នៅពេលដែលបុរសចំណាស់ ដែលមានវ័យមិនតិចជាង៤០ឆ្នាំ (ចាស់ជាងគេ មានអាយុ៦០ឆ្នាំ) ទាំងប្រាំរូប បាន​ចូលមកដល់ក្នុងឆាក នៃកម្មវិធី Britain's Got Talent ដំបូង ពួកគេមិនបានធ្វើឲ្យមេប្រយោគ ទាំងបួននាក់ ចាប់​អារម្មណ៍ប៉ុន្មាននោះទេ ជាពិសេសលោក ស៊ីមុន ខូវែល (Simon Cowell) តែម្ដង។ ក្រសែរភ្នែក របស់លោក ក៏​ដូច​ជារបស់ទស្សនិកជនភាគច្រើន​ បានសម្ដែងចេញមក ដោយមិនបានគិតថា បុរសទាំងប្រាំ អាចមាន​ទេព​កោសល្យ​អ្វី មកពញ៉ាក់អារម្មណ៍ខ្លួនឡើយ។

ប៉ុន្តែ បរិយាកាសនៅក្នុងសាលទាំងមូល បានផ្លាស់ប្ដូរភ្លាមៗ បន្ទាប់ពីបុរសម្នាក់ បាននិយាយបង្ហាញខ្លួនថា ពួក​គេទាំងប្រាំនាក់ មានឈ្មោះ «Groovin' Old Men» និងថ្លែងម្នាក់ម្ដងថា ពួកគេមានជំនាញ ជាអាជីព​ខុសៗ​គ្នា។ បន្ទាប់មក ចូលដល់ឈុតឆាក សម្ដែងទេពកោសល្យ... ទាំងមេប្រយោគបួនរូប រួមនឹងទស្សនិកជន​ទាំងអស់ បាន​បើកមាត់ស្ងើច មិននឹកស្មាននឹងការធ្វើឲ្យភ្ញាក់ផ្អើល របស់បុរសវ័យចំណាស់ទាំងប្រាំ ដែល​កំពុង​កាច់ក្បាច់ Hip Hop នៅលើឆាក។

មិនមែនត្រឹមតែ Hip Hop ទេ តែពួកគាត់យកមកចង្វាក់រាំ break-dancing និង hip-gyrating មកដាក់​​លាយ​បញ្ចូល​គ្នា ជាមួយនឹងការចម្រៀងល្បីៗ ជាច្រើនបទ ដូចជា Sex Machine និង Jump On It បង្ក​ជា​ចង្វាក់ កន្ត្រាក់​ទាំង​អារម្មណ៍ អស់ទាំងមនុស្សនៅជុំវិញ។

ការសម្ដែងបានបញ្ចប់ទៅ បង្កភាពសោកស្ដាយ ដល់ទស្សនិកជនមួយចំនួន ដែលគិតថា «ដូចជាខ្លីពេក» តែ​បាន​ជំរុញមេប្រយោគ ស៊ីមុន ខូវែល ឲ្យអត់ទ្រាំមិនងើបឈរ ទះដៃអបអរបុរសទាំងប្រាំនាក់នេះ មិនបាន។ «អស្ចារ្យៗ! ក្រុមលោក ពិតជាអស្ចារ្យ!» នេះជាការឧទ្ទានឡើង នៅក្នុងកម្មវិធី របស់លោក ខូវែល ទៅកាន់​អ្នករាំ​វ័យចំណាស់​ទាំងប្រាំរូប៕