ដោយទំនងជាមាន ការប្រយ័ត្នប្រយ៉ែងជាមុន ទើបនាំគ្នាស្លៀកពាក់ តែងខ្លួនជាប្រុស ដើម្បីជិះម៉ូតូចេញ​មក​ក្រៅ នៅវេលាទៀបភ្លឺ។ ប៉ុន្តែក្រុមចោរ មិនបានយល់ថា ម្ចាស់ម៉ូតូមានភេទជាអ្វីទេ ឲ្យតែមានឱកាស និង​ច្បាប់​ទម្លាប់ នៅក្នុងប្រទេស នៅមានការធូររលុងផងនោះ ពួកគេនឹងធ្វើសកម្មភាពភ្លាម។

នេះជាករណីប្លន់មួយ ដែលបានកើតឡើង យ៉ាងអកុសល ទៅលើស្ត្រីពីរនាក់ ដែលខិតខំតែងខ្លួន ជាប្រុស​ហើយ នៅតែត្រូវក្រុមជន ០៤នាក់ ប្រដាប់ដោយអាវុធ ប្លន់យកម៉ូតូមួយគ្រឿង របស់ពួកនាងទៅបាត់។

ហេតុការណ៍នេះ បានកើតឡើងកាលពីវេលាម៉ោង ២និង២០នាទី ទៀបភ្លឺថ្ងៃទី ៣០ ខែមិថុនា ឆ្នាំ២០១៥ នៅ​តាមបណ្តោយផ្លូវព្រះនរោត្តម ជិតផ្ទះថៅកែស្រាបៀ ថៃគើ ក្នុងសង្កាត់ទន្លេបាសាក់ ខណ្ឌចំការមន រាជធានី​ភ្នំពេញ។ ក្រុមជនសង្ស័យទាំងបូនរូប មិនត្រូវបានគេស្គាល់អត្តសញ្ញាណនោះទេ។

តាមការបញ្ជាក់ របស់ស្រ្តីរងគ្រោះទាំងពីរនាក់ បានឲ្យដឹងថា នាងធ្វើដំណើរចេញពីម្តុំគិរីរម្យ តាម​បណ្តោយ​ផ្លូវខាងលើ ស្រាប់តែមកដល់កន្លែងកើតហេតុ មានម៉ូតូពីរគ្រឿងបើកតាមពីក្រោយ បន្ទាប់មក បានដក​កាំភ្លើង​ខ្លីពីរដើម ផ្ជង់គម្រាមសម្លាប់ បើនាងមិនប្រគល់ម៉ូតូ ដែលមានម៉ាក MSX ពណ៍ ស លាយក្រហម។ ពួក​នាង​បានបន្តទៀតថា នាងគ្រាន់តែមើលទាន់ថា អ្នកទាំងបួននោះ ជិះម៉ូតូធំ (ឌូក) មួយ និងម៉ូតូម៉ាក សុយស៊ូគីនិច មួយ។

សាក្សីដែលឃើញហេតុការណ៍ បានបញ្ជាក់ថា បន្ទាប់ពីធ្វើសកម្មភាពរួច ជនសង្ស័យជាក្រុមចោរ៤ នាក់ បាន​បើកម៉ូតូរត់គេចខ្លូន ដោយសុវត្តិភាព។ ភ្លាមៗ បន្ទាប់ពីកើតហេតុ ស្រ្តីតែងខ្លូនជាបុរស បានប្តូរសម្លៀកបំពាក់ ជាស្រ្តីវិញ រួចទៅដាក់ពាក្យប្តឹង នៅប៉ុស្តិ៍នគរបាលរដ្ឋាបាល ទន្លេបាសាក់ ដើម្បីតាមចាប់ក្រុមចោរ ដែល​បាន​ប្លន់​ម៉ូតូ​របស់ពួកនាងយកទៅ៕