ក្រុងវ៉ាស៊ីនតោន និងប្រទេស នៅអាស៊ីអគ្នេយ៍មួយចំនួន បានចោទក្រុងប៉េកាំង ពីមហិច្ឆតាដ៏ធំហួសប្រមាណ ទៅលើ​តំបន់​ភូមិសាស្ត្រ ក្នុងសមុទ្រចិនខាងត្បូង។ ចំណុចដែលបង្កការក្ដៅក្រហាយ ក្នុងពេលបច្ចុប្បន្ន ស្ថិតលើប្រជុំកោះ ស្ពរ៉ាតឡី (Spratleys) ដែលអាចនឹងលាតសន្ធឹង នៅជុំវិញផ្ទៃក្រឡា ប្រមាណជ៤០០ ០០០គីឡូម៉ែត្រការ៉េ។

ប្រជុំកោះនេះ មិនត្រឹមតែជាទីប្រសព្វ នៃចរាចរណ៍ផ្លូវសមុទ្រ ដ៏សំខាន់ជាងគេ សម្រាប់ពាណិជ្ជកម្មពិភពលោក​ប៉ុណ្ណោះទេ តែថែមទាំងជាតំបន់ ដែលពោរពេញដោយធនធានប្រេងកាត ដ៏សន្ធឹកសន្ធាប់នោះទៀត។ ប៉ុន្តែប្រសិនបើ​ប្រទេស​វៀតណាម ហ្វីលីពីន ឬប្រទេសម៉ាឡេស៊ី និងតៃវ៉ាន់ បានឈ្លោះគ្នា ដើម្បីដំណ្ដើមកាន់កាន់តំបន់នោះ ទោះជាទាំង​មូល ឬ​ផ្នែក​ខ្លះ​ក៏ដោយ ចំពោះក្រុងប៉េកាំងវិញ ដែលចង់បានតំបន់នោះដូចគ្នា កំពុងដឹកនាំឲ្យមានការសាងសង់ នូវ​សំណង់​ធំៗ​ជា​ច្រើន ក្នុង​នោះ​មានដូចជាកំពង់ផែ និងហេដ្ឋារចនាសម្ព័ន្ធផ្សេងទៀត រួចទៅហើយ។

ផែនទីសមុទ្រ ដែលប្រទេសជាភាគីជម្លោះ គូរព្រំដែនទៅតាមអ្វី ដែលខ្លូនជឿថាជាទឹកដីរបស់ខ្លួន។

«សង្គ្រាមនឹងមិនអាចជៀសផុតទេ»

សហរដ្ឋអាមេរិក តាមរយៈសម្លេងរបស់រដ្ឋមន្ត្រីការពារជាតិ លោក អាស្ដុន កាទ័រ (Ashton Carter) បានរំលឹកទីក្រុង​ប៉េកាំង ឲ្យបញ្ឈប់​ជា​បន្ទាន់ នូវសកម្មភាពរៀបចំ ឬការសាងសង់អ្វីមួយ នៅលើតំបន់នោះ។ នៅក្នុងសេចក្ដីប្រកាសរបស់​អាមេរិក បាន​ឲ្យ​ដឹង​ទៀតថា ខ្លួននឹងបន្ត បន្ថែមវត្តមានកងទ័ពរបស់ខ្លួន ចូលទៅកាន់តំបន់ ជុំវិញប្រជុំកោះ ខណៈកងទ័ព​ចិន​វិញ បានព្រមាន​យន្ដហោះយកការណ៍ របស់អាមេរិកមួយគ្រឿង កាលពីពីប៉ុន្មានថ្ងៃមុន ឲ្យចាក់ចេញពីទីនោះ។

សម្រាប់ប្រទេសចិនវិញ ដូចជាមានបំណង ចង់កាត់បន្ថយភាពតាងតឹងនេះទៅវិញ ដោយបានប្រកាសអះអាង ពីស្ថានភាព​មួយ ដ៏ប្រសើរនិងនឹងនរ។

ផ្ទុយពីគោលជំហរខាងលើនេះ កាលពីសប្ដាហកន្លងទៅ សារព័ត៌មានចិន «Global Times» បានរំពឹងគិតថា សង្គ្រាមនឹង​«មិនអាចជៀសផុត»ទេ ប្រសិន​បើ​សហរដ្ឋអាមេរិក មិន«លេបសម្ដី»របស់ខ្លួនវិញ ក្នុងការស្នើសុំឲ្យទីក្រុងប៉េកាំង បញ្ឈប់​នូវការសាងសង់ទាំងឡាយ នៅ​លើ​ប្រជុំកោះ៕