ក្បួន​​យុទ្ធនាការ​ប្រឆាំង​នឹង​សេចក្ដី​ព្រាង​ច្បាប់ NGO ត្រូវ​បាន​រារាំង

ក្បួនដង្ហែប្រឆាំងសេចក្ដីព្រាងច្បាប់ គ្រប់គ្រងអង្គការសង្គមស៊ីវិល ត្រូវបានរារាំង នៅព្រឹកនេះ ដោយ​ក្រុម​អាជ្ញាធរ។ យ៉ាង​ណា​ក៏​ដោយ ក៏ក្បួន​ដង្ហែ របស់​ក្រុម​អង្គការ សមាគម សហជីព ដែលមានប្រមាណ ជាង​១០០​អង្គការ សមាគម និង​មាន​អ្នក​ចូលរួម ប្រមាណ​ជាង​៥០០​អង្គ/នាក់ ដោយចែក​ចេញ​ជា​បួន​ក្រុម​ទីទៃ​ផ្សេង​គ្នា​នោះ បាន​​ធ្វើ​​ដំណើរ​​ទៅ​​ជួបជុំ​​គ្នា ​បាន​សម្រេចនៅ​មុខ​រដ្ឋសភា។
Loading...
  • ដោយ: អ៊ុម វ៉ារី អត្ថបទ៖ អ៊ុម វ៉ារី ([email protected]) - យកការណ៍៖ស្រ៊ុន ទិត្យ - ភ្នំពេញ ថ្ងៃទី៣០ មិថុនា ២០១៥
  • កែប្រែចុងក្រោយ: June 30, 2015
  • ប្រធានបទ: ច្បាប់ NGO
  • អត្ថបទ: មានបញ្ហា?
  • មតិ-យោបល់

នាវេលាម៉ោងជិត១០ ព្រឹកថ្ងៃទី៣០ ខែមិថុនា ឆ្នាំ២០១៥នេះ ក្បួនដង្ហែរ និងបើកយុទ្ធនាការ របស់ក្រុមអង្គការ​សង្គមស៊ីវិល បានជួបនូវការរារាំង ពីសំណាក់កងកម្លាំងសន្ដិសុខ បង្កឲ្យមានការប៉ះទង្កិចគ្នា នៅតាមបណ្ដោយ​មហាវិថីកម្ពុជាក្រោម និងនៅតាមវិថីផ្សេងទៀតមួយចំនួន ខណៈពួកគេព្យាយាមហែរក្បួនទាំងនេះ ទៅ​កាន់​វិមានរដ្ឋសភា។

ចំពោះមុខព្រួញទាំង៤ទិសដៅ លើផ្លូវជាតិធំៗទាំង៤ នៃអ្នកតវ៉ា មកពីបណ្ដាអង្គការសង្គមស៊ីវិលជាតិ និង​អន្តរជាតិ ប្រមាណ៥00នាក់នោះ ត្រូវបានរារាំងជាបន្តបន្ទាប់ ពីសំណាក់សមត្ថកិច្ចចម្រុះជាតិ ក្នុងគោល​បំណង​មិនអនុញ្ញាត ឲ្យមានការប្រមូលផ្តុំគ្នា នៅមុខវិមានរដ្ឋសភា ក្នុងថ្ងៃទី៣០ ខែមិថុនានេះឡើយ។

ការប៉ះទង្គិចគ្នា ទាំងបួនទិសដៅនេះ ទាំងនៅមុខស្ថានទូតបារាំង ទាំងនៅតាមបណ្តោយផ្លូវកម្ពុជាក្រោម មិន​បង្កឲ្យមានរបួសធ្ងន់ធ្ងរ ដល់អ្នកណាម្នាក់នោះទេ។ កាលពីវេលាម៉ោង ជិត១០ព្រឹក យុវជនម្នាក់ ត្រូវបាន​ចាប់​ខ្លួន នៅចំណុចស្ពានអាកាសក្បាលថ្នល់ តែអាជ្ញាធរបានធ្វើការដោះលែងវិញភ្លាមៗ បន្ទាប់ពីមានការបញ្ជាក់​ថា យុវជននោះមិនពាក់ព័ន្ធ នឹងការហែរក្បួននោះ។

តាមគេហទំព័រ របស់អង្គការការពារសិទ្ធិមនុស្ស លីកាដូ ដែលបានចេញផ្សាយ ក្នុងថ្ងៃទីទី២៩ ខែមិថុនា ឆ្នាំ​២០១៥ ម្សិលម៉ិញនេះ បានឲ្យដឹងថា យុទ្ធនាការដើរហែក្បូនទាំងនេះ មានគោលបំណង ដើម្បីប្រឆាំង ទៅនឹង​សេចក្តីព្រាងច្បាប់ ស្តីពីសមាគម និងអង្គការមិនមែនរដ្ឋាភិបាល និងសេចក្តីព្រាងច្បាប់ ស្តីពីសហជីព ដោយ​ចាត់ទុកថា ជាសេចក្តីព្រាងច្បាប់ទាំងពីរ មានលក្ខណៈគាបសង្កត់ និងបំបិទសិទ្ធិសេរីភាព។

តាមការអះអាង របស់គេហទំព័រដដែល បានលើកឡើងថា ក្បួនទាំងបួនទិសនោះ ត្រូវចាប់ផ្តើមពី ស្ពាន​៧មករា (ស្តុបពេទ្យលោកសង្ឃ), ពីវត្តនិរោធ, ពីសង្កាត់ចាក់អង្រែ និងពីមុខពីស្ថានទូតបារាំង ហើយមកជួបជុំគ្នា នៅ​មុខ​មន្ទីររដ្ឋសភាជាតិ ក្នុងវេលាម៉ោង១០ព្រឹក ក្នុងថ្ងៃទី៣០ ខែមិថុនា បន្ទាប់មកធ្វើការបង្ហោះប៉េងប៉ោង ជា​តំណាង។

រីឯសាលារាជធានីភ្នំពេញវិញ បានប្រកាសព្រមានថា នឹងចាត់វិធានការ មិនឲ្យមានការហែក្បួនទេ ដើម្បី​រក្សា​សន្តិសុខ និងសណ្តាប់ធ្នាប់សាធារណៈ។ នេះបើតាមកាអះអាងរបស់អ្នកនាំពាក្យ សាលារាជធានីភ្នំពេញ លោក ឡុង ឌីម៉ង់ កាលពីថ្ងៃទី២៩ ខែមិថុនា។ បើទោះជាមានការរារាំង ពីអាជ្ញាធរសមត្ថកិច្ច នៅតាមផ្លូវ​យ៉ាង​ណាក៏ដោយ ក្រុមសកម្មជនអង្គការសង្គមស៊ីវិល បានសម្រេចបំណង ដោយបានមកជួបជុំគ្នា និងឈរតវ៉ា ជា​មួយនឹងការបិទស្ទីកឃ័រ រួមទាំងការលើកបដា នៅមុខរដ្ឋសភានាវេលាម៉ោងជិត ១១ព្រឹក។

កុំព្រួយពេក!

ទាក់ទងនឹងសេចក្តីព្រាងច្បាប់ ស្តីពីសមាគម និងអង្គការក្រៅរដ្ឋាភិបាល និងសេចក្តីព្រាងច្បាប់ ស្តីពីសហជីព ក្នុងជំនួបមួយរវាងលោកសម រង្ស៊ី និងលោកនាយករដ្ឋមន្រ្តី ហ៊ុន សែន នាវិមានរដ្ឋសភា កាលពីថ្ងៃទី២៩ ខែ​មិថុនាម្សិលម៉ិញនេះ លោក នាយករដ្ឋមន្រ្តី បានប្រាប់ទៅលោក សម រង្ស៊ី ថា សូមកុំឲ្យលោក សម រង្ស៊ី និង​អង្គការសង្គមស៊ីវិល មានការព្រួយបារម្ភខ្លាំងពេក ចំពោះច្បាប់ទាំងនោះ។

លោក សម រង្ស៊ី បាននាំពាក្យ លោកនាយករដ្ឋមន្រ្តី ហ៊ុន សែន មកបញ្ជាក់ថា៖ «សូមឲ្យអង្គការ​សង្គម​ស៊ីវិល​ទាំងអស់ កុំព្រយយបារម្ភហួសហេតុ។ អង្គការសង្គមស៊ីវិល ដែលកំពុងតែដំណើរការហើយ គឺអត់ចាំបាច់ ទៅ​ចុះ​ឈ្មោះឡើងវិញទេ គឺមានការទទួលស្គាល់ ជាស្វ័យប្រវត្តិ។ ដូច្នេះអង្គការដែលមានទាំងប៉ុន្មាន ដែល​បាន​ចុះ​ឈ្មោះពីមុនហើយ និងកំពុងតែដំណើរការពេលនេះ មិនចាំបាច់ទៅបំពេញបែបបទ មិនចាំបាច់ទៅចុះឈ្មោះ​ម្តងទៀតទេ ការទទួលស្គាល់ ក៏នៅតែមាន។ អ្វីដែលស្របច្បាប់ មិនចាំបាច់ធ្វើអ្វីលើសពីនោះទេ។»

ទាក់ទងនឹងសេចក្តីព្រាងច្បាប់ស្តីពី សមាគម និងអង្គការក្រៅរដ្ឋាភិបាលនេះ រដ្ឋសភាគ្រោងនឹង​បើកសិក្ខា​សាលា ពិគ្រោះយោបល់នាថ្ងៃទី១០ ខែកក្កដា បន្ទាប់ពីគណកម្មការជំនាញ នៃរដ្ឋសភា បញ្ចប់កិច្ចប្រជុំកិច្ច​របស់​ខ្លួន ក្នុងថ្ងៃទី២៩ ខែមិថុនានេះ។ នេះបើតាមការអះអា ងរបស់លោក ឈាង វុន អ្នកនាំពាក្យរដ្ឋសភា តាម​សារព័ត៌មានក្នុងស្រុកមួយ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...