សម្លេងស្រែកយំ ទួញសោក របស់ប្រជាកសិករមកពី ប្រាំភូមិ ក្នុងឃុំកំពង់ដំរី ស្រុកឆ្លូង ខេត្តក្រចេះ បានបន្លឺឡើង នៅមុខរដ្ឋសភាជាតិ កាលពីថ្ងៃទី៥ ខែមិថុនាកន្លងមកនេះ ដើម្បីថ្លែងរៀបរាប់ ពីទុក្ខព្រួយដែលអះអាងថា បុគ្គល​មានអំណាច បានរំលោភបំពាន និងប្លន់យកផ្ទះ ដីស្រែចំការរបស់ពួកគាត់។ នេះជាបញ្ហាដីធ្លីទំហំ ១៤៤ហិចតា  ដែលបានប៉ះពាល់ ទៅដល់ពលរដ្ឋកសិករ ប្រមាណជា ៦៥គ្រួសារ ហើយនៅតែរកដំណោះស្រាយមិនចេញ នៅ​ឡើយ។ រហូតមកដល់ពេលនេះ ពួកគាត់បានរៀបរាប់ទៀតថា អភិបាលរងស្រុក ឆ្លូង កំពុងដឹកនាំកម្លាំង មក​ធ្វើ​ការ​ឈូសឆាយ កំទេចផ្ទះសំបែង និងស្រែចំការ ព្រមទាំងចាប់ពលរដ្ឋ វាយនិងដាក់គុក នោះទៀត។

អ្នកស្រី កៅ ឆេង ពលរដ្ឋមួយរូប ក្នុងចំណោមពលរដ្ឋជាច្រើននាក់ ដែលធ្វើដំណើរពីស្រុកឆ្លូង ខេត្តក្រចេះ បាន​ប្រាប់ទស្សនាវដ្តីមនោរម្យ.អាំងហ្វូថា ក្រុមពលរដ្ឋទាំងអស់គ្នា ដែលឡើងមកដល់រាជធានីភ្នំពេញនេះ ចង់សុំ​ស្នើ​ឲ្យលោកនាយករដ្ឋមន្រ្តី ជួយអន្តរាគម សម្រាប់គ្រួសារអ្នកស្រី បានរស់នៅលើដីធ្លី របស់ខ្លួនដូចគេឯង។ ដូច​ជា​ប្រជាពលរដ្ឋផ្សេងទៀតដែរ អ្នកស្រីមានដីតែពីរហិកតាប៉ុណ្ណោះ រស់នៅតាំងពីឆ្នាំ២០១០មក។

តែដីនោះ ត្រូវបានលោកអភិបាលរង ស្រុកឆ្លូង លោក ខ័ណ្ឌ ចំណាន បានយកគ្រឿងចក្រ មកឈូសឆាយ វាយ​ពលរដ្ឋ និងចាប់ដាក់គុកក៏មាន។ ហេតុការណ៍ឈូសឆាយនេះ បានកើតឡើង ចាប់ពីថ្ងៃទី៦ ខែមេសា ឆ្នាំ២០១៥ ថ្មីៗនេះ និងបានដកយកដីនេះ ទៅឲ្យប្រជាពលរដ្ឋផ្សេងទៀត។ អ្នកស្រីបានថ្លែងឡើងថា៖ «កាលមកលើកមុន គេថា ចាំគេរកដំណោះស្រាយឲ្យ ពួកខ្ញុំក៏នាំគ្នាទៅវិញ។ ចេះតែចាំៗ មិនឃើញ ពួកខ្ញុំឡើងមកទៀត។ ចេះតែ​ចាំ​មើលថា មានដំណោះស្រាយឲ្យ ថាកុំអាលទៅណាទៅណី ចាំគេរកខុសត្រូវឲ្យ តែរហូតមកពេលនេះមិន​ឃើញ។»។

រីឯពលរដ្ឋមួយរូបទៀត អ្នកស្រី ចេង ស្រីនាង បានអះអាងបន្ថែមថា តាំងពីឆ្នាំ២០១០ ការរស់នៅលើដីទាំងនោះ បានប្រព្រឹត្តិទៅ ដោយគ្មានការជំទាស់ និងហាមឃាត់ ពីអាជ្ញាធរមូលដ្ឋានណាឡើយ។ ចំណែកអ្នកស្រី ប្រឹម សុគន្ធ មកពីភូមិប្រមា ស្រុកឆ្លូង ខេត្តក្រចេះ បានពន្យល់ថា ការពិត ដីដែលប្រជាពលរដ្ឋកាន់កាប់ទាំងអស់នោះ ដើមឡើយជាដីព្រៃ។ ហើយពលរដ្ឋ បាននាំគ្នាកាប់ឆ្ការ ដើម្បីសង់លំនៅដ្នាន និងដាំដំណាំសម្រាប់ចិញ្ចឹមជីវិត ដោយ​ហេតុថា សុទ្ធតែជាអ្នកក្រ គ្មានលទ្ធភាពនឹងមានដីធ្លី រស់នៅដូចគេឯង។ លុះក្រោយមក លោក ខ័ណ្ឌ ចំណាន បានមកចោទប្រកាន់ពួកគាត់ ថារស់នៅដោយខុសច្បាប់ ហើយបានដកហូតដី ជាមួយនឹង​ការ​គម្រាម​ផ្សេងៗ ដើម្បីយកដីនេះ ទៅប្រគល់ឲ្យជនជាតិខ្មែរ«ឥស្លាម» ដែលគេហៅថា ៩៩៨ (គ្រួសារ)។

ក្រុមអ្នកមានអំណាច មានលុយ ព្រោះតែចង់បានដី របស់ប្រជាពលរដ្ឋក្រីក្រ តូចតាច គ្មានកម្លាំងតតាំង មក​គម្រាម​កំហែង សម្លុត និងទាំងចោទប្រកាន់ថា ដីពួកគាត់ដែលកំពុងរស់នៅ ជាងប្រាំឆ្នាំនេះ ជាដីខុសច្បាប់។ នេះ​ជាការលើកឡើង របស់ពលរដ្ឋម្នាក់ទៀត អ្នកស្រី ស្រេង ផូ មកពីភូមិប្រមា ស្រុកឆ្លូង ដោយអ្នកស្រី បាន​បន្ថែម​ឲ្យដឹងទៀតថា ដល់ពេលដែលពលរដ្ឋមិនសុខចិត្ត ព្រោះតែរងគ្រោះបាត់បង់ដីធ្លីនោះ ក៏បានចេញមុខ​មក​ការពារដីរបស់ខ្លួន ក្រុមកម្លាំងអាជ្ញាធរស្រុក កម្លាំងប៉េអឹមនានា បានប្រើប្រាស់ហិង្សា ជាមួយនិង​ការកំហែង​នានា រហូតមានការចាប់ដាក់គុកជាដើម។

តំណាងឲ្យពលរដ្ឋ៦២ គ្រួសារ លោក អ៊ុយ ផល្លី បានថ្លែងឡើងថា ពួកគាត់ត្រូវបានអាជ្ញាធរមូលដ្ឋាន ដកហូត​យកដីលំនៅដ្ឋាន និងចំការរបស់ពួកគាត់ ទៅឲ្យប្រជាពលរដ្ឋដទៃផ្សេងទៀត ហៅថា ពលរដ្ឋ៩៩៨ គ្រួសារ ដែល​ទើបនឹងមក។ សម្រាប់ដីរបស់លោក ដែលបានមករស់នៅក្នុងឆ្នាំ២០០៤ និងដីពលរដ្ឋនានាផ្សេងទៀត ដែល​បាន​មករស់នៅ ជាបន្តបន្ទាប់ រហូតដល់សព្វថ្ងៃ សុទ្ធតែមានការដឹងលឺ និងអនុញ្ញាដោយអាជ្ញាធរឃុំ។ លោកថា បច្ចុប្បន្ននេះដីផ្ទះ និងចំការទាំងនោះ កំពុងត្រូវបានឈូសឆាយ ដោយមិនរង់ចាំការដោះស្រាយណាមួយ តាម​ផ្លូវ​ច្បាប់ឡើយ។

ទស្សនាវដ្តីមនោរម្យ.អាំងហ្វូមិនអាចទាក់ទងលោក ខ័ណ្ឌ ចំណាន អភិបាលរងស្រុកឆ្លូង ខេត្តក្រចេះ ជុំវិញការ​ចោទប្រកាន់ របស់ប្រជាពលរដ្ឋខាងលើនេះបានទេ។

ក្រុមពលរដ្ឋទាំងនោះ ត្រូវបានតំណាងរាស្រ្ត មកពីគណបក្សសង្គ្រោះជាតិ និងសមាជិកគណកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា នៃរដ្ឋសភា ចេញជួបមក ទទួលញត្តិ ជាមួយនឹង​ការថ្លែងថា នឹងខិតខំជួយរកដំណោះស្រាយ។ ដោយឡែក គេមិនឃើញ តំណាងរាស្រ្ត ខាងគណបក្សប្រជាជន​កម្ពុជាណាម្នាក់ ចេញមកជួបក្រុមពលរដ្ឋទាំងនោះឡើយ។

លោក ងឹម ញ៉េញ តំណាងរាស្រ្តមណ្ឌលពោធិសាត់ មកពីគណបក្សសង្គ្រោះជាតិ បាននិយាយថា លោកមាន​តួនាទីទទួលពាក្យបណ្តឹង និងញត្តិរបស់ប្រជាពលរដ្ឋ ជាមួយនឹងការពិនិត្យ អង្កេត ដើម្បីស្វែងរកអន្តរាគមន៍ ពី​រដ្ឋាភិបាល (អង្គការនីតិប្រតិបត្តិ)។ លោកបានថ្លែងឡើងថា៖ «ដូចដឹងហើយ បញ្ហានៅក្នុងសង្គមកម្ពុជា មាន​ច្រើន និងធ្ងន់ធ្ងទាំងអស់។ បញ្ហារបស់ប្រជាពលរដ្ឋ ជាគោលជំហររបស់នីតិបញ្ញត្តិ យើងខំប្រឹងប្រែង ឲ្យ​អស់​លទ្ធភាព ដើម្បីជួយជម្រុញឲ្យមានដំណោះស្រាយ ជូនប្រជាពលរដ្ឋឲ្យបានឆាប់ តាមដែលអាចធ្វើទៅបាន។»

កាលពីអំឡុងខែសីហា ឆ្នាំទៅម៉ិញ ករណីជម្លោះដីធ្លីនៅក្នុងខេត្តក្រចេះ ត្រូវបានលោក ហ៊ុន សែន នាយក​រដ្ឋ​មន្ត្រី​ប្រតិកម្មខ្លាំងៗម្ដងហើយ។ នៅពេលនោះ ក្រៅពីបញ្ជៀសថា លោកមិនដែលបានដឹង ពីបញ្ហា​ដីធ្លី​ដែល​កើត​មាន ចំពោះប្រជាពលរដ្ឋនោះ លោក ហ៊ុន សែន បានថ្លែង​ព្រមាន សំដៅទៅអាជ្ញាធរខេត្តក្រចេះថា៖ «យើងត្រូវ​លេងគ្នាម្ដង ដើម្បីឲ្យដឹងរឿង។ យូរៗទៅ ស្អីតិចថា ក្រោមការដឹកនាំរបស់លោក ហ៊ុន សែន។ ឥឡូវ ខ្ញុំត្រូវ​តែ​តាម​ដាន​មើល ហើយនឹងតាមរករឿងទៀត។ បើលោកឯងមិនធ្វើទេ ហើយថា​ការងារនោះ(រឿងដីធ្លី) ធ្ងន់​សម្រាប់​​ពួក​អស់លោក លាលែងចុះ ខ្ញុំជូនតាមសំណើ។ បើធ្វើរដ្ឋមន្ត្រី ធ្វើប្រធាន​ស្ថាប័ន មិនព្រមដោះស្រាយ​​​បញ្ហា​ជូន​ពលរដ្ឋ​កាន់​តួនាទីធ្វើអី?»

» អានអត្ថបទនេះឡើងវិញ ដោយចុចនៅលើទីនេះ។

រីឯតំណាងរាស្រ្តមណ្ឌលកណ្តាល លោក ចាន់ ចេង ដែលជាលេខា នៃគណកម្មការទីមួយ របស់រដ្ឋសភា បាន​លើកឡើងថា ក្រុមការងារជំនាញ នៃគណកម្មការទីមួយនៃរដ្ឋសភា បានចុះទៅកាន់ខេត្តក្រចេះ ក្នុងខែមករា​កន្លងមកនេះ ដើម្បីពិនិត្យ និងអង្កេតលើបញ្ហាវិវាទដីធ្លី ទូទាំងខេត្តក្រចេះនេះតែម្តង។ លោកបានលើកឡើងថា ក្រសួងមហាផ្ទៃ ធ្លាប់បានកោះហៅ អភិបាលខេត្តក្រចេះ មកសួរនាំក្នុងករណីវិវាទដីធ្លីនេះ តាមការស្នើសុំរបស់​សភា (អភិបាលខេត្ត មិនមានការទទួលខុសត្រូវ ចំពោះមុខរដ្ឋសភាទេ)។ បន្ថែមពីលើនេះ លោក ចាន់ ចេង បាន​ឲ្យដឹងទៀតថា គណកម្មការទីមួយនៃរដ្ឋសភា នឹងធ្វើលិខិតអញ្ជើញ រដ្ឋមន្រ្តីក្រសួងមហាផ្ទៃ មកដោះស្រាយ​ចំពោះ​មុខសភា ក្នុងពេលឆាប់ខាងមុខនេះ។ បន្ទាប់មក នឹងមានការកោះអញ្ជើញ ក្រសួងពាក់ព័ន្ធមួយចំនួន​ទៀត ដូចជា ក្រសួងនគរូបនីយកម្ម និងខាងទំនាស់ដីធ្លី ដែលមានរដ្ឋមន្ត្រី លោក ប៊ិន ឈិន) មកឆ្លើយ នៅចំពោះ​មុខ​រដ្ឋសភាដែរ៕