យ៉ាងណា លោកថា បញ្ហានេះអាចបញ្ចប់ទៅបាន ត្រូវឆ្លងកាត់ការជួបគ្នា រវាងរដ្ឋាភិបាលទាំងពីរ ដោយអនុវត្តតាមច្បាប់។
ដោយឡែក រដ្ឋបាលខេត្តស្វាយរៀង បានប្រកាស មិនទទួលខុសត្រូវ ចំពោះផ្លូវច្បាប់ណាមួយ លើការប៉ះទង្គិចខាងលើនេះទេ ដោយយោងមូលហេតុថា ដំណើររបស់ គណបក្សសង្គ្រោះជាតិ ទៅកាន់តំបន់នៅព្រំដែននោះ មិនបានជូនដំណឹង ទៅអាជ្ញាធរ និងសមត្ថកិច្ចពាក់ព័ន្ធ ដើម្បីរៀបចំការពារសន្តិសុខ សុវត្ថិភាព សណ្តាប់ធ្នាប់ ក៍ដូចជាជូនដំណឹង ទៅភាគីវៀតណាមជាមុន ដើម្បីបញ្ចៀស ហេតុការណ៍ផ្សេងៗ កើតឡើងឡើយ។ នេះ បើតាមសេចក្តីប្រកាសព័ត៌មានមួយ ចុះថ្ងៃទី២៨ ខែមិថុនា ឆ្នាំ២០១៥ របស់អ្នកនាំពាក្យរដ្ឋបាល ខេត្តស្វាយរៀង៕