សមាគមអាដហុក កំពុងពិនិត្យមើលផ្លូវច្បាប់ និងរៀបចំតាមនីតិវិធី ក្នុងការប្តឹងមន្រ្តីពាក់ព័ន្ធ ក្នុងជួររដ្ឋាភិបាល​ណា ដែលបានរំលោភបំពានច្បាប់។ ប្រធានផ្នែកសិទ្ធិមនុស្ស និងជំនួយផ្លូវច្បាប់ របស់សមាគមការពារ​សិទ្ធិ​មនុស្ស អាដហុក លោក នី ចិរិយា បានថ្លែងប្រាប់ទស្សនាវដ្តីមនោរម្យ.អាំងហ្វូថា សមាគមអាដហុក នឹងធ្វើ​សេចក្តីថ្លែងការណ៍មួយ បង្ហាញពីការរំលោភច្បាប់ និងសិទ្ធិមនុស្ស ដោយមន្រ្តីសាធារណៈរបស់រដ្ឋ បន្ទាប់​មក​នីតិវិធីប្តឹងផ្តល់ នឹងស្នើឡើងបន្តបន្ទាប់គ្នានេះ។

ការអះអាងរបស់លោក នីចរិយា នេះត្រូវបានធ្វើឡើង បន្ទាប់ពីបុគ្គលិកសមាគមអាដហុកម្នាក់ ឈ្មោះ ឌិត សុធី ត្រូវបានក្រុមសន្តិសុខ និងអាជ្ញាធរខណ្ឌដូនពេញ និងខណ្ឌចំការមន ធ្វើការចាប់ខ្លួន អំឡុងពេលមន្រ្តី​រូប​នេះ កំពុងចុះអង្កេតការណ៍ ពីសកម្មភាពនៃការដង្ហែរញត្តិ របស់ក្រុមយុវជន ចលនាមាតាធម្មជាតិ ទៅ​ដាក់នៅ​រដ្ឋសភា រឿងបូមខ្សាច់នៅក្នុងខេត្តកោះកុង។

លោក នី ចរិយា បានចាត់ទុកថាការចាប់ខ្លួននោះ ជាការ«គម្រាមកំហែង ដល់សកម្មជនសិទ្ធិមនុស្ស និងការ​ទាញឲ្យច្បាប់គ្រប់គ្រងអង្គការ ឆាប់ត្រូវបានអនុម័ត។ លោកបានបន្តថា៖ «បញ្ចេញមតិគាំទ្រ (រដ្ឋាភិបាល ឬ​គណបក្សប្រជាជនកម្ពុជា) មិនមានបញ្ហា។ តែបើបញ្ចេញមតិ ការពារផលប្រយោជន៍ពលរដ្ឋទូទៅ ប្រជាជន​ដែល​ទន់ខ្សោយ ប៉ុន្តែវាប៉ះពាល់ ទៅដល់រដ្ឋាភិបាល ត្រូវតែមានបញ្ហាតែម្តង។ (…) តាមច្បាប់ កម្លាំងសមត្ថកិច្ច​ទាំង​អស់ជារបស់រដ្ឋ ជារបស់ជាតិ ហើយក៏ស្ថិតក្រោមគណបក្សណា ដែលកាន់អំណាចដែរ។ ក៏ប៉ុន្តែការ​ស្ថិត​នៅក្រោមអំណាចគណបក្ស នៃប្រទេសយើងនេះ វាមិនមែនស្ថិតនៅក្រោម តែការងាររដ្ឋបាល វាស្ថិតនៅ​ក្រោមទាំងអំណាច ដែលធ្វើឲ្យបាត់បង់ នូវឯករាជ្យភាពរបស់មន្រ្តីរាជការ កងកម្លាំងប្រដាប់អាវុធ។»

លោក ឌិត សុធី ដែលត្រូវបានសមត្ថកិច្ច ខណ្ឌចំការមន ចាប់ខ្លួនកាលពីថ្ងៃទី២៥ ខែមិថុនានេះ បានបញ្ជាក់​ប្រាប់ ទស្សនាវដ្តីមនោរម្យ.អាំងងហ្វូថា ក្រោយការចាប់ខ្លួន នៅសាលាខណ្ឌចំការមក មានមន្រ្តីម្នាក់ បានសួរ​ឲ្យលោកឆ្លើយ និងចុះក្នុងលិខិតមួយ ដែលលោកមើលទៅឃើញថា ជាលិខិតសួរយកចម្លើយ«ជនល្មើស»។ លោកបន្តថា បន្ទាប់មក គេបង្ខំឲ្យលោកផ្តិតមេដៃ លើលិខិតនោះ តែលោកមិនព្រម ព្រោះតែលោកយល់ថា ខ្លួន​មិនមានបទល្មើស។ លោកបញ្ជាក់បន្ថែមថា៖ «គេសួរប្រវត្តិរូបជាតិយើង គេសរសេរហើយឲ្យយើងផ្តិត​មេ​ដៃ តែត្រូវខ្ញុំបដិសេធមិនផ្តិត។ (…) គេថាផ្តិតមេដៃសិនទៅ តែខ្ញុំថាមិនផ្តិតទេ ដោយរង់ចាំប្រធានស្ថាប័ន និង​មេធាវី​ខ្ញុំមក។ (…) ខ្ញុំមិនផ្តិតមេដៃទេ ព្រោះអីវាមិនមែនជាបទល្មើស ហើយខ្ញុំក៏មិនបានប្រព្រឹត្តិអ្វី រឿងអីដែល​ខ្ញុំ​ត្រូវ​ផ្តិត​មេដៃ លើលិខិតដែលសាកសួរជនសង្ស័យ ដោយមានកំណត់បង្ហាញទោស។»

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់ ពីលោក ឡុង ឌីម៉ង់ អ្នកនាំពាក្យសាលារាជធានីភ្នំពេញ ពីការចាប់ខ្លួនខាងលើបានទេ ដោយលោកមិនទទួលទូរស័ព្ទ។ តែលោកបានអះអាងយ៉ាងខ្លី តាមរយៈវិទ្យុ​ក្នុងស្រុកមួយថា ការចាប់ខ្លូនក្រុមយុវជនទាំងនោះ គឺជាវិធានការដ្ឋបាល ព្រោះក្រុមទាំងនោះ មិនបានជូន​ដំណឹង ឬស្នើសុំការអនុញ្ញាត ពីសាលារាជធានីជាមុន។ រីឯការឃាត់ខ្លួនមន្រ្តីអាដហុក ព្រោះតែមន្រ្តីនោះ មិន​ពាក់ប័ណ្ណសំគាល់ នេះជាការភាន់ច្រឡំទេ។

ប៉ុន្តែសម្រាប់លោក នី ចរិយា នៅតែចាត់ទុកថា សកម្មភាពរបស់រដ្ឋាភិបាលនេះ បានបង្ហាញឲ្យឃើញ នូវការ​គម្រាមដល់សហគមន៍ ក៏ដូចជាអង្គការដទៃទៀត កុំឲ្យធ្វើសកម្មភាពណា ដែលបង្ហាញពីការតស៊ូមតិ។ នេះ​បើសិនបើច្បាប់គ្រប់គ្រង សមាគម អង្គការក្រៅរដ្ឋាភិបាល ត្រូវបានអនុម័តនោះ វាមិនមែនត្រឹមតែចាប់​ខ្លួន​ទេ តែវាអាចឈាន ទៅដល់បិទទីស្នាក់ការ របស់អង្គការសមាគមណា ដែលហ៊ានធ្វើសកម្មភាព អស់ទាំងហ្នឹង​ផង ទោះបីសកម្មភាពទាំងនោះ ជាសកម្មភាពស្របច្បាប់ ជាសកម្មភាព ដែលធានាដោយរដ្ឋធម្មនុញ្ញក៏​​ដោយ។

សូមរំលឹកដែរថា នៅក្នុងព្រឹត្តិការណ៍ចាប់ខ្លួននោះ យុវជនបីរូប ពីចលនាមាតាធម្មជាតិ ក៏ត្រូវក្រុមសមត្ថកិច្ច​ទាំងនោះ ចាប់ឃាត់ខ្លួនដាក់ឡើងឡានយកទៅដែរ។ យុវជន សន ចាន់ដារ៉ា សមាជិកចលនាមាតាធម្មជាតិ  បានថ្លែងថា មុននឹងរូបលោក ត្រូវបានដោះលែងមកវិញ នៅវេលាម៉ោងប្រមាណជា ១២ថ្ងៃត្រង់នោះ ដោយ​សារលោក និងសហការីពីរនាក់ទៀត បានធ្វើកិច្ចសន្យាជាមួយអាជ្ញាធរ ថារាល់សកម្មភាពលើកក្រោយៗ បើ​មានត្រូវជូនដំណឹង ទៅអាជ្ញាធរជាមុន។ សម្រាប់យុវជនរូបនេះ ទាំងការចាប់ខ្លួន ទាំងការឲ្យផ្តិតមេដៃ លើខ​សន្យានេះ សុទ្ធសឹងជាការរំលោភ លើសិទ្ធិសេរីភាព ក្នុងការបញ្ចេញមតិ តាមទីសាធារណៈ រំលោភ​សិទ្ធិ​បុគ្គល សិទ្ធិមនុស្ស ដែលបានការពារដោយរដ្ឋធម្មនុញ្ញ ការពារដោយច្បាប់បាតុកម្ម៕