កម្ពុជា៖ សាលាឧទ្ទរណ៍បដិសេធ ការសុំនៅក្រៅឃុំ - ស៊ូប៊ើឌី ជួប ម៉ម សូណង់ដូ ក្នុងពន្ធនាគារ
សម្រាប់ប្រព័ន្ធយុត្តិធម៌ខ្មែរ លោក ម៉ម សូណង់ដូ ជាប់ទោស២០ឆ្នាំ ជាឧក្រិដ្ឋជន ក្នុងបទមានបំណងបង្កើតក្រុមប្រដាប់អាវុធ ចង់ផ្ដាច់ទឹកដី បង្កើតតំបន់អប្បគមន៍។ តែសម្រាប់អង្គការលើកលែងទោសអន្តរជាតិ ដែលទីស្នាក់ការនៅទីក្រុងហ្សឺណែវ ប្រទេសស្វីស លោកម៉ម សូណង់ដូ ជាអ្នកទោសមនសិការ ដែលបានធ្វើការតស៊ូមតិ សម្រាប់អោយមានសិទ្ធិសេរីភាពជាទូទៅមួយ ជូនដល់ប្រជាពលរដ្ឋកម្ពុជា។
លោក ស៊ូរយ៉ា ភ. ស៊ូប៊ើឌី (Surya P. Subedi) បានជួបលោកម៉ម សូណង់ដូ ប្រធានវិទ្យុសម្បុកឃ្មុំ កាលពីថ្ងៃទី១២ធ្នូ ក្នុងពន្ធនាគារ ព្រៃសរ ស្ថិតនៅខាងក្រៅរាជធានីភ្នំពេញ នៅក្នុងក្របខ័ណ្ឌនៃកំណែទម្រង់ យ៉ាងយឺតយ៉ាវ នៃប្រព័ន្ធយុត្តិធម៌ខ្មែរ។ នេះជាសេចក្ដីរាយការណ៍អោយដឹង ក្នុងអត្ថបទមួយរបស់ កាសែតក្នុងស្រុកឈ្មោះ ភ្នំពេញប៉ុស្ដ៍។ លោក ស៊ូប៊ើឌី បានពន្យល់ ថាលោកបានជួបជាមួយនឹង សកម្មជនអ្នកតស៊ួមតិ ចំណាស់៧១ឆ្នាំរូបនេះ ក្នុងគោលបំណង នាំយកមកអោយ នូវការគាំទ្ររបស់លោក និងចង់ដឹងបន្ថែមពីស្ថានភាព នៅក្នុងពន្ធធាគារ និងដំណើរឈានទៅមុខ នៃការប្ដឹងឧទ្ទរណ៍របស់គាត់។ ប៉ុន្តែ លោក ស៊ូប៊ើឌី បដិសេធមិននិយាយពី កិច្ចសន្ទនាឯកជនរបស់លោក ជាមួយនឹងអ្នកទោសប្រឆាំងមតិរូបនេះ យ៉ាងដូចម្ដេចឡើយ តែបានបង្ហើបនិយាយប្រាប់អ្នកកាសែតថា «លោកម៉ម សូណង់ដូ នៅមានទឹកចិត្តនៅឡើយ»។
ការចូលជួបនេះ នៅមុនតែពីរថ្ងៃប៉ុណ្ណោះ ក្នុងគ្រាដែលសាវនាការឧទ្ទរណ៍ សុំអោយនៅក្រៅឃុំជាបណ្ដោះអាសន្ន មានលក្ខខ័ណ្ឌរបស់លោកម៉ម សូណង់ដូ ត្រូវបានបដិសេធ ដោយសាលាឧទ្ទរណ៍ មិនអនុញ្ញាតិដោះលែងលោក ទៅតាមការស្នើសុំរបស់មេធាវីរបស់លោកនោះ។ ការបដិសេធនេះ គឺសំអាងថា ដើម្បីរក្សាសន្តិសុខសង្គម និងសណ្ដាប់ធ្នាប់សាធារណៈនៅកម្ពុជា។ នៅថ្ងៃសុក្រ ទី១៤ធ្នូនេះដដែល មជ្ឈមណ្ឌលសិទ្ធិមនុស្សកម្ពុជា បានចេញសេចក្ដីថ្លែងការណ៍ សម្ដែងភាព«អស់សង្ឃឹមជាខ្លាំង» នឹងការកាត់សេចក្ដីរបស់ តុលាការសាលាឧទ្ទរណ៍។ ស្រង់សម្ដីដោយវិទ្យុអាស៊ីសេរី លោក អ៊ូ វីរះ ប្រធានមជ្ឈមណ្ឌលនេះ បាននិយាយបរិហា ពីករណីលោកម៉ម សូណង់ដូ ជារឿងនយោបាយ យ៉ាងដូច្នេះថា «ការចាប់លោក ម៉ម សូណង់ដូ គឺជារឿងនយោបាយ ការដោះលែងឲ្យលោក ម៉ម សូណង់ដូ ឲ្យមានសេរីភាព ឬមួយក៏អត់ គឺជាការសម្រេចចិត្តនយោបាយ។»
ទាក់ទងនឹងប្រព័ន្ធយុត្តិធម៌ខ្មែរ ដែលចេញសាលក្រម លើលោក ម៉ម សូណង់ដូនេះ អ្នករាយការណ៍ពិសេសលោក ស៊ូប៊ើឌី បានបញ្ជាក់ថា «ការដាក់ទោសទៅលើគាត់ បន្តធ្វើអោយខ្ញុំអួលអាក់ជាទីបំផុត។ ខ្ញុំត្រូវធ្វើអន្តរាគមន៍ ដើម្បីជាប្រយោជន៍ដល់គាត់ ហើយខ្ញុំនឹងបន្តពិនិត្យមើល យ៉ងដិតដល់លើករណីរបស់គាត់ ក៏ដូចជាលើករណីផ្សេងៗទៀត ដែលធ្វើអោយខ្ញុំព្រួយបារម្ភដែរ។»
សូមអានអត្ថបទ របស់មនោរម្យព័ងអាំងហ្វូ ជុំវិញករណី របស់ប្រធានវិទ្យុសម្បុកឃ្មុំ លោកម៉ម សូណង់ដូ ដោយចុចលើទីនេះ។
គួរបញ្ជាក់ថា ក្នុងដំណើរមកកាន់កម្ពុជា កាលពីថ្ងៃទី១៩វិច្ឆិកា ប្រធានាធិបតីអាមេរិក លោកបារ៉ាក់ អូបាម៉ា បានជួបនិយាយ ជាមួយនាយករដ្ឋមន្ត្រីខ្មែរលោកហ៊ុន សែន លើករណីលោកម៉ម សូណង់ដូ តែរហូតមកទល់នឹងថ្ងៃនេះ រដ្ឋាភិបាលកម្ពុជានៅតែប្រកាន់ជំហរ ថានេះជាឯករាជ្យភាពរបស់តុលាការ ដែលគ្មាននរណាម្នាក់អាចលូកដៃបានឡើយ។ លោកខៀវ កញារឹទ្ធិ អ្នកនាំពាក្យរដ្ឋាភិបាលកម្ពុជា និងជារដ្ឋមន្ត្រីក្រសួងពត៌មាន នៅព្រឹកថ្ងៃទី៧ខែវិច្ឆិកាឆ្នាំ២០១២ ធ្លាប់បានប្រាប់ក្រុមសារព័ត៌មានថា សហរដ្ឋអាមេរិក មិនមែនជា«ចៅហ្វាយ»កម្ពុជាទេ ហើយបារ៉ាក់ អូបាម៉ា ក៏មិនមែន«ចៅហ្វាយ» ហ៊ុន សែនដែរ៕