សម្រាប់ស្ត្រីជាភរិយា របស់ជនរងគ្រោះវិញ អ្នកស្រី ឃ្លាំង ស្រីមុំ ដែលធ្វើដំណើរ មកដល់ទីកើតហេតុ ហើយ​ឃើញ​ស្វាមីដេកស្លាប់ ក្នុងថ្លុកឈាម យ៉ាងអាណោចអធ័មនោះ បានបដិសេធថា ប្ដីអ្នកស្រីគ្មានរឿង ជាមួយ​អ្នកណាទេ ហើយអ្នកស្រីក៏ទើបនិយាយ តាមទូរស័ព្ទជាមួយប្តីមុននេះដែរ។

ករណីបាញ់សម្លាប់ដ៍សាហាវ ទៅលើបុរស់ម្នាក់ខាងលើ បានកើតឡើង កាលពីវេលាម៉ោង៧ និង៤៥នាទី យប់​ថ្ងៃទី១៤ ខែមិថុនា ឆ្នាំ២០១៥ បណ្តាលឲ្យបុរសរូបនេះ ស្លាប់ភ្លាមៗក្នុងហាងមួយ ឈ្មោះ«គុយទាវឆ្នាំងភ្លើង សឹងហ៊ី​ភ្នំពេញ» ដែលស្ថិតក្នុងសង្កាត់ បឹងកេងកងទី១ ខណ្ឌចំការមន រាជធានីភ្នំពេញ ត្រងចំណុចក្បែរ​វិទ្យាល័យ បឹងកេងកង។ ជនរងគ្រោះ ដែលមានឈ្មោះ ឡោ សុភាព អាយុ៣២ ឆ្នាំ ត្រូវបានភរិយាបញ្ជាក់ថា ជា​ប្រធានរដ្ឋបាល នៅរោងចក្រសីនម៉ា ស្ថិតក្នុងម្តុំផ្លូវវេងស្រេង និងជាពលរដ្ឋរស់នៅ ក្នុងសង្កាត់បឹងកេងកងទី៣ ខណ្ឌចំការមន រាជធានីភ្នំពេញ។

ហេតុការណ៍នេះ បានបង្កភាពភ្ញាក់ផ្អើល ស្ទើរពេញទីក្រុងភ្នំពេញ ភ្លាមៗនៅបន្ទាប់ ពីកើតហេតុ។ តាមការ​ពិនិត្យ​ជាក់ស្តែង ឃើញមានសំបកគ្រាប់ កាំភ្លើង K59 ចំនួន ៤គ្រាប់ នៅនឹងកន្លែងកើតហេតុ។

មន្រ្តីនគរបាលខណ្ឌចំការមន បានថ្លែងប្រាប់អ្នកសារព័ត៌មានថា ករណីបាញ់ប្រហារសម្លាប់បុរសម្នាក់នេះ សង្ស័យ​​ជារឿងគំនុំ។ ដោយអ្នកប្រព្រឹត្ត មានគ្នា២នាក់ជិះម៉ូតូ មកនិយាយគ្នា ជាមួយជនរងគ្រោះ ដោយ​ប្រតាយ​ប្រតប់​គ្នា ហើយជនរងគ្រោះ បានរត់ចូលទៅហាង នៅក្បែរនោះ។ តែខ្មាន់កាំភ្លើង នៅតែបន្តរត់ ទៅតាមបាញ់​សម្លាប់ ៣-៤គ្រាប់ចំក្បាល និងក្បាលពោះជនរងគ្រោះ មុននឹងជិះម៉ូតូ គេចខ្លួនបាត់ស្រមោល៕

» វីដេអូដែលថត នៅក្រោយការកើតហេតុ៖