បុរសម្នាក់ ដែលមានអាយុ ប្រមាណជាង ២០ឆ្នាំ បានចូលទៅប្លន់ធនាគារ សេនតេនដ័រ កណ្ដាលក្រុងញ៉ូយក សហរដ្ឋអាមេរិក ដោយជិះយាន្ដមួយដ៏ទំនើប៖ រទេះជនពិការ។ បន្ទាប់ពីជិះរទេះជនពិការ ចូលមកក្នុងធនាគារ ជននេះ បានចូលទៅក្បែរ បុគ្គលិកធនាគារម្នាក់ មុននឹងគម្រាមឲ្យបុគ្គលិកនោះ ថាខ្លួនមានអាវុធ និងស្នើឲ្យ​ប្រគល់ប្រាក់មកខ្លួន។ ក្រោយពីទទួលបានប្រាក់ ១២០០ដុល្លារ (ត្រូវជា១១អ៊ឺរ៉ូ) ពីបុគ្គលិកនោះរួច ជនដ៏ចម្លែក បានជិះរទេះរបស់ខ្លួន គេចចេញពីធនាគារ ដោយសុវត្ថិភាព។

នៅក្នុងវីដេអូខាងលើ ដែលត្រូវបានបង្ហោះចេញ ដោយនគរបាលក្រុងញ៉ូយក ដើម្បីស្វែងរកចាប់ខ្លួននោះ គេ​ឃើញជននេះ បានជិះរទេះរបស់ខ្លួន កាត់ពីមុខហាងទំនិញមួយ ដែលនៅក្បែរនឹងធនាគារ។

នៅក្នុងរូបភាព ដែលចាប់បានដោយកាម៉េរ៉ាសុវត្ថិភាព របស់ធនាគារ ក៏មិនបានបង្ហាញឲ្យឃើញដែរថា ចោរ​ប្លន់ម្នាក់នេះ មានប្រដាប់ដោយអាវុធ ឬដកអាវុធចេញមកនោះទេ។ តែល្បឿននៃការបញ្ជារទេះ ក្នុងការគេចខ្លួន មានលក្ខណៈលឿនគួរឲ្យកត់សម្គាល់។ អាចនិយាយថា លឿនជាងល្បឿនឧទ្ធម្ភាគចក្រ របស់កងកម្លាំង​នគរបាល ដែលបានមកដល់ ក្រោយហេតុការណ៍នេះ តែបន្តិចផង។

ការប្លន់ធនាគារ ដោយជិះរទេះនេះ មិនមែនជាលើកទីមួយទេ។ កាលពីឆ្នាំ២០១០ បុរសម្នាក់អាយុជាង៦០ឆ្នាំ ត្រូវបានចាប់ខ្លួន បន្ទាប់ពីបានចូល ទៅប្លន់ធនាគារមួយ នៅក្នុងរដ្ឋអាយដាហូ (Idaho) ភាគខាងជើង​សហរដ្ឋ​អាមេរិក ខណៈពេលដែលបុរសម្នាក់នេះ ប៉ុនប៉ងជិះរថយន្ដតាក់ស៊ី ដើម្បីគេចខ្លួន។ បុរសចំណាស់បានពន្យល់ ប្រាប់នគរបាលថា នៅក្នុងពន្ធនាគារ ខ្លួននឹងអាចទទួល នូវការព្យាបាលមួយ  ដែលខ្លួនមិនមានប្រាក់​ដើម្បី​ចំណាយ៕

» នេះជាវីដេអូមួយទៀត គូរបង្ហាញពីសកម្មភាព របស់ជនសង្ស័យ៖