ជាការគោរពច្បាប់ ទម្លាប់មួយដ៏ប្រពៃ នៅពេលម៉ូតូឬឡាន ឈប់នៅត្រង់ស្តុប នៅពេលដល់ភ្លើង​ពណ៍​ក្រហម​នោះ តែអ្វីដែលចម្លែក គឺឡាន ឬម៉ូតូទាំងនោះ នៅតែបន្តទៅមុខ ដោយមិនបានគោរពស្តុប និងភ្លើងសញ្ញា​ចរាចរណ៍ ដែលជាច្បាប់ចររាចរណ៍ផ្លូវគោកទាំងនោះ។ ទាក់ទងនឹងករណីនេះ បុរសម្នាក់បានទទួលគ្រោះ​ថ្នាក់ ដោយសារតែខ្លូនឈប់តាមស្តុប តែអ្នកខាងក្រោយមិនឈប់ និងបានបុកលោកពីក្រោយ យ៉ាងពេញទំហឹង បណ្តាល​ឲ្យបុរសរងគ្រោះ រងរបួសធ្ងន់ត្រូវបញ្ជូនទៅមន្ទីពេទ្យ។

អ្នករងគ្រោះខាងលើឈ្មោះ ចៅ សាយ អាយុ ៥២ ឆ្នាំមុខរបរជាអ្នករត់រឺម៉ក ដឹកភ្ញៀវទេសចរណ៍ បច្ចុប្បន្ន​ស្នាក់​នៅផ្ទះជួល នៅចំការដូង។ អ្នករងគ្រោះនេះ ត្រូវបានគេស្គាល់ថា ជាសមាជិករឺម៉កង់បី របស់សមាគសេដ្ឋកិច្ច​ក្រៅ​ប្រព័ន្ធ ដឹកនាំដោយលោក វ៉ន ពៅ។

តាមការឲ្យដឹងពីលោក ឡុង វុទ្ធី អ្នកគ្រប់គ្រងសមាជិក នៅក្នុងសមាគមខាងលើ បានឲ្យទស្សនាវដ្តី​មនោរម្យ.អាំងហ្វូដឹងថា ហេតុការណ៍នេះ បានកើតឡើង កាលពីម៉ោង ៥ និង៤៥ នាទីព្រឹកថ្ងៃទី ២៦ ខែ​មិថុនា ឆ្នាំ២០១៥ នៅតាមបណ្តោយផ្លូវព្រះមុន្នីវង្ស ត្រង់ចំណុចស្តុប«អូតែល ស» ចេញពីផ្សារធំថ្មីប្រមាណ​២៥០​ម៉ែត្រ។

សាក្សីដែលបានឃើញហេតុការណ៍នេះ បានឲ្យដឹងថា ឡានបង្ករម៉ាក ODសេរីទំនើបពណ៍ ស្លាកលេខ ២AC-៤៣៩២ បើកបរដោយយុវជនម្នាក់ មិនស្គាល់អត្តសញ្ញាណ អាយុប្រមាណជា១៨ឆ្នាំ ក្នុងល្បឿនលឿន ស្រាប់តែមកដល់កន្លែងកើតហេតុ ត្រង់ចំណុចស្តុបឡានខាងលើ មិនបានឈប់នោះទេ នៅតែបន្ត ទោះ​ជា​មាន​រឺម៉កកង់បីមួយនៅពីមុខ ក៏ដោយ។ រថយន្ដបានបុក រ៉ឺមកកង់បីនោះ យ៉ាងពេញទំហឹងពីក្រោយ។ សាក្សីបន្តថា ឡានបង្ករបានបុករឺម៉កកង់បីនោះ ខូចខាតស្ទើទាំងស្រុង ចំណែកឯអ្នកបើកកង់បី រងរបួសធ្ងន់នៅត្រង់ក្បាល ត្រូវបញ្ជូនទៅសង្គ្រោះបន្ទាន់ នៅមន្ទីពេទ្យកាល់ម៉ែត។

តាមការដំណឹងចុងក្រោយ ដ៏សោកសៅមួយ ដែលលោក ឡុង វុទ្ធី ទើបនឹងឲ្យទស្សនាវដ្ដីបានដឹង បាន​អះអាង​ថា គ្រូពេទ្យបញ្ជាក់ពីស្ថានភាពជនរងគ្រោះ នៅថ្ងៃត្រង់នេះថា មានសង្ឃឹមតែ២០ភាគរយប៉ុណ្ណោះ ដោយប៉ះ​ទង្គិច​ក្បាល​ធ្ងន់ធ្ងរ។ លោក វុទ្ធី បានឲ្យដឹងដែរថា បុរសដែលបើកបរឡាន ត្រូវបានសមត្ថកិច្ចចររាចរណ៍ នៅ​មូលដ្ឋាន​​ឃាត់ខ្លូន ជា​មួយ​រថយន្ត​ទំនើបរបស់ខ្លូន ទុកធ្វើការដោះស្រាយ ជាមួយសាច់ញាតិជនរងគ្រោះ៕