ករណីគ្រោះថ្នាក់ចេរាចរណ៍នេះ មិនមានអ្នកណាម្នាក់រងរបួសទេ ដោយសាររថយន្តខាងលើ បានបង្ក​គ្រោះថ្នាក់​តែម្នាក់ឯង ហើយក៏រងការខូចខាត តែម្នាក់ឯងដែរ។ បុរសម្ចាស់រថយន្ត មិនត្រូវបានគេស្គាល់អត្តសញ្ញាណទេ នៅ​ពេលកើតហេតុ ហើយអ្នកបើកបររូបនោះ ថែមទាំងមិនចង់ឆ្លើយឆ្លង ជាមួយអ្នកសារព័ត៌មានទៀត។

ដោយឡែក សាក្សីនៅនឹងកន្លែងកើតហេតុ បានបញ្ជាក់ប្រាប់ថា រថយន្តដែលរងការខូចខាត ស្ទើរទាំងស្រុងនោះ ម៉ាកកាម៉ារីកូទ សេរី២០១១ ពណ៍ ស ស្លាកលេខ ភព២-ឆ២១២២។ សាកក្សីបានបញ្ជាក់បន្ថែមថា រថយន្ត​ខាង​លើ បើកបរលឿនដូចហោះ តាមបណ្តោយផ្លូវ ២៧១ លុះមកដល់កន្លែងកើតហេតុ ជិតគល់ស្ពានស្ទឹងមានជ័យ បានរេចង្កួត ទៅបុកជាមួយបង្កាន់ដៃ ស្ពានពេញទំហឹង ដូចយកមុខរថយន្ដ ទៅជល់ជាមួយនឹងជញ្ជាំងភ្នំដូច្នេះ។

ករណីបង្កឡើង ដោយម្ចាស់យានយន្ដខ្លូនឯងនេះ ត្រូវបាននគរបាលចរចរាចរណ៍ ដែលចុះអន្តរាគមន៍នៅ​ទី​នោះ ប្រាប់ឲ្យដឹងថា បានកើតឡើង កាលពីវេលា ម៉ោង១២ និង ៣០នាទីយប់ថ្ងៃទី២៥ ខែមិថុនាឆ្នាំ២០១៥នេះ។ កម្លាំង​នគរបាលម្នាក់ បានថ្លែងឲ្យដឹងថា តាមការត្រួតពិនិត្យជាតិអាល់កុល នៅក្នុងខ្លួនអ្នកបើកបរ បានឲ្យ​ដឹង​ថា បុរសម្ចាស់រថយន្ដខាងលើ មានជាតិស្រវឹងលើសកម្រិត ពីច្បាប់បានកំណត់ ធ្វើឲ្យស្រវាំងភ្នែក បើកឡានរេ​ចង្គូត ទៅបុកបង្កាន់ដៃស្ពានបែបនេះ។

បច្ចុប្បន្នរថយន្ដ ដែលរងការខូចខាត ត្រូវបាននគរបាល សង្កាត់ទំនប់ទឹក ខណ្ឌមានជ័យ រាជធានីភ្នំពេញ សហការ​ជាមួយនគរបាលខណ្ឌ ធ្វើការស្ទួចទៅរក្សាទុក នៅចររាចរណ៍ក្រុង ដើម្បីរងចាំម្ចាស់ទៅ​ដោះ​ស្រាយ៕