នេះជាករណីមួយ ក្នុងចំណោមករណី ប្រហាក់ប្រហែលនេះជាច្រើន ដែលកើតមាន នៅកម្ពុជា។ ពលរដ្ឋម្នាក់​រស់​នៅ ក្នុងភូមិកោះ​ក្របី​១ សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ បានរងនូវការគម្រាមកំហែង ជាបន្ត​បន្ទាប់ ពីម្ចាស់លុយ ក្នុងការបង្កើត ឲ្យមានលិខិត ឬកិច្ចសន្យានានាជាច្រើន ព្រោះតែឲ្យទទួលស្គាល់ថា ខ្លួនបាន​ខ្ចី​ប្រាក់ ចំនួនបីម៉ឺនដុល្លា ជាថ្នូនឹងរថយន្តមួយគ្រឿង។

អ្នកស្រី ហ៊ីង យ៉ាង អាយុ៦៤ឆ្នាំ ដែលជាភាគីរងការគម្រាមនោះ បានរៀបរាប់ប្រាប់ទស្សនាវដ្តីមនោរម្យ.អាំងហ្វូ  ថាអ្នកស្រីកំពុងរងទុក្ខវេទនា ព្រោះនាយទាហារ ថានៈផ្កាយពីរមួយរូប រួមជាមួយមន្ត្រីមួយចំនួន នៃអាជ្ញាធរ​មូលដ្ឋាន បានមកធ្វើការកំទេចផលដំណាំ និងធ្វើរបងព័ទ្ធយកដី ដែលគាត់កំពុងរស់នៅសព្វថ្ងៃ។ អ្នកស្រី បាន​ថ្លែងទាំងទឹកភ្នែកថា ដីរបស់អ្នកស្រីនេះ មិនត្រូវបានអ្នកស្រីលក់ ឬប្រគល់ទៅឲ្យឈ្មោះ អ៊ូ បុប្ផា (ប្រពន្ធ លោក ឡេង កឿន នាយរងសេនាធិការបញ្ជាការ អង្គរក្ស (ផ្កាយពីរ) នោះទេ។

ពីរឿងខ្ចីឡាន រហូតយកកម្មសិទ្ធិដីធ្លី មកពាក់ព័ន្ធ

អ្នកស្រី បានយករឿងដើម មករំលឹកឡើងវិញថា ដើមឡើយកូនប្រុសអ្នកស្រី ឈ្មោះ ហ៊ីង សុវណ្ណ ដែលជា​ទាហាន​ធ្វើការជាមួយឈ្មោះ ឡេង កឿន និងជាមិត្តភ័ក្រនឹងគ្នាដែរនោះ បានយកឡានរបស់គេ មកប្រើប្រាស់ តែ​មិនដឹងឡានអ្វីនោះទេ។ ឯម្ចាស់ឡានថា មិនឃើញប្រគល់ឡានឲ្យគេវិញ ទើបបង្ខំឲ្យធ្វើកិច្ចសន្យាខ្ចីប្រាក់ ចំនួន​បីម៉ឺនដុល្លាអាមេរិក ពីឈ្មោះ អ៊ូ បុប្ផា។

ស្រ្តីវ័យចំណាស់រូបនេះ បានលើកឡើងថា ដោយកូនអ្នកស្រី គ្មានប្រាក់សង ឈ្មោះ ឡេង កឿន និងឈ្មោះ អ៊ូ បុប្ផា ក៏បានមកនិយាយ ជាមួយអ្នកស្រី ដោយឲ្យអ្នកស្រី ធ្វើកិច្ចសន្យាមួយ លក់ដីទៅឲ្យគេ។ អ្នកស្រីថា ការធ្វើ​កិច្ចសន្យានេះ អ្នកស្រីបានត្រឹមតែដឹងថា ជាកិច្ចសន្យាទទួលស្គាល់ថា កូនបានជំពាក់លុយ ចំនួនបីម៉ឺនដុល្លា​ប៉ណ្ណោះ មិនមែនជាកិច្ចសន្យា ប្រគល់ដី ឬផ្ទេសិទ្ធិដីនោះឡើយ។ អ្នកស្រីមិនមានចេតនា ក្នុងការលក់ដូរដី​នេះ​ឡើយ ព្រោះជាដីពីដូនតា។ ប៉ុន្តែ ដោយសារការភ័យខ្លាច ព្រោះគេគម្រាម ចង់សម្លាប់កូនផងនោះ អ្នកស្រីក៏ព្រម​ផ្តិត​មេដៃទៅ។

ប៉ុន្តែ តាំងពីតម្លៃដីឡើងថ្លៃ (ក្នុងទីផ្សារ) ក៏ស្រាប់តែឈ្មោះនេះ បាននាំកម្លាំង និងក្រុមអង្គរក្សរបស់ខ្លួន មកធ្វើការ​កាប់បំផ្លាញដំណាំ និងធ្វើរបងព័ទ្ធលើដីនេះ ដោយពុំមានឲ្យដំណឹងជាមុនឡើយ។ នេះជាការអះអាង របស់​អ្នកស្រី ហ៊ីង យ៉ាង ជាមួយនឹងទឹកភ្នែក រមៀលធ្លាក់ជោគថ្ពាល់។

ទស្សនាវដ្តីមនោរម្យ.អាំងហ្វូ បានសុំការបញ្ជាក់ ជុំវិញសំនុំរឿងដ៏ចម្រូងចម្រាស់ ពីលោក ទូច ឈុំ ដែលជាមេភូមិ​កោះក្របី១ ក្នុងពេលបច្ចុប្បន្ន។ លោកមេភូមិ បានអះអាងថា កាលលោកនៅជាពលរដ្ឋសមញ្ញ លោកបាន​ដឹង​ថា ដីនេះពិតជារបស់អ្នកស្រី ហ៊ីង យ៉ាង ប្រាកដមែន។ តែលោកបានបដិសេធថា ចំពោះការលក់ដូរយ៉ាងណា​នោះ លោកមិនបានដឹងឮទេ ព្រោះលោកទើបនឹងឡើង ជាមេភូមិក្នុងឆ្នាំ២០១២ បន្ទាប់ពីមានការបំបែកឃុំ​ជាពីរ​ប៉ុណ្ណោះ។ លោកបន្តថា កាលនោះ ភូមិ កោះក្របី ទាំងមូល ស្ថិតក្នុងការគ្រប់គ្រង របស់លោក ប៉េ ប៉ាក់។

លោក ទូច ឈុំ បាននាំពាក្យរបស់លោក ឈឹម សាំង ចៅសង្កាត់ព្រែកថ្មី  មកថ្លែងអះអាងថា កន្លងមក មាន​ពាក្យ​​បណ្តឹងពីភាគីម្ខាងទៀត (ឈ្មោះ អ៊ូ បុប្ផា) ហើយអាជ្ញាធរមូលដ្ឋាន ក៏បានកោះហៅអ្នកស្រី ហ៊ីង យ៉ាង ចំនួន​​បី​លើក​មកហើយ ដើម្បីបំភ្លឺរឿងដីនេះនៅសង្កាត់ តែអ្នកស្រីមិនបានចូលរួមរួម។ លោកបានអះអាង​ដដែលៗថា លោកមិនដែលស្គាល់ ឈ្មោះ អ៊ូ បុប្ផា និង ឡេង កឿន នោះឡើយ។ លោកថា ឈ្មោះអ្នកទាំងពីរ  លោក​ទើបតែ​ស្គាល់ នៅពេលដែល ក្រុមនេះ បានចុះមកធ្វើរបង ក្នុងថ្ងៃទី៣ ខែឧសភានេះប៉ុណ្ណោះ។

ដោយឡែក អ្នកស្រី អ៊ូ បុប្ផា ដែលមានវត្តមាននៅទីនោះ មិនបានផ្តល់កិច្ចសម្ភាសណាមួយ ជាមួយ​ទស្សនាវដ្ដី​ទេ ទោះអ្នកសារព័ត៌មាន ព្យាយាមសុំឲ្យអ្នកស្រី បកស្រាយយ៉ាងណាក៏ដោយ។

ឯលោក ប៊ូ ប៊ូរិទ្ធិ ជានគរបាលមួយរូប នៅក្រសួងមហាផ្ទៃ ដែលស្និតនឹងម្ចាស់ឡាន បានបញ្ជាក់​ប្រាប់ទស្សនាវដ្តី ប្រហាក់ប្រហែលនឹង អ្នកស្រី ហ៊ីង យ៉ាង ដែរថាឈ្មោះ ហ៊ីង សុវណ្ណ បានខ្ចីឡាន«មេ»របស់ខ្លួន ដើម្បីមកដឹក​ភ្ញៀវ។ ក្រោយមក «មេ»របស់ ហ៊ីង សុវណ្ណ បានហៅសួររកឡាន តែឈ្មោះ ហ៊ី សុវណ្ណ នេះ ចេះតែ​លើកឡើង​ថា ម្តងនៅទីនេះ ម្តងនៅទីនោះ រហូតដល់ពេលជិតមួយឆ្នាំ។

មន្ត្រីនគរបាល បានបន្តថា «មេ»បានហៅ ឈ្មោះ ហ៊ីង សុវណ្ណ មកដោះស្រាយរឿងនេះ តែឈ្មោះនេះ​មិន​​បាន​មកទេ បែរជាឈ្មោះ ហ៊ីង យ៉ាង ដែលជាម្តាយ បាន​មកជួប«មេ»នៅផ្ទះ ដោយអង្វរថា កុំឲ្យប្តឹងកូន​គាត់ដាក់​​គុក​អី។ លោក ប៊ូ ប៊ូរិទ្ធិ បានបន្តថា ឈ្មោះ ហ៊ីង យ៉ាង បានអង្វរ ដោយឲ្យកាត់ដីគាត់នេះយកទៅ។ ចំពោះ​សំនួរ​ដែល​សួរថា តើឡានម៉ាកអ្វី ក្នុងតម្លៃប៉ុន្មាននោះ លោក ប៊ូរិទ្ធិ មិនបានឆ្លើយ ឲ្យច្បាស់លាស់ទេ ដោយ​គ្រាន់​តែ និយាយ​ថា បើចង់ដឹងច្បាស់ ទាល់តែសួរម្ចាស់​ឡានផ្ទាល់។

សំនុំរឿង ជាក្រដាសស្នាម

យោងតាមកិច្ចសន្យាខ្ចីប្រាក់ ដែលមានស្នាមមេដៃ អ្នកទទួលឈ្មោះ ហ៊ីង យ៉ាង និង ហ៊ីង សុវណ្ណ និងអ្នកប្រគល់​ឈ្មោះ អ៊ូ បុប្ផា ចុះថ្ងៃទី៨ ខែកុម្ភៈឆ្នាំ២០១០ ដោយមានលោកមេភូមិកោះក្របី ប៉េ ប៉ាក់ បានដឹងលឺ រួមទាំង​ហត្ថលេខា របស់លោកចៅសង្កាត់ព្រែកថ្មី ឈឹម សាំង ទទួលស្គាល់ហត្ថលេខា លោកមេភូមិកោះក្របីផង។ ក្នុង​ថ្ងៃដដែលនេះ (ថ្ងៃទី៨ ខែកុម្ភៈឆ្នាំ២០១០) ក៏មានកិច្ចសន្យាលក់ដី មួយច្បាប់ទៀត បានសរសេរថា ឈ្មោះ ហ៊ីង យ៉ាង បានព្រមព្រៀងលក់ដីលំនៅដ្ឋានរបស់ខ្លួន ទៅឲ្យឈ្មោះ អ៊ូ បុប្ផា និងចុះហត្ថលេខាដឹងឮ ដោយមេភូមិ​កោះ​ក្របី លោក ប៉េ ប៉ាក់ និងទទួលស្គាល់ហត្ថលេខា មេភូមិកោះក្របី ដោយលោកចៅសង្កាត់ព្រែកថ្មី ឈឹម សាំង។

លុះដល់ថ្ងៃទី១៧ ខែមិថុនា ឆ្នាំ២០១០ ឈ្មោះ ហ៊ីង យ៉ាង និងឈ្មោះ ហ៊ីងសុវណ្ណ ព្រមប្រគល់ដីទំហំ១៤១៦ ម៉ែត្រ​ការេ (ដីលំនៅដ្ឋាន) ឲ្យទៅឈ្មោះ អ៊ូ បុប្ផា ជាកម្មសិទ្ធិ ដើម្បីទូទាត់នឹងប្រាក់ជំពាក់ ចំនួនបីម៉ឺនដុល្លា​អាមេរិក បើសិនជាដីនោះ មិនត្រូវបានលក់ចេញ ក្នុងរយៈពេលបួនខែ បន្ទាប់ពីថ្ងៃផ្តិតមេដៃទេ។ កិច្ចសន្យា​ប្រគល់​សិទ្ធិ​ខាង​លើនេះ ក៏មានចុះហត្ថលេខា ដោយលោក អ៊ុន សុន ជំទប់ទី១ សង្កាត់ព្រែកថ្មីដែរ។

តែនៅថ្ងៃទី១០ ខែមេសា ឆ្នាំ២០១៤ ឈ្មោះ ហ៊ីង យ៉ាង នៅតែមិនមានប្រាក់សង ក៏បានធ្វើការសន្យាជាថ្មី ដោយ​សុំពន្យាពេល៧ខែទៀត (ថ្ងៃទី១០ ខែ១១ ឆ្នាំ២០១៤) ដើម្បីរកលុយមកសង។ តែបើរកមិនបានទេ ព្រមប្រគល់​ដីនោះ ទៅឲ្យឈ្មោះ អ៊ូ បុប្ផា ជាកម្មសិទ្ធិ។ នេះបើយោងតាមកំណត់ហេតុ ដែលមានចុះហត្ថលេខា ដោយលោក​ចៅសង្កាត់ព្រែកថ្មី លឹម វណ្ណថេង។

ការតតាំងតាមផ្លូវច្បាប់ បានចាប់ផ្ដើមហើយ!

យ៉ាងណា ចំពោះកំណត់ហេតុ សម្រុះសម្រួលនេះ ត្រូវបានបដិសេធដោយអ្នកស្រី ងួន មករា មេធាវីការពារក្ដី អោយអ្នកស្រី ហ៊ីង យ៉ាង តាមលិខិតជូនដំណឹង ចុះថ្ងៃទី១៧ ខែវិច្ឆិកា ឆ្នាំ២០១៤។ ក្នុងលិខិតនេះ អ្នកស្រី​មេធាវី​បានស្នើ ឲ្យលោកចៅសង្កាត់ ដោយប្រគល់លិខិតជូនដំណឹងនេះ ទៅឲ្យអ្នកស្រី អ៊ូ បុប្ផា ដោយស្នើសុំ​ឲ្យ​ធ្វើ​ការ​រំលាយ កំណត់ហេតុសម្រុះសម្រួល ចុះថ្ងៃទី១០ ខេមេសា ឆ្នាំ២០១៤ ចោលទាំងស្រុង។

មេធាវីការពារអ្នកស្រី ហ៊ីង យ៉ាង បាន​សំអាង​ហេតុផលថា៖ «តាមផ្លូវច្បាប់ ក្រមរដ្ឋប្បវេណី និងក្រមនីតិវិធី​រដ្ឋប្បវេណី គ្មានម្ចាស់​បំណុល​ណាម្នាក់ មានសិទ្ធិ យកទ្រព្យសម្បត្តិរបស់កូនបំណុល មកធ្វើជាកម្មសិទ្ធិបាន​ឡើយ។ ហេតុដូចនេះ ទាក់​ទងនឹងការទាមទារនេះ យើងសូមបដិសេធចោល និងរង់ចាំការដោះស្រាយ តាម​នីតិវិធីច្បាប់ជាធរមាន ដើម្បី​ការពារនូវផលប្រយោជន៍ស្របច្បាប់។»

សូមបញ្ជាក់ថា ដីនេះសព្វថ្ងៃកំពុងគ្រប់គ្រង ដោយឈ្មោះ ហ៊ីង យ៉ាង តែការរៀបចំទីធ្លាខាងក្នុង និងការធ្វើរបង​ព័ទ្ធជុំវិញដីនោះ កំពុងធ្វើឡើងដោយអ្នកស្រី អ៊ូ បុប្ផា។ ទំនាស់ក៏កំពុងកើតមាន ឯអាជ្ញាធរកំពុងស្វែងរកវិធី​សម្រប​សម្រួល និងដោះស្រាយ។ ករណីរឿងនេះ អ្នកសារព័ត៌មានរបស់ទស្សនាវដ្តី បានចុះទៅផ្តិត យករូបភាព​ជាក់ស្តែងនៃទំនាស់ តែត្រូវបានហាមឃាត់ ដោយក្រុមអង្គរក្សរបស់អ្នកស្រី អ៊ូ បុប្ផា។ ចំពោះដំណើររឿង​បែប​ណា ទៅពេលខាងមុខទៀត ទស្សនាវដ្ដីនឹងត្រឡប់មកជូនដំណឹងបន្ថែម នៅពេលក្រោយ៕