ភ្លៀងធ្លាក់ បានបង្អុរស្រោចស្រព កាលពីថ្ងៃអាទិត្យ នៅក្នុងរដ្ឋជាច្រើន ភាគខាងជើងនៃប្រទេស ឥណ្ឌា និងជាពិសេស​រដ្ឋធានី ញ៉ូដេលី ដែលបានរងគ្រោះ នឹងការឡើងកម្ដៅ តាំងពីច្រើនថ្ងៃមកហើយ។ ប៉ុន្តែភាពត្រជាក់ត្រជុំ ដែលបានមក​ពី​ការ​ស្រោចស្រពនេះ មិនមានរយៈពេលយូរប៉ុន្មានទេ ដោយសារគេបានប្រមើលឃើញថា សីតុណ្ហភាពនៅក្នុង​ប៉ុន្មាន​ថ្ងៃ​ខាងមុខ នឹងកើនឡើងដល់ ៤៥អង្សាទៀត នៅក្នុងតំបន់ខាងត្បូង ខាងលិខ និងភាគខ្លះ នៃតំបន់ភាគខាងជើង របស់​ប្រទេស។

អ្នកទទួលខុសត្រូវមួយរូប បានថ្លែងប្រាប់ទីភ្នាក់ងារសារព័ត៌មានបារាំង អាអេហ្វប៉េ (AFP) ថា៖ «មនុស្ស១៦៣៦នាក់ បាន​ស្លាប់ នៅក្នុងរដ្ឋ អេនដ្រា (Andhra) តែមួយ» ខណៈអ្នកទទួលខុសត្រូវម្នាក់ទៀត បានអះអាងថា ៥៤១នាក់ផ្សេងទៀត បាន​ស្លាប់ នៅក្នុងរដ្ឋផ្សេងទៀត។

ជារៀងរាល់រដូវក្ដៅ (រាល់ឆ្នាំ) មនុស្សជាច្រើនរយនាក់ ដែលភាគច្រើនជាអ្នកក្រីក្រ បានស្លាប់ដោយសារការឡើងកម្ដៅ។ ប៉ុន្តែនៅឆ្នាំ២០១៥នេះ កំពុងត្រូវបានចាត់ទុក ជាឆ្នាំជាប់ចំណាត់ថ្នាក់ទីពីរ ដែលការឡើងកម្ដៅ បានសម្លាប់មនុស្ស​យ៉ាង​ច្រើនយ៉ាងដូច្នេះ នៅក្នុងប្រវត្តិសាស្ត្រនៃប្រទេសឥណ្ឌា និងចំណាត់ថ្នាក់ទី៥ បើប្រៀបធៀបនឹងគ្រោះថ្នាក់បែបនេះ នៅ​ក្នុង​ពិភពលោក។

កាលពីឆ្នាំ១៩៩៨ ប្រទេសអាស៊ីខាងត្បូងមួយនេះ មានជនរងគ្រោះរហូតដល់ទៅ ២៤៥១នាក់ បានស្លាប់នឹងការឡើង​កម្ដៅ ហើយបានក្លាយជាឆ្នាំដំបូងគេ ដែលមានមនុស្សរងគ្រោះ ច្រើនជាងគេ នៅក្នុងប្រវត្តិសាស្ត្រនៃប្រទេស។ នៅក្នុង​បណ្ដា​រដ្ឋ ដែលរងការប៉ះពាល់ច្រើនជាងគេ រដ្ឋាភិបាលឥណ្ឌា បានបើកយុទ្ធនាការអប់រំ ទៅដល់ប្រជាជនរស់នៅក្នុងតំបន់​ទាំង​នោះ ដើម្បីពន្យល់ឲ្យដឹងពីគ្រោះថ្នាក់ និងប្រាប់ពីរបៀប ដែលពួកគេត្រូវប្រឈម នឹងកម្ដៅក្ដៅហុយផ្សែងដូច​នេះ៕