ករណី បុរសជនជាតិបរទេស ដេកស្ទើរអង្គុយ ស្លាប់នៅមាត់ទ្វាចូលផ្ទះ ត្រង់បង្អួចនេះ បានកើតឡើង ក្នុង​លំនៅ​ដ្ឋានជួលរបស់លោក ដែលបើកជាផ្ទះសំណាក់ ស្ថិតក្នុងក្រុមទី១៨ ផ្ទះលេខ ១៤២ ផ្លូវ ១៤៧ សង្កាត់ជ័យជំនះ ខណ្ឌដូនពេញ រាជធានីភ្នំពេញ។ បុរសរងគ្រោះឈ្មោះ ហានូ អីម៉ារី (Jokinnem Timo Hannu Ilmari) ជាជន​ជាតិ​ហ្វាំងឡង់ មានអាយុ ៤៩ ឆ្នាំ ដែលកំពុងប្រើប្រាស់លិខិតឆ្លងដែន លេខ PV០៩០៧០០៨ ត្រូវបានគេ​ស្គាល់​ថា ជាអ្នកជួលផ្ទះ បើកជាផ្ទះសំណាក់ ពីអ្នកស្រី គីម ហួរ អាយុ៣៧ឆ្នាំ នៅក្នុងទីតាំងខាងលើជាមួយស្វាមី។ បច្ចុប្បន្ន​អ្នកទាំងពីរ​ រស់នៅផ្ទះលេខ ៧៣Eo ផ្លូវ១៧២ ភូមិទី៦ សង្កាត់ជ័យជំនះ ខណ្ឌដូនពេញ រាជធានី​ភ្នំពេញ។

ម្ចាស់ផ្ទះទាំងពីរនាក់ប្តីប្រពន្ធខាងលើ បានបដិសេធមិនឆ្លើយតប ជាមួយអ្នកសារព័ត៌មាននោះទេ ហើយបាន​បិទទ្វារបង ចូលទៅទៅតាំងកើតហេតុ ដោយមិនផ្តល់ភាពលំអិតអ្វីច្រើនឡើយ។ អ្នកស្រី គីម ហួរ គ្រាន់តែ​បាន​និយាយថា គាត់មិនបានដឹងរឿងបុរសនោះ ស្លាប់ដោយមូលហេតុអ្វីនោះទេ តែអ្នកស្រី បានស្រង់ការ​បញ្ជាក់ របស់អ្នកកោសល្យវិច័យ មកនិយាយថា ជាការធ្វើអត្តឃាត ដោយចងក សម្លាប់ខ្លួននៅមាត់បង្អួច។

រីឯលោកវិរៈសេនីយ៍ត្រីម្នាក់ ដែលសុំមិនប្រាប់ឈ្មោះ និងដែលបានចូលរួម ធ្វើកោសល្យវិច័យលើសាកសព បាន​បង្ហើបឲ្យដឹងដូចគ្នាដែរថា ករណីជនបរទេសដេកស្ទើរអង្គុយ ស្លាប់នៅក្នុងឡៅតឿនេះ ជាការ​ធ្វើ​អត្តឃាត​មួយ ដ៏អាថ៌កំបាំង។ លោកបានបន្តទៀត ថា ពេលដំបូង ដែលចូលទៅក្នុងផ្ទះជនរងគ្រោះ ឃើញជាប់​សោរ​ទ្វា​រទីមួយ ពេលចូលទៅដល់បន្ទប់ ជនរងគ្រោះទៀត ក៏ឃើញសោរនោះជាប់ទ្វារទៀត តែបែរជាឃើញ កូនសោរ​ផ្ទះទាំងអស់នោះ នៅក្បែរសាសពទៅវិញ។

អ្នកសារព័ត៌មានរបស់ទស្សនាវដ្ដី មិនត្រូវបានអនុញ្ញាត ឲ្យចូលទៅក្នុងផ្ទះ ដែលមានជនរងគ្រោះទេ ដោយក្រុម​សមត្ថកិច្ចបានប្រាប់ថា ជាមរណៈភាពដ៏អាថ៌កំបាំង។ សូម្បីតែពេលឡានដឹកសាកសពចេញ ក៏ត្រូវចូលទៅ​ដល់​ក្នុងផ្ទះ បិទទ្វាជិតបានដឹកចេញដែរ។ ករណីនេះ ត្រូវបានការិយាល័យ បច្ចេកទេសវិទ្យាសាស្រ្ត និងគ្រូពេទ្យ​ជំនាញ របស់តុលាការក្រុងភ្នំពេញ កំពុងធ្វើការវិនិច្ឆ័យ ទៅលើទីតាំងរបស់សព និងធ្វើកោលស្យវិច័យ បន្ថែម​ទៅ​លើសាកសព ដើម្បីស្រាវជ្រាវរកមូលហេតុ នៃការស្លាប់។

គួររំលឹកថា គ្មានអ្នកណាម្នាក់បានដឹងថា ជនរងគ្រោះបានស្លាប់ ពីពេលណានោះទេ តែគេបានទទួល​ដំណឹង​ភ្ញាក់​ផ្អើលនេះ តាមរយៈក្លិនសាកសព ដែលធំក្លិនស្អុយ (រហូតមានហូរទឹក) ហើរចេញទៅដល់ អ្នករស់នៅផ្ទះ​ជាន់ក្រោម កាលពីវេលាម៉ោង ៩ព្រឹកថ្ងៃទី ០៧ ខែមិថុនា ឆ្នាំ២០១៥ នៅទីតាំងផ្ទះ របស់ជនរងគ្រោះស្នាក់នៅ ក្នុងពេលបច្ចុប្បន្ន ទើបបានទាក់ទង ទៅកាន់សមត្ថកិច្ចប៉ូលិសជំនាញ មកត្រួតពិនិត្យ។ បច្ចុប្បន្នសាកសព ត្រូវ​បានបញ្ជូនទៅតម្កល់ទុក ជាបណ្តោះអាសន្ន នៅវត្តស្ទឹងមានជ័យ រងចាំក្រុមគ្រួសារសាច់ញាតិ៕