ហេតុការណ៍ ដែលមានការធ្វើអត្ថាធិប្បាយ ដោយអ្នកសារព័ត៌មានល្បីឈ្មោះនោះ បានកើតឡើង​​កាល​ពីថ្ងៃ​ទី២៣ ខែមិថុនា ឆ្នាំ២០១៥នេះ នៅក្នុងកម្មវិធី «Cidade Alerta» របស់ស្ថានីយ៍ទូរទស្សន៍ «R7» ដែលត្រូវបាន​ផ្សាយ​បន្តផ្ទាល់ ពីការប្រមាញ់របស់នគរបាល ដេញតាមជនសង្ស័យពីរនាក់ ដោយកំពុងជិះម៉ូតូគេចខ្លួន។ មួយ​សន្ទុះ​ក្រោយមក ជនសង្ស័យម្នាក់ បានបោះមួកសុវត្ថិភាពរបស់ខ្លួន ទៅលើនគរបាលម្នាក់ ដែលជិះម៉ូតូ​យ៉ាង​ប្រកិត នៅពីក្រោយ ក្នុងបំណងចង់ឲ្យនគរបាលនោះដួល។

ផ្ទុយទៅវិញ ជនសង្ស័យទាំងពីរបែរជាដួល បោកខ្លួនទៅលើចិញ្ចើមផ្លូវទៅវិញ។ ភ្នាក់ងារនគរបាល ឈ្មោះ ហាមីថុន (Hamilton) ដែលដេញតាមជនសង្ស័យនោះ បានមកទាន់ឈប់ម៉ូតូ រួចដកកាំភ្លើង បាញ់ចំនួន៤គ្រាប់ ទៅលើជនសង្ស័យ។

ឈុតឆាកនេះ ត្រូវបានពលរដ្ឋប្រេស៊ីលភាគច្រើន តាមដានទស្សនា ដោយសារតែជាកម្មវិធីផ្សាយបន្តផ្ទាល់ និង​មានអ្នកសារព័ត៌មាន ប្រចាំស្ថានីយ៍ទូរទស្សន៍លោក ម៉ាសឺឡូ រ៉ឺហ្សេនដេ (Marcelo Rezende)។ រូបភាព​បាញ់​ប្រហារ​របស់នគរបាល បានរងនូវការរិះគន់យ៉ាងខ្លាំងក្លាយ ពីបណ្ដាជនប្រេស៊ីល ជាពិសេស នៅក្រោយ​ពេល​ដែលវីដេអូនេះ ត្រូវបានយកមកបង្ហោះ នៅលើបណ្ដាញសង្គម។ សម្រាប់របាយការណ៍នគរបាលវិញ បាន​បញ្ជាក់​ថា ជនសង្ស័យទាំងពីរ មានជាប់ទាក់ទង នឹងអំពើចោរកម្មប្រដាប់អាវុធមួយ។ អ្នកទាំងពីរ ត្រូវបាន​អាជ្ញាធរ បញ្ជូនទៅកាន់មន្ទីរពេទ្យ ភ្លាមៗបន្ទាប់ពីនគរបាល បានគ្រប់គ្រងសភាពការណ៍ បានទាំងស្រុង៕