លោក ម៉ម សូណង់ដូ លោកប្រធានវិទ្យុសម្បុកឃ្មុំ បានធ្វើការបកស្រាយ ទៅនឹងការធ្វើបាតុកម្ម នៃអតីតកម្មករ និងបុគ្គលិករបស់លោកថា លោកមិនបានដេញ ពួកគេចេញពីការងារទេ តែផ្ទុយទៅវិញ គឺពួកគេទេ ដែលបាន​ឈប់ពីការងារ ដោយមិនបានជូនដំណឹង មកលោកជាមុននោះ។

ប្រតិកម្ម របស់លោកនាយកវិទ្យុសំបុកឃ្មុំ បានធ្វើឡើងក្នុងថ្ងៃទី១០ ម្សិលម៉ិញ  បន្ទាប់ពីអតីតកម្មករ និងបុគ្គលិក​របស់ក្រុមហ៊ុន សូណង់ដូ ខូអិលធីឌី មួយចំនួន បានមកជួបជុំគ្នា កាលពីថ្ងៃដដែលនេះ នៅមុខវិទ្យុសំបុកឃ្មុំ ដើម្បី​ធ្វើបាតុកម្ម និងដើម្បីដាក់សេចក្តីជូនដំណឹង ពាក់ព័ន្ធការធ្វើកូដកម្មរបស់ខ្លួន ប្រឆាំងការបញ្ឈប់​បុគ្គលិក ពីក្រុមហ៊ុននេះ។ នៅក្នុងលិខិតជូនដំណឹង ដែលបានចុះថ្ងៃទី២៧ ខែឧសភា ឆ្នាំ២០១៥ (លិខិតដំបូង​ចុះ​ថ្ងៃទី​២៧ ខែមិថុនា និងបានសុំកែវិញ ដាក់ថា ថ្ងៃទី២៧ ខែឧសភា ឆ្នាំ២០១៥) មានសរសេរសម្តែងការខកចិត្ត មិន​អាច​ទទួលយកបាន នូវការបញ្ឈប់ កម្មករ និយោជិក ដែលចូលរួមជាមួយសហជីព។

លិខិតនោះ បានបញ្ជាក់បន្ថែមថា ចាប់ពីថ្ងៃទី១០ ខែមិថុនា ឆ្នាំ២០១៥នេះតទៅ នឹងមានកូដកម្មដោយ​សន្តិវិធី​មួយ មុខក្រុមហ៊ុន សូណង់ដូ ខូអិលធីឌី រហូតដល់មានដំណោះស្រាយ។ សំណេរនៅក្នុងលិខិត បានឲ្យដឹង​ទៀត​ថា៖ «កូដកម្ម ឬបាតុកម្មអហិង្សានេះ គ្មានការបង្ខិតបង្ខំ ឬញុះញង់ពីស្ថាប័ន ក្រុមបក្ស ឬភាគីណាមួយឡើយ។ វា​ជា​ឆន្ទៈ និងសិទ្ធិ ... ស្វែងរកផលប្រយោជន៍របស់យើងខ្ញុំ ដើម្បីទាមទារ ឲ្យមានការដោះស្រាយ ពីភាគី​និយោជក។»

យ៉ាងណាលោក ម៉ម សូណង់ដូ បានទទួលស្គាល់ លើអតីតភាពការងារ របស់កម្មករ និងបុគ្គលិកទាំងនោះ តែ​លោក​បានបដិសេធ ចំពោះការលើកឡើង ដែលថា លោកបណ្ដេញបុគ្គលិកទាំងនោះ។ លោកបន្តថា ផ្ទុយមក​វិញ ពួកគាត់បាននាំគ្នាធ្វើបាតុកម្ម ដោយមិនបានជូនដំណឹង មកក្រុមហ៊ុនលោកឡើយ។

ក្នុងកិច្ចសម្ភាសជាមួយអ្នកសារព័ត៌មាន កាលពីម្សិលម៉ិញនេះ លោកបានបញ្ជាក់ថា បើបុគ្គលិកទាំងនោះ ធ្វើ​បាតុកម្ម​ដោយមិនមានដំណឹងយ៉ាងដូច្នេះ តើវិទ្យុរបស់លោក ចាំបាច់ត្រូវបង្ខំចិត្ត បិទការផ្សាយឬ? បើបន្តការ​ផ្សាយ ចាំបាច់ត្រូវមានបុគ្គលិកថ្មី ទោះគ្មានបច្ចេកទេស ក៏ត្រូវតែប្រើ ដើម្បីជួយដោះស្រាយធ្វើយ៉ាងណា កុំឲ្យ​មាន​ការអាក់ខានការផ្សាយ។

ដាក់ការជឿជាក់ ទៅលើតុលាការច្រើនជាង ទៅអាជ្ញាកណ្តាល លោក សូណង់ដូ បានធ្វើការពន្យល់ដូច្នេះថា អាជ្ញាកណ្តាល គេមិនដែលគិតគូរ ទៅលើកំហុសរបស់កម្មករនោះទេ និងក៏មិនអាចដាក់ពិន័យ ឬទារជម្ងឺចិត្ត ពី​កម្មករទាំងនោះបានដែរ។ តែបើករណីនេះ ទៅដល់ដៃតុលាការ លោកអាចទាមទារ នូវជំងឺចិត្តដែល​ក្រុម​កម្មករ​ទាំងនោះបះបោរ (មិនធ្វើការ) មិនជូនដំណឹងដល់លោក ដែលនាំឲ្យមានការខាតបង់ជាដើម។

លោកបានបញ្ជាក់ ជាមួយនឹងសម្លេងខ្លាំងៗថា៖ «ពូអត់ដេញទេ គឺគេចេញ។ គេចេញ ហើយគេមិនមានគំនិត​ស្មោះសរ រកដំណោះស្រាយ មានគំនិតជេរពូ តាមហ្វេសប៊ូក។ នេះជាដំណោះស្រាយទេ? ខ្ញុំជាចៅហ្វាយនាយ ជេរខ្ញុំតាមចិត្ត។ (...) យកលិខិតពូទាំងអស់ ទៅដាក់តាមស្ថានទូត ពូសួរថាស្ថានទូត អាចដោះស្រាយបានទេ? គឺមានទិសដៅតែមួយទេ ចង់ធ្វើឲ្យពូខូចកេរ្តិ៍ឈ្មោះ។ អាហ្នឹងមិនដឹងអ្នកណា នៅពីក្រោយទេ។»

លោកបន្តថ្លែងទៀតថា៖ «កិត្តិយសមានពីរ។ កិត្តិយសមួយ ដែលយើងយកលុយទៅទិញ ដើម្បីកុំឲ្យគេ​និយាយ​ការពិត ទៅដោះស្រាយ ដើម្បីបំបិទ កុំឲ្យគេនិយាយរឿងហ្នឹង។ កិត្តិយសពូមិនអ៊ីចឹងទេ គឺតតាំង អ្នក​ដែល​រំលោភ​លើសិទ្ធិរបស់ពូ អ្នកដែលឈ្លានពានពូ អ្នកដែលមានគំនិតអាក្រក់ មកឈ្នានីសពូ អាហ្នឹងបានជា​កិត្តិយស​​របស់​ពូ។ (...) ខ្ញុំមិនយកលុយ ទៅបិទមាត់អ្នកខូចខិល ដើម្បីទុកឲ្យអ្នកនោះ រក្សាកិត្តយសរបស់ពូទេ។ ពូ​សុខ​ចិត្ត​ប្រឈម​មុខ ជាមួយអ្នកខូចខិល ប្រើល្បិច សំឡុតគេសំឡុតឯង ដើម្បីយកជោគជ័យ ពូមិនឲ្យអ្នកនោះមាន​ជោគ​ជ័យទេ ពូចង់ឲ្យច្បាប់មានជោគជ័យវិញ។»

សូមបញ្ជាក់ថា កាលពីថ្ងៃទី១១ ខែមីនាកន្លងមកនេះ ក៏មានការធ្វើបាតុកម្មរបស់អតីតកម្មក និងបុគ្គលិក​វិទ្យុ​សំបុក​ឃ្មុំនេះម្តងរួចមកហើយ ដើម្បីទាមទារឲ្យលោក ម៉ម សូណង់ដូ ដោះស្រាយលើអតីតភាពការងារ តែគ្មាន​ដំណោះស្រាយ។ សូមអានព័ត៌មានលំអិត ដោយចុចនៅលើទីនេះ៕