«ខ្ញុំមិនបានថតរូប ធ្វើឲ្យមានចំណាប់អារម្មណ៍ ឬចង់បានការទាក់ទាញ ពីអ្នកណានោះទេ គឺថ្ងៃទៅខួបកំណើតនោះ ខ្ញុំ​ចេញ​ពីថតម៉ូដសម្លៀកបំពាក់ ឲ្យហាងមួយ។ ពេលនោះ ប្រញាប់ទៅថត នៅកន្លែងមួយទៀត មិនបានប្តូរឈុតនោះចេញ ជួន​ពេល​ទៅដល់ ជួបជាមួយមិត្តរួមការងារចាស់ គេសុំថត ក៏ថតជាមួយ។ មិននឹកស្មានថា គេបង្ហោះរូបនោះ លើបណ្តាញ​សង្គម ហើយធ្វើឲ្យប៉ះពាល់ ដល់អារម្មណ៍ប្រិយមិត្ត អ្នកគាំទ្រមួយចំនួន។ ដូច្នេះ នាងខ្ញុំសូមទោស ព្រោះកំហុសអចេតនា​មួយនេះ។» ទាំងនេះជាពាក្យសម្តីផ្ទាល់ របស់កញ្ញា ដួង ស្រីពេជ្រ ដែលបានថ្លែង សុំទោសតាមរយៈ ទូទស្សន៍ក្នុងស្រុក​មួយ កាលពីពេលថ្មីៗនេះ។

ការចេញមុខបកស្រាយនេះ បានធ្វើឡើងភ្លាមៗ នៅប៉ុន្មានថ្ងៃ បន្ទាប់ពីមានការចែកចាយ និងផ្តល់មតិយោបល់ ក៏ដូច​ជា​ការរិះគន់ផ្សេងៗ នៅលើបណ្តាញសង្គម ពីសំណាក់អ្នកប្រើប្រាស់។ កញ្ញាបានធ្វើការបកស្រាយ នៅក្នុងស្ថានីយ៍ទូរទស្សន៍ ខ្សែរកាប CCPTV ប៉ុស្តិ៍លេខ៨ នៅក្នុងស្រុកថា កញ្ញាសូមអរគុណ ដែលអ្នកទាំងនោះបានគាំទ្រ និងជួយលើកទឹកចិត្តកញ្ញា កញ្ញាទទួលដោយរីករាយ នូវការឲ្យយោបល់ ប៉ុន្តែអ្វីដែលមិនមែនជាការពិត និងមិនមែន ជាចរិកពិតរបស់កញ្ញា ៗនឹងមិន​ទទួល​យកនោះទេ ព្រោះថាអ្នកទាំងនោះ មិនបានដឹងពីកញ្ញាច្បាស់។

ដួង ស្រីពេជ្រ បានលើកឡើងថា៖ «ពាក្យរិះគន់ខ្លះ មិនមែនជាចរិកពិតរបស់ខ្ញុំនោះទេ សូមកុំបន្ត ដូចជាការប្រមាថ មើល​ងាយខ្ញុំថា ជាស្រីលក់ខ្លូនជាដើម នាងខ្ញុំសុំបដិសេធ ហើយសុំមេត្តាបញ្ឈប់ជាបន្ទាន់»។

តារាស្រី ដែលបានចូល បម្រើសិល្បៈ ជាច្រើនឆ្នាំមកនេះ បានថ្លែងអំណរគុណ ដល់អ្នកគាំទ្រទាំងអស់ថា កញ្ញាអរគុណ ដល់អ្នកទាំងអស់ ដែលបានគាំទ្រ តាំងពីពេលចូលសិល្បៈដំបូង រហូតដល់ពេលនេះ ហើយកញ្ញានៅតែរីករាយ ទទួល​ជានិច្ច នៅពាក្យសម្តីរិះគន់ទាំងឡាយ ដើម្បីស្ថាបនា និងកែលម្អរ។ បច្ចុប្បន្នកញ្ញា ដួង ស្រីពេជ្រ បានបង្ហើបដែរថា នាង​មាន​អាជីព ជាអ្នកសម្តែងខារាអូខេ អ្នកសម្តែងរឿង អ្នកដើរម៉ូដ និងថ្មីៗនេះ នាងកំពុងចាប់អាជីព ជាអ្នកចម្រៀងមួយទៀត ហើយ​សព្វ​ថ្ងៃ តារាវ័យ២៦ឆ្នាំរូបនេះ មានភាពមមាញឹក ជាមួយការងារសិល្បៈ ទាំងនេះណាស់។ តែកញ្ញាសប្បាយចិត្ត​នឹង​ធ្វើ ព្រោះវាជាចំណូលចិត្ត៕