រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានបង្ហាញនូវការខកចិត្ត និងសោកស្តាយ ចំពោះ ការសែត ភ្នំពេញ​ប៉ុស្តិ៍ ដែលបានទៅកកាយឯកសារ ក្នុងឆ្នាំ២០០៥ របស់អង្គការឃ្លាំមើលសិទ្ធិមនុស្ស (HRW) ដើម្បីមក​ធ្វើ​ការចោទ លោក ជា ស៊ីម ដែលបានស្លាប់ទៅហើយនោះ ថាបានរំលោភសិទ្ធិមនុស្ស យ៉ាងធ្ងន់ធ្ងរ ក្នុងសម័យ​ខ្មែរ​ក្រហមទៅវិញ។

ក្នុងកិច្ចសម្ភាស ជាមួយអ្នកសារព័ត៌មាន នាទីស្តីការក្រសួងព័ត៌មាន ក្នុងថ្ងៃទី១១ ខែមិថុនានេះ រដ្ឋមន្ត្រី និងជា​មន្រ្តី​ជាន់ខ្ពស់ មកពីគណបក្សប្រជាជនកម្ពុជារូបនេះ បានថ្លែងពន្យល់ថា ខណៈ«សព»លោក ជា ស៊ីម កំពុងត្រូវបាន​ប្រជាពលរដ្ឋ «ស្ទើរ»ទូទាំងប្រទេស កាន់មរណទុក្ខនេះ បែរជាការសែតភ្នំពេញប៉ុស្តិ៍ ចុះផ្សាយ និងសរសេរ​ព័ត៌មាន ដោយគ្មានមូលដ្ឋានគ្រិះពិតប្រាកដ ខ្វះខាតខាងមនសិការ គ្មានសីលធម៌ បំពានលើវិជ្ជាជីវៈសារ​ព័ត៌មាន ដែលលោកហៅថា មានភាព«ជម្លើយ» ហួសព្រំដែន។

រដ្ឋមន្រ្តីក្រសួងព័ត៌មាន បានបន្ថែមទៀតថា៖ «ការសែតភ្នំពេញប៉ុស្តិ៍ ពាក្យខ្មែរ ដែលយើងហៅថា “ឈ្លើយ”។ (...) ខ្មែរយើងនៅពេលបុណ្យមរណទុក្ខ គាត់ (ភ្នំពេញប៉ុស្តិ៍) ទៅយករបាយការណ៍មួយ ឆ្នាំ២០០៥ មិនមែនជា​របាយ​ការណ៍​ឥឡូវទេ។ ខ្មែរយើងសម្រាប់ការគោរពសព វាជារឿងសំខាន់ណាស់ យើងមិនអាចធ្វើដូច្នេះបានទេ។ (...) តាមផ្លូវច្បាប់គេអាចប្តឹងបាន ថ្វីត្បិតគាត់យករបាយការណ៍ របស់ ប្រេដអាដាំ តាំពីឆ្នាំ២០០៥ឯណោះ (...)។ តែ​គាត់​យកមកផ្សាយ ជាសាធារណៈនៅពេលនេះ តាមច្បាប់គ្រួសារ គេអាចប្តឹងបាន។»

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់ ពីអ្នកទទួលខុសត្រូវ របស់ការសែតភ្នំពេញប៉ុស្តិ៍ បាននៅ​ឡើយ នារសៀលថ្ងៃទី១១ ខែមិថុនានេះ។ ប៉ុន្តែបន្ថែមពីលើការថ្លែង របស់លោក ខៀវ កាញារីទ្ធ ដែលជារដ្ឋមន្ត្រី ក្រសួងព័ត៌មានហើយនោះ នៅក្នុងថ្ងៃទី១១ ខែមិថុនានេះដដែល ក្រសួងព័ត៌មាន ក៏បានចេញ នូវសេចក្តី​ថ្លែង​ការណ៍​មួយ​ទៀត ធ្វើការថ្កោលទោស ចំពោះការចុះផ្សាយអត្ថបទ របស់ការសែតភ្នំពេញប៉ុស្តិ៍នេះដែរ ដោយហៅ​ការ​ចុះ​ផ្សាយនោះ ថាបានធ្វើឡើង លើខណៈមួយ ដែលមិនសមស្រប។

កាលពីថ្ងៃទី ១០ ខែមិថុនា ម្សិលម៉ិញនេះ ការសែតភ្នំពេញប៉ុស្តិ៍ជាភាសាអង់គ្លេស បានសរសេរ និងចុះផ្សាយ​ក្នុង​ការសែតរបស់ខ្លួន នូវអត្ថបទមួយ តាមរបាយការណ៍ចាស់ របស់លោក ប្រេដអាដាំ នាយកទទួលបន្ទុក​កិច្ចការ​អាស៊ី របស់អង្គការឃ្លាំមើលសិទ្ធិមនុស្ស ដោយបានចោទប្រកាន់លោក ជា ស៊ីម ថាជាមនុស្សម្នាក់ ដែលបាន​រំលោភ​សិទ្ធិមនុស្ស យ៉ាងធ្ងន់ធ្ងរក្នុងសម័យខ្មែរក្រហម។ ព័ត៌មានដែលសរសេរជាភាសាអង់គ្លេស ក្នុងការសែត​ភ្នំពេញប៉ុស្តិ៍នោះ មានចំណងជើងថា «Sim’s KR rol Scrutinised»៕